ທາງການຈີນ ເລັ່ງຮັບມື ຄົນເຈັບເປັນພະຍາດທາງເດີນຫາຍໃຈກະທັນຫັນ ເພີ່ມຂຶ້ນສູງ

ວັນທີ 1 ທັນວາ 2023, ສຳນັກຂ່າວຊິນຮວາ ລາຍງານວ່າ: ລັດຖະບານກຳລັງດຳເນີນມາດຕະການຕ່າງໆ ເພື່ອຮັບມືກັບການເພີ່ມຂຶ້ນຂອງຈຳນວນຄົນເຈັບຍ້ອນພະຍາດທາງເດີນຫາຍໃຈກະທັນຫັນ ໃນໄລຍະນີ້, ເຈົ້າໜ້າທີ່ສາທາລະນະສຸກ ຂອງຈີນເປີດເຜີຍວ່າ: ພະຍາດຕິດເຊື້ອໃນລະບົບທາງຫາຍໃຈທີ່ພົບຫລາຍໃນໄລຍະນີ້ ມີສາເຫດມາຈາກເຊື້ອ ໄຣໂນໄວຣັສ, ເຊື້ອໄມໂຄພລາສມາ, ເຊື້ອໄວຣັສ ອາເອສວີ ແລະ ເຊື້ອໄວຣັສ ອະດີໂນ.

ທາງດ້ານເວັບໄຊຂ່າວນິວຢອກໂພສ ລາຍງານວ່າ: ລັດໂອໄຮໂອ ຂອງສະຫະລັດ ອາເມລິກາ ເປັນລັດທຳອິດ ທີ່ພົບການລະບາດຂອງພະຍາດທາງເດີນຫາຍໃຈກະທັນຫັນຮຸນແຮງ, ພົບປະຊາຊົນ ຕິດເຊື້ອພະຍາດນີ້ແລ້ວ 142 ຄົນ ຕັ້ງແຕ່ເດືອນສິງຫາເປັນຕົ້ນມາ.

ຂະນະດຽວກັນ ທາງການເດນມາກ ແລະ ເນເທີແລນ ລາຍງານວ່າ ມີການຕິດເຊື້ອພະຍາດປອດຢ່າງໄວວາ ພົບຜູ້ຕິດເຊື້ອ ເພີ່ມຂຶ້ນເຖິງ 541 ຄົນ, ພ້ອມເຕືອນເຖິງການເພີ່ມຂຶ້ນຢ່າງໄວວາຂອງເຊື້ອໄມໂຄພລາສມາ ເຊິ່ງເປັນເຊື້ອພະຍາດທີ່ເຮັດໃຫ້ເກີດການອັກເສບໃນປອດ.