ອິດສະລາແອນຍົກລະດັບໂຈມຕີທົ່ວເຂດກາຊາ ມີຜູ້ເສຍຊີວິດວັນດຽວ 700 ກວ່າຄົນ
ມີຜູ້ເສຍຊີວິດຫລາຍກວ່າ 700 ຄົນ ຢູ່ເຂດກາຊາຈາກການໂຈມຕີຂອງກອງທັບອິດສະລາແອນໃນວັນທີ 3 ທັນວາຜ່ານມາ.
ວັນທີ 4 ທັນວາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກປາແລັສຕິນລາຍງານວ່າ: ການໂຈມຕີທາງອາກາດຂອງກອງທັບອິດສະລາແອນ ເຊິ່ງເກີດຂຶ້ນທົ່ວເຂດກາຊາໃນວັນທີ 3 ທັນວາຜ່ານມາ ເຮັດໃຫ້ມີຜູ້ເສຍຊີວິດຫລາຍກວ່າ 700 ຄົນ ແລະ ມີຜູ້ໄດ້ຮັບບາດເຈັບອີກຫລາຍພັນຄົນ. ຖືເປັນສະຖິຕິຜູ້ເສຍຊີວິດຫລາຍທີ່ສຸດໃນມື້ດຽວ ນັບແຕ່ສົງຄາມຢູ່ເຂດກາຊາເລີ່ມຂຶ້ນ ໃນວັນທີ 7 ຕຸລາຜ່ານມາ ແລະ ເພີ່ມຈໍານວນຊາວປາແລັສຕິນເສຍຊີວິດຈາກການສູ້ຮົບຄັ້ງນີ້ເປັນຫລາຍກວ່າ 15.500 ຄົນແລ້ວ.
ຂະນະທີ່ກອງທັບອິດສະລາແອນກ່າວວ່າ: ຂະຫຍາຍຂອບເຂດຂອງປະຕິບັດການໂຈມຕີທັງທາງບົກ, ທາງທະເລ ແລະ ທາງອາກາດ ຄວບຄຸມນັບແຕ່ເໜືອຮອດໃຕ້ ຢູ່ເຂດກາຊາ ເພື່ອຍົກລະດັບການກວາດລ້າງກຸ່ມຮາມັດ ແລະ ຊ່ວຍເຫລືອຕົວປະກັນທີ່ຍັງຢູ່ໃນເຂດກາຊາໃຫ້ໄດ້ຮັບອິດສະຫລະພາບຢ່າງປອດໄພຄົບທຸກຄົນ.
ທັງນີ້, ອິດສະລາແອນ ແລະ ກຸ່ມຮາມັດສະຫງົບເສິກກັນໄດ້ຕໍ່ເນື່ອງພຽງ 7 ວັນ ລະຫວ່າງວັນທີ 24 ພະຈິກ – 1 ທັນວາຜ່ານມາ ເຊິ່ງໃນໄລຍະເວລາດັ່ງກ່າວ ກຸ່ມຮາມັດປ່ອຍຕົວປະກັນຊາວອິດສະລາແອນແລ້ວ 80 ຄົນ ໂດຍມີຫລາຍຄົນຖືສອງສັນຊາດ.
ເຖິງຢ່າງໃດກໍຕາມ, ຂໍ້ມູນຈາກຝ່າຍຄວາມໝັ້ນຄົງອິດສະລາແອນລະບຸວ່າ: ກຸ່ມຮາມັດຍັງຄວບຄຸມຕົວປະກັນໄວ້ອີກ 137 ຄົນ ແບ່ງເປັນຊາວອິດສະລາແອນ 126 ຄົນ ໂດຍບາງສ່ວນອາດຖືສອງສັນຊາດ. ນອກຈາກນີ້ ມີລາຍງານຕົວປະກັນ “ຍັງສູນຫາຍ” ອີກ 7 ຄົນ ເຊິ່ງຍັງບໍ່ມີການລະບຸສັນຊາດ.
ທັງນີ້, ອິດສະລາແອນ ແລະ ກຸ່ມຮາມັດຍັງກ່າວໂທດກັນໄປວ່າ ອີກຝ່າຍລະເມີດຂໍ້ຕົກລົງຢຸດຍິງກ່ອນ ສົ່ງຜົນໃຫ້ຄວາມພະຍາຍາມຢຸດຍິງຕ້ອງຢຸດສະງັກ. ສ່ວນກຸ່ມຮາມັດປະກາດວ່າ: ຈະບໍ່ມີການປ່ອຍຕົວປະກັນເພື່ອແລກປ່ຽນນັກໂທດຊາວປາແລັສຕິນອີກ ຈົນກວ່າສົງຄາມຈະສິ້ນສຸດ. ຂະນະທີ່ອິດສະລາແອນຖອນຄະນະຜູ້ແທນເຈລະຈາຢຸດຍິງອອກຈາກກາຕາ ເຊິ່ງເຮັດໜ້າທີ່ຄົນກາງນັບແຕ່ຕົ້ນຂອງສົງຄາມ.
