ອຸທົກກະໄພໃນເຄນຢາ ເຮັດໃຫ້ປະຊາຊົນເສຍຊີວິດ ປະມານ 120 ຄົນ
ສຳນັກຂ່າວຕ່າງປະເທດລາຍງານ 29 ພະຈິກ 2023, ທ່ານ ເຣມອນ ໂອມອນໂລ ເຈົ້າໜ້າທີ່ລະດັບສູງຈາກກະຊວງພາຍໃນຂອງເຄນຢາ ກ່າວວ່າ: ຈຳນວນຜູ້ເສຍຊີວິດຈາກເຫດການນ້ຳຖ້ວມ ເພີ່ມຂຶ້ນເກືອບ 2 ເທົ່າເປັນປະມານ 120 ຄົນແລ້ວ ແລະ ສ້າງຄວາມເສຍຫາຍໃນຫຼາຍພື້ນທີ່ຂອງປະເທດ.
ນອກຈາກຈຳນວນຜູ້ເສຍຊີວິດຂ້າງເທິງ ປະຊາຊົນຫຼາຍກວ່າ 89.000 ຄົວເຮືອນ ກາຍເປັນຜູ້ພັດຖິ່ນຈາກບ່ອນຢູ່ອາໄສ ແລະ ຕ້ອງຢູ່ໃນສະຖານທີ່ບ່ອນພັກອາໄສກວ່າ 112 ແຫ່ງທົ່ວປະເທດ. ເຄນຢາ ແລະ ປະເທດເພື່ອນບ້ານໃນໂຊມາລີ ແລະ ເອທິໂອປີ ກຳລັງຕໍ່ສູ້ກັບນໍ້າຖ້ວມທີ່ເກີດຈາກຝົນຕົກໜັກ ຊຶ່ງເຊື່ອມໂຍງກັບປາກົດການສະພາບອາກາດແອວນີໂຢ ອີກທັງໄພທຳມະຊາດດັ່ງກ່າວຍັງເຮັດໃຫ້ວິກິດດ້ານມະນຸດສະທຳໃນພາກພື້ນຮຸນແຮງກວ່າເກົ່າ ເນື່ອງຈາກມັນເກີດຂຶ້ນຕາມຫຼັງໄພແຫ້ງແລ້ງຄັ້ງຮ້າຍແຮງທີ່ສຸດໃນຮອບ 40 ປີ. ປະລິມານນ້ຳຝົນທີ່ຫຼາຍກວ່າປົກກະຕິອັນເປັນຜົນມາຈາກແອວນີໂຢເຮັດໃຫ້ເກີດນ້ຳຖ້ວມໃນວົງກວ້າງ ຊຶ່ງນຳໄປສູ່ການເສຍຊີວິດ, ການພັດຖິ່ນບ່ອນຢູ່ອາໄສຂອງຄອບຄົວຈຳນວນຫຼາຍ, ການແຜ່ລະບາດຂອງພະຍາດ, ການທຳລາຍໂຄງສ້າງພື້ນຖານ ແລະ ຊັບສິນ ຕະຫຼອດຈົນຮອດບັນຫາໄຟຟ້າດັບເປັນເວລາດົນທົ່ວປະເທດ ແລະ ຫຼາຍພື້ນທີ່ຂອງພາກພື້ນອາຟຣິກາຕາເວັນອອກ.
ທັງນີ້, ອາຟຣິກາ ເປັນໜຶ່ງໃນພາກພື້ນທີີ່ມີຄວາມສ່ຽງຫຼາຍທີ່ສຸດຕໍ່ການປ່ຽນແປງສະພາບອາກາດ ແລະ ເຫດການສະພາບອາກາດສຸດຂົ້ວ ຊຶ່ງກຳລັງເກີດຂຶ້ນຫຼາຍຄັ້ງ ແລະ ຮຸນແຮງຍິ່ງກວ່າເດີມ.
