ໂປຣແກຣມ AI ຊ່ວຍໃຫ້ພໍ່ແມ່ພົບລູກຊາຍທີ່ຫາຍໄປ 20 ກວ່າປີ
ລະບົບປຽບທຽບໃບໜ້າດ້ວຍເຕັກໂນໂລຊີປັນຍາປະດິດມີບົດບາດສໍາຄັນໃນການຊ່ວຍຜົວເມຍຄູ່ໜຶ່ງຕາມຫາລູກຊາຍທີ່ຖືກລັກພາຕົວໄປຈາກເຫີເປຍເມື່ອ 25 ປີກ່ອນ.
ວັນທີ 3 ທັນວາ 2023, Beijing Deep Glint Technology ໄດ້ໂພສເລື່ອງການຕາມຫາບຸກຄົນສູນຫາຍໂດຍອາໄສເຕັກໂນໂລຊີ AI ຢູ່ແພກຟອມເວ່ຍປັ໋ວ.
ໂພສດັ່ງກ່າວເລົ່າເຖິງ ການກັບມາພົບກັນອີກຂອງພໍ່ແມ່ ແລະ ລູກຊາຍຄອບຄົວເຊີຍ ຫລັງຈາກ ສິງຊວຍ ຜູ້ເປັນລູກຖືກລັກພາຕົວໄປເປັນເວລາ 25 ປີ ດ້ວຍການຊ່ວຍເຫລືອຈາກໂປຣແກຣມ AI ທີ່ພັດທະນາຂຶ້ນໂດຍດີພົກລິນ ອາໄສຫລັກການປຽບທຽບ ແລະ ປະເມີນຄວາມຄ້າຍຄືຂອງໃບໜ້າຕາມຊ່ວງອາຍຸດ້ວຍລະບົບອັລກໍຣິທິມ.
ການລັກພາຕົວເດັກຊາຍສິງຊວຍໃນອະດີດເກີດຂຶ້ນເມື່ອວັນທີ 20 ມັງກອນ 1999 ລະຫວ່າງທີ່ແມ່ຂອງສິງຊວຍອອກໄປຊື້ຜັກ ປ່ອຍໃຫ້ລູກຊາຍອາຍຸ 10 ເດືອນໄວ້ຢູ່ເຮືອນທີ່ບໍ່ໄດ້ລັອກຢູ່ເມືອງຊິງໄທ່ ມົນທົນເຫີເປຍ ເມື່ອລາວກັບມາໃນອີກ 10 ນາທີ ລູກຊາຍຂອງລາວໄດ້ຫາຍໄປ.
ໃນຕອນນັ້ນແມ່ຂິງສິງຊວຍເລົ່າວ່າ: ກ່ອນທີ່ລາວຈະອອກຈາກເຮືອນ ລາວສັງເກດເຫັນຜູ້ຊາຍ 2 ຄົນ ເຮັດລັບໆລໍ້ໆວົນວຽນຢູ່ເຮືອນຂອງລາວ ແຕ່ບໍ່ໄດ້ສົນໃຈ ຈົນລູກນ້ອຍຫາຍໄປພ້ອມກັບຜູ້ຊາຍທັງສອງຄົນ.
ເຊຍເຄີເຟິງ ຜູ້ເປັນພໍ່ຂອງສິງຊວຍ ແລະ ພັນລະຍາຂອງລາວ ອອກຊອກຫາລູກຊາຍບໍ່ໄດ້ຢຸດເຊົາ ໂດຍໄດ້ຮັບການຊ່ວຍເຫລືອຈາກຄອບຄົວ, ໝູ່ເພື່ອນ ແລະ ເຈົ້າໜ້າທີ່ທາງການໃນທ້ອງຖິ່ນ ສອງຜົວເມຍເລາະຊອກຫາລູກຊາຍໄປຫລາຍເມືອງ ນັບແຕ່ນະຄອນຫລວງປັກກິ່ງໄປຈົນຮອດທຽນຈິນ ແລະ ເຫີໜານ.
