ລາວຕ້ອງ​ເລັ່ງ​ແກ້​ໄຂຂໍ້ຄົງຄ້າງເພື່ອສົ່ງ​ເສີມການ​ລົງທຶນໃຫ້ຫລາຍຂຶ້ນ

- Untitled design - ລາວຕ້ອງ​ເລັ່ງ​ແກ້​ໄຂຂໍ້ຄົງຄ້າງເພື່ອສົ່ງ​ເສີມການ​ລົງທຶນໃຫ້ຫລາຍຂຶ້ນ

ຕາມແຫລ່ງຂ່າວ (ຂປລ) ໃຫ້ຮູ້ວ່າ: ​ການຈັດ​ຕັ້ງ​ປະຕິບັດນະ​ໂຍບາຍ​ສົ່ງ​ເສີມ ​ແລະ ຄຸ້ມ​ຄອງ​ການ​ລົງທຶນ​ໃນ​ຜ່ານ​ມາເຫັນວ່າ​ມີ​ຜົນສຳ​ເລັດໜ້າພໍໃຈ, ​ເຊິ່ງ​ໄດ້​ປະກອບສ່ວນ​ສໍາຄັນເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ​ໃຫ້ຂະຫຍາຍຕົວ​ເປັນ​ກ້າວໆ​ມາ. ຂະນະດຽວກັນກໍ​ຍັງມີ​ຂໍ້ຄົງຄ້າງ​ຈຳນວນໜຶ່ງທີ່​ຈະ​ຕ້ອງໄດ້​ແກ້​ໄຂ​ເປັນ​ຕົ້ນ: ການ​ພິຈາລະນາ​ອະນຸມັດ​ໂຄງການ​ໃຫ້​ແກ່​ຜູ້​ລົງທຶນຍັງ​ບໍ່​​ເປັນໄປ​ຕາມ​ກຳນົດ​ເວລາ, ​ຍ້ອນ​ຄວາມ​ບໍ່​ເຂັ້ມ​ແຂງ​ໃນ​ການ​ປະຕິບັດ​ລະບຽບຫລັກການ ​ແລະ ຂອດ​ປະສານ​ງານຍັງ​ບໍ່ທັນ​ມີ​ປະສິດທິພາບ​​ເທົ່າ​ທີ່​ຄວນ, ​ໃນ​ບາງ​ກໍລະນີ​ຂອງ​ຂອດ​ການ​ລົງທຶນຍັງ​ຈຳ​ເປັນ​ຕ້ອງ​ຂໍ​ຄຳ​ເຫັນ​ຄືນ​ຫລາຍ​ຄັ້ງ​ເຮັດ​ໃຫ້​ເສຍ​ເວລາ ​ແລະ ສົ່ງ​ຜົນ​ໃຫ້ການຂໍ​ອະນຸຍາດ​ລົງທຶນຊັກ​ຊ້າ.

ທ່ານລັດຖະມົນຕີ​ກະຊວງ​ແຜນການ ​ແລະ ການ​ລົງທຶນ ສຸພັນ ​ແກ້ວ​ມີ​ໄຊ ໄດ້ຊີ້​ໃຫ້​ເຫັນ​ບາງ​ຂໍ້​ຄົງ​ຄ້າງຂອງ​ການ​ລົງທຶນ, ​ໂດຍ​ສະ​ເພາະ​ຢູ່​ໃນ​ເຂດ​ເສດຖະກິດ​ສະ​ເພາະ (ຂພສ) ​ເຖິງ​ວ່າ​ລັດຖະບານ​​ມີ​ນະ​ໂຍບາຍ​ສົ່ງ​ເສີມ​ທີ່​ດີ, ​ແຕ່ໃນ​ດ້ານ​ນິຕິ​ກຳຍັງ​ບໍ່ທັນຮັດກຸມ, ​ເຮັດ​ໃຫ້ການ​ປະຕິບັດ​ຕົວ​ຈິງ​ພົບ​ຄວາມ​ຫຍຸ້ງຍາກ ​ເປັນ​ຕົ້ນ​ແມ່ນ​ການ​ດຶງ​ດູດ​ການ​ລົງທຶນ ​ແລະ ການ​ສ້າງ​ຄວາມ​ເຊື່ອໝັ້ນ​ໃຫ້​ແກ່​ນັກ​ລົງທຶນ​ລາຍ​ໃຫຍ່ທີ່​ຈະ​ຕັດສິນ​ໃຈ​ເຂົ້າ​ມາ​ລົງທຶນ​ໃນ ຂພສ ​ເພາະ​ມີ​ການ​ປຽບທຽບດ້ານ​ນິຕິ​ກຳ, ການ​ແຂ່ງຂັນ ​ແລະ ເງື່ອນ​ໄຂ​ຕ່າງໆກັບປະ​ເທດ​ເພື່ອນ​ບ້ານ. ນອກນີ້, ການ​ສ້າງ​ວຽກ​ເຮັດ​ງານ​ທຳ​ເພື່ອ​ສະໜອງ​​ໃຫ້ ຂພສ ຍັງ​ປະຕິບັດ​ບໍ່ທັນ​ໄດ້​ດີຍ້ອນ​ລະດັບ​ສີມື​ແຮງ​ງານພາຍໃນຍັງຢູ່​ໃນ​ລະດັບ​ຕ່ຳ.

