ຊ້າງຕາຍໄວ້ງາ ຄົນຕາຍໄວ້ຄຸນຄ່າ

- advert banner 728 90 728x90 - ຊ້າງຕາຍໄວ້ງາ ຄົນຕາຍໄວ້ຄຸນຄ່າ

ໂດຍ: ວິ​ເສດ ສະ​ແຫວ​ງສຶກສາ

- new3 - ຊ້າງຕາຍໄວ້ງາ ຄົນຕາຍໄວ້ຄຸນຄ່າ

​  ໃນ​ວັນ​ທີ 8 ​ເດືອນ​ສິງຫາ​ປີ​ນີ້ ​ໂຊກ​ດີ​ໄດ້​ມາ​ເຄາະ​ປະຕູ​ຫ້ອງ​ນອນ​ຈານ​ແຫຍ່​ແບບ​ບໍ່​ຄາດ​ຝັນ ​ເມື່ອ​ທ່ານ​ອາຈານ ອາ​ນູ​ໂລມ ສຸວັນ​ດວນ ​ໄດ້​ບັນຊາ​ລົດຈັກ​ເກົ່າ​ໜັງ​ບໍ່​ໄດ້​ເບິ່ງ​ຍີ່​ຫຍໍ້​ໄປ​ນຳ​ຫາ​ຈານ​ແຫຍ່​ຄຸງ​ເຮືອນ ​ແລ້ວ​ກໍ​ມອບ​ບັດ​ເຊີນ​ຂໍ​ໃຫ້​ໄປ​ຮ່ວມ​ພິທີ​ເປີດ​ປຶ້ມບັນທຶກ “​ໂຮມ​ຜົນງານ​ການ​ຂຽນ ​ແລະ ອອກ​ແບບ​ແຕ້ມ​ຂອງ​ອາຈານ ອານູ​ໂລມ ສຸວັນ​ດວນ” ມັນ​ເປັນ​ບັດ​ເຊີນ​ທີ່​ອອກ​ແບບຢ່າງ​ພິຖີ​ພິຖັນ​ຈາກ​ສີມື​ຂອງ​ທ່ານ​ອາຈານ​ຄົນ​ນີ້​ເອງ. ອາຈານ ອາ​ນູ​ໂລມ ​ແມ່ນ​ໃຜ ? ​ເລື່ອງ​ນີ້​ບໍ່​ອະທິບາຍ​ກໍ​ຄົງ​ຮູ້ ​ເພາະ​ຂ່າວ​ພິທີ​ເປີດ​ປຶ້ມບັນທຶກ​ໃນ​ວັນນັ້ນ​ໄດ້​ຮັບ​ການ​ເຜີຍ​ແຜ່​ຢ່າງ​ກວ້າງຂວາງ ​ແລະ ກ່ອນ​ໜ້າ​ນີ້​ອີກ 5 ປີ ທ່ານ​ອາຈານ​ກໍ​ເປັນ​ໜຶ່ງ​ໃນ​ບັນດາ​ສິລະ​ປິນຫລາຍ​ສາຂາ​ທີ່​ກາຍ​ເປັນ​ຂ່າວ​ໃຫຍ່ ​ເມື່ອ​ທ່ານ​ອາຈານ​ໄດ້​ຮັບ​ການ​ປະດັບ​ຫລຽນ​ນາມມະຍົດ​ສິລະ​ປິນດີ​ເດັ່ນ​ສາຂາ​ວິຈິດ​ສິນ​ຈາກ​ມື​ຂອງ​ທ່ານ​ນາຍົກ ທອງ​ສິງ ທຳ​ມະ​ວົງ ​ໃນ​ເວລາ​ນັ້ນ. ສຳລັບ​ຜູ້​ບໍ່​ໄດ້​ຮັບຮອງ​ຂ່າວ​ທີ່​ກ່າວ​ມາ​ແລ້ວນັ້ນ ຂໍ​ໃຫ້​ຊອກ​ເບິ່ງ​ຮູບ​ກາຊາດ​ລາວ (ກາ​ເກົ່າ) ​ເງິນ​ກີບ​ທະນາຄານ ​ແຫ່ງ ສປປ ລາວ ​ໃບ 1, 5, 10, 20, 50, 100, 500 ​ແລະ ​ໃບ 1.000 ກີບ ຫລື ອາດ​ຊອກ​ເບິ່ງ​ບັນດາ​ສະ​ແຕມ, ຮູບ​ແຕ້ມ​ປຸກລະດົມ​ໃບ​ຫວຍ​ຍຸກ​ທຳ​ອິດ​ຂອງ ສປປ ລາວ… ນັ້ນຄື​ຜົນງານ​ສ່ວນ​ໃຫຍ່​ແມ່ນ​ຈາກ​ຝີ​ມື​ຂອງ​ຊາຍ​ອາຍຸ 69 ປີ​ທີ່​ມີ​ຊື່ວ່າ ອາ​ນູ​ໂລມ ຄົນ​ນີ້. ສຳລັບ​ຜູ້​ທີ່​ເຄີຍ​ຢູ່​ໃນ​ເຂດ​ຄວບ​ຄຸມ​ຂອງ​ລັດຖະບານ​ຫຸ່ນ​ຂອງ​ລະບອບ​ວຽງ​ຈັນ​ເກົ່າ​ຄົງ​ເຄີຍ​ໄດ້​ເຫັນ​ຮູບ​ກາ​ຕູນ​ສຽດ​ສີ​ສັງຄົມ​ຂອງ​ທ່ານ​ອາຈານ ອາ​ນູ​ໂລມ ທີ່​ທະຍອຍ​ອອກ​ໃນ​ໜ້າ​ໜັງສືພິມ “ຊາດລາວ”, “ຟື້ນຟູ​ຊາດ” ​ແລະ ອື່ນໆ ຈົນ​ນັບ​ບໍ່​ຖ້ວນ. ສ່ວນ​ເລື່ອງ​ຮູບ​ແຕ້ມ​ປະ​ເພດ​ສິນ​ນັ້ນ ທ່ານ​ອາຈານ​ມີ​ນັບ​ແຕ່ “A…ຮອດ Z”. ​ໃນ​ຊີວິດ​​ເກືອບ 70 ປີຜ່ານມາ, 50 ປີ ທ່ານ​ອາຈານ​ໄດ້​ມອບ​ໃຫ້​ສິ່ງ​ທີ່​ຕົ​ນ​ເອງ​ສະຫງວນ​ຮັກ ​ແລະ ມີ​ພອນ​ສະຫວັນ ​ໂດຍ​ບໍ່​ໄດ້​​ເວ​ນາວາ​ຊີວິດ​ໄປ​ທາງ​ໃດ​ເລີຍ. ພິທີ​ເປີດ​ໂຕ​ໃນ​ວັນນັ້ນມີ​ຄົນ​ເຂົ້າຮ່ວມ​ຄັບຄາ​ໜາ​ແໜ້ນ​ນີ້, ລ້ວນ​ແຕ່​ເປັນ​ຄົນ​ຫົວອົກ​ດຽວ​ກັນ ຄື​ສະຫງວນ​ຮັກ​ເລື່ອງ​ສິນ. ຈຸດ​ທີ່​ກິນ​ໃຈ​ຈານ​ແຫຍ່​ທີ່​ສຸດ​ ​ແມ່ນ​ຕ້ອນ​ທີ່​ທ່ານ​ອາຈານ​ບອກ​ວ່າ: ​ໄດ້​ເດີນທາງ​ແບບ​ລຶກລັບ ​ເພື່ອ​ໄປ​ແຕ້ມ​ເງິນ​ກີບ​ທະນາຄານ​ມາ​ປ່ຽນ​ແທນ​ເງິນ​ກີບ​ປົດ​ປ່ອຍ​ໃນ​ປີ 1979. ທ່ານ​ອາຈານ​ຈາກ​ຄອບ​ແບບ​ລຶກລັບ​ບໍ່​ໄດ້​ສັ່ງ​ລາ​ຮອດ​ເມຍ… ​ເວລາ​ໄປ​ບ່ອນ​ແຕ້ມ​ເງິນ​ເປັນ​ເວລາ 3 ​ເດືອນ​ກໍ​ບໍ່​ໄດ້​ສົ່ງ ຈ.ມ ຫາ​ເມຍ ​ເພາະ​ທັງ​ໝົດ​ເປັນ​ເລື່ອງ​ລັບ… ສັດຕູ​ທີ່​ຫວັງ​ປ້ອງ​ຮ້າຍ​ປະ​ເທດ​ພວກ​ເຮົາ​ຕອນ​ນັ້ນຍັງ​ມີ​ກຳລັງ​ແຮງ, ຖ້າ​ພວກ​ມັນ​ຮູ້​ແຜນ​ເລື່ອງ​ຊິ​ປ່ຽນ​ເງິນ ມັນ​ກໍ​ຄົງ​ສໍ່າ​ກັບ​ປ້ອນ​ຊີ້ນ​ເຂົ້າປາກ​ເສືອ (ການ​ປຽບທຽບ​ນີ້​ແມ່ນ​ຂອງ​ອາຈານ​ແຫຍ່​ເອງ). ​ເວົ້າມາ​ຮອດ​ຕອນ​ນີ້, ທ່ານອາຈານ​ອອກປາກ​ຍ້ອງ​ຄູ່​ຊີວິດ​ຂອງ​ທ່ານ​ວ່າ: “​ເມຍ​ເປັນ​ຄົນ​ໜັກ​ແໜ້ນ, ມີ​ຄົນ​ມາ​ຊວນ​ລາວ​ໂຕນ​ຂ້າມ​ຂອງ ​ໂດຍ​ບອກ​ວ່າ​ຜົວ​ເຈົ້າຖືກ​ຈັບ​ແລ້ວ… ບໍ່​ຕ້ອງ​ຄອງ​ເຫັນ​ໜ້າ​ດອກ”. ດີ​ແຕ່​ວ່າ​ເມຍ​ເຮົາ​ລາວ​ບໍ່​ຍອມ​ຟັງ​ຄວາມ​ໃຜ, ມີ​ແຕ່​ຕັ້ງຕໍ່​ລໍຄອຍ​ເຮົາ ​ເຖິງ​ຈະ​ເປັນ​ການ​ລໍຄອຍ​ທີ່​ເລື່ອນ​ລອຍ​ຢູ່​ທ້ອງຟ້າ… ຖ້າ​ລາວ​ໂຕນ​ປະ​ເຮົາ… ກໍ​ບໍ່​ຮູ້​ພວກ​ລູກໆ… ​ໄກ່​ໂອ​ເວີ​ແດນ​ຊິ​ເປັນ​ແນວ​ໃດ ! (ທ່ານ​ອາຈານ​ຢອກ​ວ່າ: ພວກ​ລູກໆ​ຄົງ​ພົບ​ຄວາມ​ຫຍຸ້ງຍາກ ຫລື ບາງ​ຄົນ​ບໍ່​ໄດ້​ເກີດ​ນຳ​ແນ່ນອນ) ​ໄກ່​ໂອ​ເວີ​ແດນ ນັກ​ຮ້ອງ​ຍິງ, ນັກສະ​ແດງ, ພິທີ​ກອນ​ດາວ​ດວງ​ເດັ່ນ​ຄົນ​ໜຶ່ງ​ຂອງ​ວົງ​ການບັນ​ເທີ​ງບ້ານ​ເຮົາ​ແມ່ນ​ລູກ​ສາວ​ຂອງ​ທ່ານ​ອາຈານ.

