ປາກິດສະຖານບໍ່ພໍໃຈ ຫລັງການໂຈມຕີຂອງອີຣານ ຂ້າຊີວິດເດັກນ້ອຍ 2 ຄົນ
ທາງການປາກິດສະຖານອອກມາສະແດງຄວາມບໍ່ພໍໃຈ ຫລັງການໂຈມຕີທາງອາກາດຂອງອີຣານໄດ້ຂ້າຊີວິດເດັກນ້ອຍໄປ 2 ຄົນ. ອີກທັງຍັງເຮັດໃຫ້ມີຜູ້ບາດເຈັບອີກ 3 ຄົນ ໂດຍລະບຸວ່າການລະເມີດນ່ານຟ້າຄັ້ງນີ້ເປັນການກະທໍາທີ່ບໍ່ອາດຍອມຮັບໄດ້ ແລະ ໄດ້ເອີ້ນນັກການທູດລະດັບສູງຂອງອີຣານທີ່ປະຈໍາຢູ່ນະຄອນຫລວງອິສລາມາບັດເພື່ອເຂົ້າສອບຖາມກ່ຽວກັບເຫດການດັ່ງກ່າວແລ້ວ.
ວັນທີ 16 ມັງກອນ, ສໍານັກຂ່າວໃນເຄືອຂອງກອງທັບອີຣານເປີດເຜີຍວ່າ: ກອງກໍາລັງອີຣານໄດ້ປະຕິບັດການໂຈມຕີທາງອາກາດຕໍ່ປາກິດສະຖານ ໂດຍຕັ້ງເປົ້າໃສ່ຖານທີ່ໝັ້ນ 2 ແຫ່ງທີ່ເຊື່ອມໂຍງກັບກຸ່ມຕິດອາວຸດ Jaish al Adl ເຊິ່ງໃນປະຕິບັດການຄັ້ງນີ້ມີການໃຊ້ໂດຣນ ແລະ ມິສໄຊໂຈມຕີນໍາ.
ເຫດການດັ່ງກ່າວໄດ້ສ້າງຄວາມບໍ່ພໍໃຈໃຫ້ແກ່ປາກິດສະຖານ ໂດຍຖະແຫລງການຈາກກະຊວງການຕ່າງປະເທດປາກິດສະຖານໃນວັນທີ 17 ມັງກອນ ລະບຸວ່າ: ການລະເມີດອະທິປະໄຕຂອງປາກິດສະຖານເປັນສິ່ງທີ່ບໍ່ອາດຍອມຮັບໄດ້ ແລະ ອາດສົ່ງຜົນຮ້າຍແຮງຕາມມາ, ການໂຈມຕີທີ່ເກີດຂຶ້ນເຮັດໃຫ້ມີເດັກນ້ອຍຜູ້ບໍລິສຸດເສຍຊີວິດ 2 ຄົນ. ອີກທັງຍັງມີເດັກນ້ອຍບາດເຈັບອີກ 3 ຄົນ.
ລາຍງານລະບຸວ່າ: ກຸ່ມຕິດອາວຸດ Jaish al Adl ຫລື ກອງທັບແຫ່ງຄວາມຍຸຕິທໍາ ໄດ້ກໍ່ເຫດໂຈມຕີເຈົ້າໜ້າທີ່ຊາຍແດນຂອງອີຣານຢ່າງຮຸນແຮງມາແຕ່ປີ 2013. ອີກທັງຍັງເຄີຍອ້າງວ່າເປັນຜູ້ຢູ່ເບື້ອງຫລັງເຫດລະເບີດ ແລະ ລັກພາຕົວຕໍາຫລວດລາດຕະເວນຊາຍແດນຂອງອີຣານຫລາຍຄັ້ງ.
ອ້າງອີງ:
- https://www.bbc.com/news/world-asia-67999465
- https://www.aljazeera.com/news/2024/1/17/pakistan-says-two-children-killed-in-completely-unacceptable-iran-attack
- https://abcnews.go.com/US/wireStory/pakistan-iran-strikes-killed-innocent-children-calls-attack-106423521
