ທະນາຄານໂລກ ຄາດຄະເນ ເສດຖະກິດລາວ ຈະຫຍາຍຕົວຢູ່ໃນລະດັບ 3,7%
ທະນາຄານໂລກ ປະຈຳລາວ ຫລື World Bank Laos ລາຍງານ ຫລ້າສຸດ ວັນທີ 30 ພະຈິກ 2023 ນີ້ວ່າ: ເສດຖະກິດຂອງ ສປປ ລາວ ພວມຟື້ນຕົວຢ່າງຊ້າໆ ຈາກພະຍາດໂຄວິດ19 ໂດຍຄາດຄະເນການເຕີບໂຕ ຍອດຜະລິດຕະພັນລວມພາຍໃນ (GDP) ໃນປີນີ້ ຈະບັນລຸ 3,7%, ເພີ່ມຂຶ້ນຈາກ 2,7% ໃນປີ 2022.
ນະໂຍບາຍການເງິນເພື່ອຄວາມໝັ້ນຄົງ, ໂຄງການທີ່ເສດຖະກິດລາວ ຈະເຕີບໂຕໃນລະດັບ 4,1% ໃນປີ 2024, ແຕ່ສິ່ງທ້າທາຍຍັງຄົງມີຢູ່ ເຊັ່ນ: ໄພເງິນເຟີ້ທີ່ຖີບຕົວສູງ, ໜີ້ສິນພາຍນອກສູງ ແລະ ການຂາດເຂີນແຮງງານ. ການປັບປຸງເສດຖະກິດ ຂອງ ສປປ ລາວ ສ່ວນໃຫຍ່ແມ່ນ ມາຈາກການເຄື່ອນໄຫວດ້ານການທ່ອງທ່ຽວ, ການຂົນສົ່ງ ແລະ ການບໍລິການຂົນສົ່ງທີ່ເຂັ້ມແຂງ ແລະ ການລົງທຶນຈາກຕ່າງປະເທດທີ່ຫຼາຍຂຶ້ນ, ແຕ່ອັດຕາການເຕີບໂຕຍັງຕ່ຳກວ່າທີ່ຄາດໄວ້ໃນເມື່ອກ່ອນ.
ບົດລາຍງານສະແດງໃຫ້ເຫັນວ່າ, ອັດຕາເງິນເຟີ້ ໄດ້ເພີ່ມຂຶ້ນໃນການບໍລິໂພກ ແລະ ຕົ້ນທຶນທາງທຸລະກິດ, ເຮັດໃຫ້ການໃຊ້ຈ່າຍຂອງຄົວເຮືອນຫລຸດລົງ ໃນດ້ານອາຫານ, ການສຶກສາ ແລະ ສຸຂະພາບ. ໄພເງິນເຟີ້ຍັງເຮັດໃຫ້ ເງິນຝາກປະຢັດໝົດໄປ, ເຮັດໃຫ້ຫຼາຍຄອບຄົວຕົກຢູ່ໃນຄວາມລໍາບາກ,ລັດຖະບານ ສປປ ລາວ ໄດ້ປະຕິບັດຫຼາຍມາດຕະການ ໃນການປັບປຸງການເງິນ ໂດຍການຄວບຄຸມລາຍຈ່າຍ ແລະ ການເພີ່ມລາຍຮັບຂັ້ນຕໍ່າ ໃນເຄິ່ງທຳອິດຂອງປີ 2023.
ການເຕີບໂຕທາງດ້ານເສດຖະກິດຂອງລາວ ຄາດວ່າ ຈະເພີ່ມຂຶ້ນ 4,2% ໃນໄລຍະກາງ ຈາກການໃຫ້ບໍລິການ ແລະ ການສົ່ງອອກ ແລະ ການຊ່ວຍເຫຼືອຈາກການຂະຫຍາຍຕົວຂອງຄວາມຕ້ອງການຂອງສາກົນ, ຄຽງຄູ່ກັບການປັບປຸງ ການບໍລິການເຊື່ອມຕໍ່ ແລະ ການຂົນສົ່ງຂອງລາວ.
ເຖິງຢ່າງໃດກໍ່ຕາມ, ເງິນກີບຂອງ ສປປ ລາວ ຈະຍັງຄົງມີທ່າອ່ຽງຢູ່ໃນສະພາບຄວາມກົດດັນ ເນື່ອງຈາກປະລິມານການນໍາເຂົ້າສູງ ແລະ ຄວາມຕ້ອງການ ເງິນຕາຕ່າງປະເທດ ທີ່ສູງ ເພື່ອນໍາມາ ຊໍາລະໜີ້.
