ປະກາດດຳລັດ ວ່າດ້ວຍການຈັດຕັ້ງ-ການເຄື່ອນໄຫວ ແລະ ຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນຳຂອງອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳ

ໃນພິທີໄດ້ຮັບຟັງການຜ່ານດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງອົງການຄຸ້ມຄອງ-ບໍລິຫານ ເຂດເສດຖະກິດພິເສດສາມຫຼ່ຽມຄຳສະບັບເລກທີ 359/ນຍ, ລົງວັນທີ 22 ພະຈິກ 2023; ດໍາລັດດັ່ງກ່າວ ມີ 5 ໝວດ, 12 ມາດຕາ, 19 ໜ້າທີ່, 5 ຂອບເຂດສິດ, ໂຄງປະກອບການຈັດຕັ້ງ ມີ 20 ຂະແໜງການ ແລະ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຊີ້ນຳ ອົງການຄຸ້ມຄອງ-ບໍລິຫານ ເຂດເສດຖະກິດພິເສດສາມຫຼ່ຽມຄຳ ສະບັບເລກທີ 147/ນຍ ເຊິ່ງເປັນຂໍ້ຕົກລົງ ປັບປຸງຈາກສະບັບເລກທີ 60/ນຍ, ລົງວັນ 28 ພະຈິກ 2023 ໂດຍໄດ້ແຕ່ງຕັ້ງບຸກຄະລະກອນ ຄະນະຊີ້ນໍາອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳ 21 ທ່ານ ແລະ ກົງຈັກຊ່ວຍວຽກ 20 ຂະແໜງການ. ຈາກນັ້ນ, ຄະນະຮັບຜິດຊອບແກ້ໄຂບັນຫາອາຊະຍາກຳ ໄດ້ລາຍງານກ່ຽວກັບການແກ້ໄຂບັນຫາອາຊະຍາກຳຢູ່ເຂດເສດຖະກິດພິເສດສາມຫຼ່ຽມຄຳ ເຊິ່ງໄດ້ແກ້ໄຂຮ່ວມກັບກໍາລັງມາຈາກສູນກາງ ແລະ ທ້ອງຖິ່ນ ລົງແກ້ໄຂຄະດີການສໍ້ໂກງທາງອອນລາຍ (Call Center) 2 ຄັ້ງ, ລວມມີ 15 ຈຸດຄື: ໃນວັນທີ 15 ສິງຫາ 2023 ລົງແກ້ໄຂ ຢູ່ໃນເຂດເສດຖະກິດພິເສດສາມຫຼຽມຄຳ ມີ 8 ຈຸດ ກັກຕົວຜູ້ຖືກສົງໄສ ໄດ້ທັງໝົດ 41 ຄົນ, ຍິງ 4 ຄົນ; ໃນວັນທີ 28 ພະຈິກ 2023 ແກ້ໄຂຢູ່ໃນເຂດເສດຖະກິດພິເສດສາມຫຼຽມຄໍາ ແລະ ຈຸດເຊື່ອມຕໍ່ກັບເມືອງຕົ້ນເຜິ້ງ ມີ 7 ຈຸດ ກັກຕົວຜູ້ຖືກສົງໄສ 462 ຄົນ, ຍິງ 41 ຄົນ; ພ້ອມເຄື່ອງຂອງກາງໂທລະສັບມືຖື 12 ແກັດ, ຄອມພິວເຕີ 16 ແກັດ. ໂອກາດດັ່ງກ່າວ, ບັນດາທ່ານທີ່ເຂົ້າຮ່ວມກອງປະຊຸມ ໄດ້ຜັດປ່ຽນກັນຂຶ້ນປະກອບຄຳຄິດເຫັນຕໍ່ກັບບັນຫາຕ່າງໆຢ່າງກົງໄປ-ກົງມາ, ມີວິທະຍາສາດ ເພື່ອຫາວິທີທາງໃນການແກ້ໄຂບັນຫາທີ່ຍັງຄົງຄ້າງໃຫ້ໝົດໄປ.

ຕອນທ້າຍກອງປະຊຸມ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບໄດ້ສະແດງຄວາມຊົມເຊີຍ ຕໍ່ຜົນສໍາເລັດຂອງການພັດທະນາເຂດດັ່ງກ່າວ ເຊິ່ງເປັນເຂດທີ່ໄດ້ມີການພັດທະນາໄວພໍສົມຄວນ ສາມາດປະກອບສ່ວນເຂົ້າໃນເສດຖະກິດ-ສັງຄົມໂດຍລວມຂອງປະເທດເວົ້າລວມ, ເວົ້າສະເພາະແຂວງບໍ່ແກ້ວ ເຊິ່ງເຫັນໄດ້ປະຈັກຕາ ແມ່ນການພັດທະນາພື້ນຖານໂຄງລ່າງ, ການມອບພັນທະເຂົ້າງົບປະມານຂອງລັດ, ການສ້າງແຮງງານລາວເຂົ້າໃນເຂດ, ປະຊາຊົນຢູູ່ອ້ອມຂ້າງໂຄງການໄດ້ຮັບຜົນປະໂຫຍດຈາກການພັດທະນາ ແລະ ອືື່ນໆ. ຜົນສໍາເລັດທີ່ຍາດມາໄດ້ນັ້ນ ຍ້ອນການເອົາໃຈໃສ່ ແລະ ຊີ້ນໍາຢ່າງໃກ້ຊິດຕິດແທດຈາກທຸກພາກສ່ວນ ທັງສູນກາງ ແລະ ທ້ອງຖິ່ນ, ບວກກັບຄວາມຕັ້ງໃຈ, ຄວາມຈິງໃຈຂອງຜູ້ພັດທະນາ ແລະ ຜູ້ລົງທຶນພາຍໃນເຂດ ທີ່ໄດ້ເອົາໃຈໃສ່ຂົນຂວາຍການລົງທຶນເຂົ້າມາໃນເຂດໃຫ້ນັບມື້ຫຼາຍຂຶ້ນ. ພ້ອມກັນນັ້ນ, ທ່ານຍັງໄດ້ມີຄຳເຫັນຊີ້ນຳໃຫ້ສືບຕໍ່ເອົາໃຈໃສ່ພ້ອມກັນແກ້ໄຂບັນຫາຕ່າງໆທີ່ຍັງຄົງຄ້າງ ໃຫ້ມີຄວາມເປັນເອກະພາບກັນໃນການຈັດຕັ້ງປະຕິບັດ ລະຫວ່າງ ຂະແໜງການທີ່ກ່ຽວຂ້ອງ ພາກລັດ ແລະ ຜູ້ພັດທະນາ ທີ່ຕິດພັນກັບຄວາມຮັບຜິດຊອບຂອງຫຼາຍພາກສ່ວນທີ່ຈະຕ້ອງໄດ້ສືບຕໍ່ແກ້ໄຂຢ່າງຂາດຕົວ ບົນເນື້ອໃນຈິດໃຈຊຸກຍູ້ສົ່ງເສີມເຂດດັ່ງກ່າວໃຫ້ໄດ້ຮັບການພັດທະນາໄວຂຶ້ນກວ່າເກົ່າ ແລະ ມີຄວາມຍືນຍົງ, ຮັບປະກັນຄວາມສະຫງົບ, ປອດໄພ, ຄວາມເປັນລະບຽບຮຽບຮ້ອຍ, ໄດ້ຜົນປະໂຫຍດຂອງລັດ, ປະຊາຊົນ ແລະ ຜູ້ພັດທະນາ.