- lattana 1 - ຊ້າງຕາຍໄວ້ງາ ຄົນຕາຍໄວ້ຄຸນຄ່າ

ບົດ​ນີ້​ຈານ​ແຫຍ່​ບໍ່​ຮູ້​ວ່າ​ຈະ​ມ້ວນທ້າຍ​ແນວ​ໃດ​ດີ ​ເພາະ​ຂຽນ​ໄປ​ກໍ​ເພີນ​ໄປ, ​ແຕ່​ຢາກ​ເວົ້າພຽງ​ວ່າ: ຄົນ​ສິນ, ຄົນ​ຝີ​ມື​ທີ່​ມີ​ວິຊາ​ການ​ໃນ​ຫລາຍ​ສາຂາ​ອາຊີບ​ຂໍ​ໃຫ້​ເອົາ​ຕົວຢ່າງ​ຂອງ​ທ່ານ​ອາຈານ ອາ​ນູ​ໂລມ, ກ່ອນ​ຈາກ​ໂລກ​ນີ້​ໄປ​ຂໍ​ໃຫ້​ມີ​ບົດຮຽນ, ສິ່ງ​ທີ່​ມີ​ຄຸນຄ່າ​ຝາກ​ໄວ້ ​ເຊັ່ນປຶ້ມ​ໂຮມ​ຜົນງານ​ຂອງ​ທ່ານ​ອາຈານ ​ເພາະ​ມີ​ຄະຕິ​ເຕືອນ​ໃຈ​ບູຮານ​ທີ່​ບອກ​ວ່າ: “ຊ້າງ​ຕາຍ​ໄວ້​ງາ ຄົນ​ຕາຍ​ໄວ້​ຄ່າ ໝາ​ຕາຍ​ບໍ່​ມີ​ຫຍັງ​ເຫລືອ​ໄວ້ !”. ບໍ່​ມີ​ຄຳ​ວ່າ: “​ເຂົ້າບຳນານ” ສຳລັບ​ຄອງ​ປາກກາ.

error: Content is protected !!