ທູດລາວ ສຳເລັດການປະຕິ ບັດໜ້າທີ່ ຢູ່ສປປ ເກົາຫລີ

ໃນໂອກາດນີ້, ສະຫາຍ ຮອງປະທານຄະນະປະທານ ຄະນະກຳມະການປະຈໍາ ສະພາປະຊາຊົນສູງສຸດ ແຫ່ງ ສປປ ເກົາຫລີ ກໍໄດ້ສະແດງຄວາມຊົມເຊີຍຕໍ່ ຜົນສໍາເລັດທີ່ສະຫາຍ ເອກອັກຄະລັດຖະທູດຍາດມາໄດ້ ໃນໄລຍະ 5 ປີ ທີ່ປະຕິບັດໜ້າທີ່ການທູດ ຢູ່ ສປປ ເກົາຫລີ ເຊິ່ງ ສະຫາຍ ເອກອັກຄະລັດຖະທູດ ໄດ້ປະກອບສ່ວນສໍາຄັນ ໃນການເພີ່ມຄູນສ້າງສາຍພົວພັນ ມິດຕະພາບ ແລະ ການຮ່ວມມື ທີ່ ເປັນມູນເຊື້ອ ລະຫວ່າງສອງປະເທດ ສປປ ລາວ-ສປປ ເກົາຫລີ.

ສະຫາຍ ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສປປ ເກົາຫລີ ໄດ້ປະດັບຫລຽນໄຊມິດຕະພາບຊັ້ນ 1 ຂອງລັດຖະບານ ສປປ ເກົາຫລີ ໃຫ້ແກ່ ສະຫາຍ ສີສະຫວາດ ຄໍາສາລີ ຢ່າງສົມກຽດ. ພ້ອມທັງ ອວຍພອນໃຫ້ ສະຫາຍ ເອກອັກຄະລັດຖະທູດ ຈົ່ງປະສົບຜົນສໍາເລັດໃນການປະຕິບັດພາລະກິດໃໝ່ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.

ສະຫາຍ ສີສະຫວາດ ຄຳສາລີ, ເອກອັກຄະລັດຖະທູດ ແຫ່ງ ສປປລາວ ປະຈຳ ສປປ ເກົາຫລີ ໄດ້ສະແດງຄວາມຂອບອົກຂອບໃຈຢ່າງຈິງໃຈຕໍ່ ສະຫາຍ ຮອງປະທານຄະນະປະທານ ຄະນະກຳມະການປະຈໍາ ສະພາປະຊາຊົນສູງສຸດ ແຫ່ງ ສປປ ເກົາຫລີ ທີ່ໄດ້ຕ້ອນຮັບ ຢ່າງອົບອຸ່ນ ແລະ ສະແດງຄວາມຂອບໃຈ ຢ່າງເລິກຊຶ່ງ ຕໍ່ ພັກ-ລັດຖະບານ ແຫ່ງ ສປປ ເກົາຫລີ ທີ່ໄດ້ຕົກລົງປະດັບຫລຽນໄຊມິດຕະພາບຊັ້ນ 1 ໃຫ້ ໃນຄັ້ງນີ້.

ສະຫາຍ ເອກອັກຄະລັດຖະທູດ ໄດ້ນຳເອົາຄວາມຢື້ຢາມຖາມຂ່າວ ອັັນອົບອຸ່ນທີ່ສຸດ ຂອງ ສະຫາຍ ທອງລຸນ ສີສຸລິດ ເລຂາທິການໃຫ່ຍຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໂດຍຜ່ານ ສະຫາຍ ຮອງປະທານຄະນະປະທານ ຄະນະກຳມະການປະຈໍາ ສະພາປະຊາຊົນສູງສຸດ ສປປ ເກົາຫລີ ໄປຍັງ ສະຫາຍ ກິມ ເຈິງ ອຸນ ເລຂາທິການໃຫ່ຍພັກແຮງງານເກົາຫລີ, ປະທານກິດຈະການແຫ່ງລັດ, ຜູ້ບັນຊາການສູງສຸດກຳລັງປະກອບອາວຸດ ແຫ່ງ ສປປ ເກົາຫລີ ນະໂອກາດນີ້ດ້ວຍ,

ໃນໂອກາດເຂົ້າຢ້ຽມອໍາລາດັ່ງກ່າວ, ສະຫາຍ ເອກອັກຄະລັດຖະທູດ ໄດ້ຕີລາຄາສູງຕໍ່ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ທີ່ເປັນມູນເຊື້ອ ລະຫວ່າງ 2 ພັກ, 2 ລັດ ແລະ ປະຊາຊົນສອງຊາດ ລາວ- ເກົາຫລີ ເຊິ່ງ ແມ່ນ ສະຫາຍ ປະທານ ໄກສອນ ພົມວິຫານຜູ້ນໍາທີ່ແສນເຄົາລົບຮັກຂອງ ປະຊາຊົນລາວ ບັນດາເຜົ່າ ແລະ ສະຫາຍ ປະທານ ກິມ ອິນ ຊຸງ ຜູ້ນໍາທີ່ຍິ່ງໃຫ່ຍຂອງປະຊາຊົນເກົາຫລີເປັນຜູ້ກໍ່ຕັ້ງ ແລະ ໄດ້ຮັບການສືບທອດໂດຍບັນດາຜູ້ນໍາຮຸ່ນຕ່າງໆຂອງ ສອງປະເທດ ຕະຫລອດມາ.

ສະຫາຍ ເອກອັກຄະລັດຖະທູດ, ໄດ້ອວຍພອນໃຫ້ສະຫາຍ Kang Yun Sok ຈົ່ງມີພະລານາໄມສົມບູນ ແລະ ອວຍພອນໃຫ້ ພັກ, ລັດຖະບານ ແລະ ປະຊາຊົນ ເກົາຫລີ ຈົ່ງຍາດໄດ້ຜົນສຳເລັດ ອັນຍິ່ງໃຫ່ຍກວ່າເກົ່າ ໃນພາລະກິດປົກປັກຮັກສາ ແລະສ້າງສາປະເທດຊາດ ເກົາຫລີ ສັງຄົມນິຍົມ.