ລາວຈັດກິດຈະກຳສັກວັກຊີນກັນພະຍາດວໍ້ໃຫ້ສັດລ້ຽງໂດຍບໍ່ເສຍຄ່າ
ວັນທີ 28 ກັນຍານີ້, ກົມພະຍາດຕິດຕໍ່, ກົມລ້ຽງສັດ ແລະ ການປະມົງ, ອົງການອະນາໄມໂລກ, ອົງການສຸຂະພາບສັດໂລກ, ອົງການອາຫານ ແລະ ການກະເສດແຫ່ງສະຫະປະຊາຊາດປະຈຳລາວ ແລະ ພາກສ່ວນກ່ຽວຂ້ອງຕ່າງໆ ໄດ້ຈັດພິທີໂຮມຊຸມນຸມວັນຕ້ານ ແລະ ຄວບຄຸມພະຍາດວໍ້ໂລກ 28 ກັນຍາ, ໂດຍການເຂົ້າຮ່ວມຂອງມວນຊົນເປັນຈຳນວນຫລາຍ.
ທ່ານຮອງກົມພະຍາດຕິດຕໍ່ ມີຄຳເຫັນວ່າ: ພະຍາດວໍ້ ເປັນພະຍາດທີ່ຖືກປະ ປ່ອຍ ແລະ ຂາດການເອົາໃຈໃສ່ຂອງປະຊາຊົນທີ່ທຸກຍາກ, ໃນທົ່ວໂລກຊຶ່ງແຕ່ລະປີ ພະຍາດວໍ້ໄດ້ຂ້າປະຊາຊົນເກືອບ 60 ພັນຄົນ, ການຕາຍສ່ວນໃຫຍ່ແມ່ນເກີດຂຶ້ນຢູ່ເຂດຊົນນະບົດ ແລະ ຜູ້ທຸກຍາກ, ໂດຍສະເພາະເດັກອາຍຸລະຫວ່າງ 5-14 ປີ, ສຳລັບ ສປປ ລາວ ໃນປີ 2011, ມີຜູ້ຖືກສັດກັດ ທັງໝົດ 12.944 ກໍລະນີ, ຊຶ່ງໃນນັ້ນ 91% ແມ່ນຖືກໝາກັດ, ໂດຍມີຜູ້ເສຍຊີວິດ 1 ຄົນ ແລະ ນັບແຕ່ປີ 2012-2016 ມີຜູ້ເສຍຊີວິດສູງເຖິງ 29 ຄົນ. ສຳລັບຜູ້ທີ່ໄດ້ຮັບພະຍາດວໍ້ເຂົ້າສູ່ຮ່າງກາຍ ສາມາດປ້ອງກັນໄດ້, ໂດຍການດູແລທາງດ້ານການແພດທີ່ວ່ອງໄວ ແລະ ເໝາະສົມ, ສິ່ງສຳຄັນຕ້ອງລ້າງບາດແຜດ້ວຍສະບູ ແລະ ນ້ຳປະມານ 15 ນາທີ, ພ້ອມທັງເຂົ້າປິ່ນປົວ ແລະ ປຶກສາສັດຕະວະແພດທັນທີ.
ນອກນີ້ ການໂຄສະນາໃຫ້ປະຊາຊົນນຳເອົາສັດລ້ຽງຂອງຕົນມາສັກວັກຊີນຕ້ອງໃຫ້ປົກຄຸມ 70% ຂອງຈຳນວນສັດລ້ຽງໃນທົ່ວປະເທດ, ເພື່ອເປັນການຕັດວົງຈອນການແຜ່ເຊື້ອຢູ່ໃນສັດລ້ຽງເຫລົ່ານັ້ນ ແລະ ຈະນຳໄປສູ່ຄົນໄດ້ເມື່ອສຳພັດກັນ, ການສັກວັກຊີນ ປ້ອງກັນພະຍາດວໍ້ ແມ່ນຍັງບໍ່ທັນໄດ້ຖືກນຳໃຊ້ແບບທົ່ວເຖິງ, ເນື່ອງຈາກມີຂໍ້ຈຳກັດ ຫລາຍຢ່າງ ເປັນຕົ້ນງົບປະມານ ແລະ ການເຂົ້າເຖິງຍັງຕ່ຳ, ຢູ່ຫລາຍປະເທດກໍພວມເລັ່ງລົງທຶນໃສ່ໂຄງການຄວບຄຸມພະຍາດວໍ້ໃຫ້ມີປະສິດທິຜົນ ແລະ ຍືນຍົງ, ໂດຍການສັກວັກຊີນໃຫ້ສັດລ້ຽງ ແລະ ສັດຈອນຈັດໃຫ້ເປັນປົກກະຕິ, ເພື່ອຫລຸດຜ່ອນການເສຍຊີວິດຂອງຄົນຈາກພະຍາດວໍ້ໄດ້.