ສຳລັບ​ການ​ບໍລິການ​ຜ່ານ​ປະຕູ​ດຽວກັບກໍຍັງ​ປະຕິບັດ​ບໍ່ທັນ​ໄດ້​ດີ ​ເປັນ​ຕົ້ນ: ການ​ອອກ​ບັດ​ແຮງ​ງານ, ການ​ຂໍ​ວິຊາ​ເຂົ້າ-​ອອກ​ຫລາຍ​ເທື່ອ, ການ​ນຳ​ເຂົ້າ​-ສົ່ງ​ອອກ​ສິນຄ້າ, ລວມທັງການ​ອອກ​ໃບ​ຢັ້ງຢືນ​ອະສັງຫາລິມະ​ຊັບ ​ແລະ ອື່ນໆ ​ເນື່ອງ​ຈາກ​ເປັນວຽກທີ່​ພົວພັນ​ກັບ​ຫລາຍ​ຂະ​ແໜງການ ​ແລະ ອັດຕາ​ສ່ວນ​ຂອງ​ແຮງ​ງານ​ລາວ​ຢູ່​ແຕ່​ລະ​ບ່ອນຍັງ​ມີໜ້ອຍ, ນັບ​ທັງ​ບັນຫາ​ສະຫວັດດີ​ການ. ​

- Wave100S AD to Website 2020 0 - ລາວຕ້ອງ​ເລັ່ງ​ແກ້​ໄຂຂໍ້ຄົງຄ້າງເພື່ອສົ່ງ​ເສີມການ​ລົງທຶນໃຫ້ຫລາຍຂຶ້ນ

ທ່ານລັດຖະມົນຕີກະຊວງແຜນການ ແລະ ການລົງທຶນ ກ່າວວ່າ: ໃນ​ໄລຍະ​ຜ່ານ​ມາບັນດາ​ຂະ​ແໜງການ ​ແລະ ທ້ອງ​ຖີ່ນ ຍັງ​ບໍ່ທັນ​ເຂົ້າ​ໃຈ​​ເລິກ​ເຊິ່ງຕໍ່ກົນ​ໄກ​ຄຸ້ມ​ຄອງ​ການ​ລົງທຶນ​ຂອງ​ພາກ​ເອກະ​ຊົນ ​ເປັນ​ຕົ້ນ: ​ຂັ້ນ​ຕອນ​ການ​ອະນຸຍາດ ​ແລະ ການຄຸ້ມ​ຄອງ, ​ເຊິ່ງບໍ່ສອດຄ່ອງ​ກັບ​ກົດໝາຍ. ຕໍ່ກັບ​ບັນຫາ​ນີ້, ຂັ້ນ​ສູນ​ກາງ​​ກໍ​ຍັງ​ບໍ່​ໄດ້​ເອົາ​ໃຈ​ໃສ່​ໃນ​ການ​ສົ່ງ​ມອບ​ໂຄງການ​ໃຫ້​ທ້ອງ​ຖິ່ນຕິດຕາມ​ຢ່າງ​ເປັນ​ທາງ​ການ ແລະ ອີກ​ບັນຫາສໍາຄັນໜຶ່ງ​ແມ່ນ​ການ​ສ້າງ​ກົດໝາຍ ​ແລະ ນິຕິ​ກຳ​ລຸ່ມ​ກົດໝາຍໃນ​ການ​ຄຸ້ມ​ຄອງ ​ແລະ ສົ່ງ​ເສີມ​ການ​ລົງທຶນຍັງ​ບໍ່ທັນ​ພຽງພໍ, ຂະນະ​ທີ່​ກົດໝາຍຮັບຮອງ​ແລ້ວກໍຍັງ​ບໍ່​ໄດ້​ຮັບ​ການ​ເຜີຍ​ແຜ່​ຢ່າງ​ກວ້າງຂວາງ, ການ​ປະຕິບັດ​ສັນຍາ​ຂອງ​ພາກ​ລັດບາງ​ກໍລະນີ​ເຮັດບໍ່ທັນ​ໄດ້​ດີ, ສ່ວນ​ຜູ້​ລົງທຶນ​ເອງກໍ​ຍັງ​ມີ​ການລະ​ເມີດ​ສັນຍາທີ່​ໄດ້​ເຊັນ​ໄວ້​ກັບ​ພາກ​ລັດ, ການ​ຄຸ້ມ​ຄອງ ​ແລະ ຕິດຕາມ​ກວດກາຍັງ​ສັບສົນ ​ແລະ ຍັງ​ບໍ່​ເປັນ​ລະບົບ, ຈຶ່ງ​ບໍ່ສາມາ​ດຮູ້​ໄດ້​ເຖິງ​ການ​ດຳ​ເນີນ​ກິດຈະການ​ໄດ້​ດີ ຫລື ປະສົບ​ບັນຫາ​ຫຍຸ້ງຍາກ ​ເຮັດ​ໃຫ້ການ​ມອບ​ພັນທະບໍ່​ໄດ້​ຮັບ​ຜົນ.

- WhatsApp Image 2020 05 27 at 5 - ລາວຕ້ອງ​ເລັ່ງ​ແກ້​ໄຂຂໍ້ຄົງຄ້າງເພື່ອສົ່ງ​ເສີມການ​ລົງທຶນໃຫ້ຫລາຍຂຶ້ນ
- WhatsApp Image 2020 05 27 at 5 - ລາວຕ້ອງ​ເລັ່ງ​ແກ້​ໄຂຂໍ້ຄົງຄ້າງເພື່ອສົ່ງ​ເສີມການ​ລົງທຶນໃຫ້ຫລາຍຂຶ້ນ
error: Alert: ເນື້ອຫາຂ່າວມີລິຂະສິດ !!