ມະຫາເສດຖີພັນລ້ານພາພະນັກງານ 1.200 ຄົນ ທ່ຽວດິສນີແລນເປັນໂບນັດປະຈໍາປີ
ຫົວໜ້າລະດັບມະຫາເສດຖີພັນລ້ານຂອງບໍລິສັດ ຊິທາເດລ ແຈກໂບນັດພະນັກງານສາຂາຕ່າງປະເທດກວ່າພັນຄົນ ເປັນໂຄງການທ່ອງທ່ຽວດິສນີແລນ ໂດຍໃຫ້ພາສະມາຊິກໃນຄອບຄົວໄປນໍາໄດ້.
ທ່ານ ເຄນ ກຣິບຟິນ ຜູ້ບໍລິຫານຂອງບໍລິສັດຊິທາເດລ ຊີຄຽວຣິຕີ ແລະ ບໍລິສັດ ຊິທາເດລ ຈໍາກັດ ເຊິ່ງເປັນບໍລິສັດບໍລິຫານການເງິນ ແລະ ກອງທຶນລະຫວ່າງປະເທດ ຢູ່ອາເມລິກາລາຍໃຫຍ່ ແຈກລາງວັນປະຈໍາປີຄັ້ງໃຫຍ່ໃຫ້ພະນັກງານໃນບໍລິສັດຈາກສາຂາຕ່າງປະເທດທີ່ຢູ່ໃນພາກພື້ນອາຊີ-ປາຊີຟິກເຊັ່ນ: ຮົງກົງ, ສິງກະໂປ ແລະ ນະຄອນຫລວງໂຕກຽວ ປະເທດຍີ່ປຸ່ນ ລວມທັງໝົດ 6 ສາຂາ ເປັນໂຄງການທ່ອງທ່ຽວສຸດຫລູຫລາຂອງສວນສະໜຸກຍອດນິຍົມ “ດິສນີແລນ” ຢູ່ໂຕກຽວ ປະເທດຍີ່ປຸ່ນ.
ພະນັກງານທັງໝົດຂອງບໍລິສັດຂອງລາວ ໄດ້ເດີນທາງໄປທ່ຽວສວນສະໜຸກ ດິສນີແລນ ແລະ ດິສນີຊີ ຢູ່ໂຕກຽວ ໂດຍສາມາດພາຄອບຄົວ ແລະ ລູກໄປນໍາໄດ້ ເພື່ອເປັນການສະເຫລີມສະຫລອງເນື່ອງໃນໂອກາດຄົບຮອບ 20 ປີ ແລະ 30 ປີ ຂອງການສ້າງຕັ້ງບໍລິສັດທັງສອງ ໂດຍຜູ້ບໍລິຫານຂອງກຣິບຟິນເປັນຜູ້ອອກຄ່າໃຊ້ຈ່າຍໃຫ້ທັງໝົດ ເຊິ່ງລວມທັງຄ່າເດີນທາງ ແລະ ຄ່າໃຊ້ຈ່າຍເພື່ອເບິ່ງແຍງເດັກນ້ອຍທີ່ຮ່ວມເດີນທາງໄປໃນຄັ້ງນີ້ປະມານ 300 ຄົນ.
ເທົ່ານັ້ນຍັງບໍ່ພໍ, ເມື່ອເຂົ້າໄປໃນສວນສະໜຸກ ພະນັກງານແຕ່ລະຄົນຈະໄດ້ຮັບປີ້ແບບອັບເກຣດ ເຊິ່ງສາມາດລັດຄິວເຄື່ອງຫລິ້ນຕ່າງໆໄດ້ ຈຶ່ງບໍ່ຈໍາເປັນຕ້ອງລໍຖ້າຄິວເມື່ອຕ້ອງການຫລິ້ນເຄື່ອງຫລິ້ນຍອດນິຍົມເຊັ່ນ: ສະເປເມົາເທັນ ຫລື ໄພເຣດ ອອບ ເດິ ແຄຣິບບຽນ.
ບັດເຂົ້າສວນສະໜຸກແບບວັນເດ ພາສ ຂອງດິສນີແລນນັ້ນ ມີຄາລາລະຫວ່າງ 52,75-72,78 ໂດລາສະຫະລັດ. ດັ່ງນັ້ນ ຄ່າໃຊ້ຈ່າຍພູດຂອງບັດເຂົ້າສວນສະໜຸກສໍາລັບຜູ້ໃຫຍ່ຈໍານວນ 1.200 ຄົນ ອາດບໍ່ຕໍ່າກວ່າ 100.000 ໂດລາສະຫະລັດ.