ເຊຍເຄີເຟິງ ໝົດເງິນໄປນໍາການຕາມຫາລູກຈົນເງິນທີ່ທ້ອນໄວ້ເກືອບໝົດ. ຂະນະທີ່ເມຍຂອງລາວກໍເຈັບເປັນພະຍາດຊຶມເສົ້າ ແລະ ຕ້ອງປິ່ນປົວດ້ວຍການກິນຢາມາເປັນເວລາ 10 ປີ.
ບໍລິສັດເກີຫລິງ ເສິງຕົງ ເຕັກໂນໂລຊີ ເຊິ່ງເປັນບໍລິສັດແມ່ຂອງດິພົກລິນ ເຂົ້າມາໃຫ້ການຊ່ວຍເຫລືອສອງຜົວເມຍ ໂດຍອະທິບາຍວ່າ: ພວກເຂົາສາມາດໃຊ້ຮູບຖ່າຍຂອງພໍ່ແມ່ ແລະ ລູກຊາຍກົກມາໃຫ້ລະບົບ AI ຊ່ວຍວິເຄາະໃບໜ້າ ແລະ ຕີກອບຈໍານວນບຸກຄົນທີ່ອາດຈະເປັນລູກຊາຍຂອງພວກເຂົາຈົນເຫລືອພຽງ 5 ຄົນ.
ຕາມຂໍ້ມູນຂອງບໍລິສັດ ກໍລະນີຂອງຄອບຄົວ ເຊຍເຄີເຟິງ ເປັນຄະດີລັກພາຕົວເດັກຄະດີທີ 4 ໃນໄລຍະເວລາ 6 ເດືອນທີ່ທາງບໍລິສັດຮ່ວມວຽກກັບເຈົ້າໜ້າທີ່ຕໍາຫລວດເພື່ອຊອກຫາເດັກນ້ອຍທີ່ເປັນເຫຍື່ອໂດຍອາໄສໂປຣແກຣມ AI.
ໃນເດືອນພະຈິກຜ່ານມາ, ຕໍາຫລວດໄດ້ແຈ້ງກັບມາຫາຄອບຄົວ ເຊຍເຄີເຟິງ ວ່າພົບບຸກຄົນທີ່ມີຄວາມເປັນໄປໄດ້ວ່າຈະເປັນລູກຊາຍຂອງພວກເຂົາ ຫລັງຈາກນັ້ນບໍ່ດົນກໍໄດ້ຮັບການຢືນຢັນດ້ວຍຜົນການທົດສອບ ແລະ ປຽບທຽບ DNA ວ່າຄອບຄົວ ເຊຍເຄີເຟິງ ໄດ້ລູກຊາຍຂອງພວກເຂົາຄືນມາແລ້ວ.
ຫລັງຈາກຄອບຄົວ ເຊຍເຄີເຟິງ ພົບລູກຊາຍ ເຈົ້າໜ້າທີ່ທາງການກໍພົບຜູ້ຖືກສົງໄສ 2 ຄົນທີ່ຄາດວ່າມີສ່ວນກ່ຽວຂ້ອງຕໍ່ການລັກພາຕົວລາວ ໂດຍ 1 ໃນ 2 ຄົນນັ້ນເສຍຊີວິດແລ້ວ, ສ່ວນອີກຄົນໜຶ່ງຖືກຕໍາຫລວດຈັບ ແລະ ກັກຂັງໄວ້ແລ້ວ.
ສໍາລັບບຸກຄົນທີ 3 ເຊິ່ງຄາດວ່າກ່ຽວຂ້ອງໃນຖານະຜູ້ນໍາເອົາ ສິງຊວຍ ໄປຂາຍໃຫ້ສອງຜົວເມຍຄູ່ໜຶ່ງຢູ່ເມືອງຫານຕານ ເຊິ່ງຢູ່ໃນມົນທົນເຫີເປຍເຊັ່ນກັນ ກໍຖືກຕໍາຫລວດຈັບ.
