ມອບຜູ້ຄ້າ-ຂາຍພາຫະນະ ທີ່ລັກລອບເຂົ້າເມືອງແບບຜິດກົດໝາຍໃຫ້ເຈົ້າໜ້າທີ່ຫວຽດນາມໄປດຳເນີນຄະດີ

ວັນທີ 10 ມັງກອນ 2024, ປກສ ແຂວງສະຫວັນນະເຂດ ໄດ້ສົ່ງ-ມອບຜູ້ຖືກຫາຄະດີຮ່ວມຂະບວນການຄ້າ-ຂາຍພາຫະນະບໍ່ຖືກຕ້ອງ ແລະ ລັກລອບເຂົ້າເມືອງແບບຜິດກົດໝາຍຄື: ທ້າວ ກ່າວຊວນຕູ້ ອາຍຸ 24 ປີ, ເຊື້ອຊາດ ແລະ ສັນຊາດຫວຽດນາມ ໃຫ້ແກ່ເຈົ້າໜ້າທີ່ຕຳຫລວດຫວຽດນາມ ນຳໄປດຳເນີນຄະດີຕາມລະບຽບກົດໝາຍ.

ພັທ ວົງຄຳ ອິນທະບານ ຫົວໜ້າຫ້ອງຕຳຫລວດ ປກສ ແຂວງສະຫວັນນະເຂດໃຫ້ຮູ້ວ່າ: ປັດຈຸບັນ ທ້າວ ກ່າວຊວນຕູ້ ອາໄສ ຢູ່ບ້ານແດນສະຫວັນ ເມືອງເຊໂປນ ແຂວງສະຫວັນນະເຂດ, ຜູ້ກ່ຽວຖືກກັກໂຕ ໃນວັນທີ 29 ທັນວາ 2023 ຜ່ານມາ, ໃນຂໍ້ຫາ ຮ່ວມຂະບວນການຄ້າຂາຍພາຫະນະບໍ່ຖືກຕ້ອງ ແລະ ລັກລອບເຂົ້າເມືອງແບບຜິດກົດໝາຍ.

ນີ້ແມ່ນ ປະຕິບັດຕາມບົດບັນທຶກໃນກອງປະຊຸມປະສານງານຮ່ວມລະຫວ່າງ ປກສ ແຂວງສະຫວັນນະເຂດ ສປປ ລາວ ແລະ ກອງບັນຊາການ ຕຳຫລວດແຂວງ ກວາງຈິ ສສ ຫວຽດນາມ ໃນກໍລະນີພົນລະເມືອງຂອງຝ່າຍໃດໜຶ່ງຫາກກະທຳຜິດຕ້ອງແຈ້ງໃຫ້ເຈົ້າໜ້າທີ່ອີກຝ່າຍຮັບຮູ້ໃນເວລາອັນເໝາະສົມເພື່ອສືບຕໍ່ດຳເນີນຄະດີຕາມລະບຽບກົດໝາຍ.