ນາຍົກ ເນັ້ນໃຫ້ຕິດຕາມກວດກາຄືນໂຄງການເຊົ່າ ແລະ ສຳປະທານທີ່ດິນຂອງລັດ ສ່ວນໂຄງການທີ່ບໍ່ມີປະສິດທິຜົນກໍຕ້ອງໃຫ້ຢຸດເຊົາ ຫລື ຍົກເລີກ

ວັນທີ 17 ມັງກອນ 2024, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໂອ້ລົມຢູ່ກອງປະຊຸມສະຫລຸບວຽກງານຂອງຂະແໜງຊັບພະຍາກອນທໍາມະຊາດ ແລະ ສິ່ງແວດ ລ້ອມ (ກຊສ) ປະຈຳປີ 2023 ແລະ ທິດທາງແຜນການ ປະຈຳປີ 2024 ໂດຍທີ່ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍ ແລະ ເນັ້ນໃຫ້ກະຊວງ ກຊສ ເອົາໃຈໃສ່ໃນວຽກງານໃຫ້ມີຜົນສຳເລັດຍິ່ງຂຶ້ນ, ເປັນຕົ້ນການຂຶ້ນທະບຽນອອກໃບຕາດິນໃນຂອບເຂດທົ່ວປະເທດ ເຖິງແມ່ນວ່າໃນໄລຍະຜ່ານມາຂະແໜງການດັ່ງກ່າວຈະຄວາມເອົາໃຈໃສ່ຕໍ່ການຈັດຕັ້ງປະຕິບັດວຽກງານດັ່ງກ່າວ ແຕ່ຖ້າທຽບໃສ່ຕົວເລກຄາດໝາຍ ເຫັນວ່າປັດຈຸບັນຍັງສາມາດປະຕິບັດໄດ້ພຽງເຄິ່ງໜຶ່ງຂອງແຜນການ ພ້ອມດຽວກັນນັ້ນການດຳເນີນຂະບວນການມອບສິດໃນຂະແໜງການກ່ຽວຂ້ອງ ກໍຄື ຂັ້ນເມືອງໃນຂອບເຂດທົ່ວປະເທດຕາມທີ່ໄດ້ກຳນົດໄວ້ໃນກົດໝາຍທີ່ດິນກໍຍັງເຫັນວ່າມີບາງດ້ານບໍ່ທັນປະຕິບັດໄດ້ສຳເລັດ ຕາມຄວາມຄາດໝາຍ
ສະນັ້ນ, ຕ້ອງໄດ້ເພີ່ມທະວີໃຫ້ເຂັ້ມແຂງຫຼາຍຂຶ້ນ; ດ້ານການສຳຫຼວດ ແລະ ການຕິດຕາມກວດກາໂຄງການເຊົ່າ ແລະ ສຳປະທານທີ່ດິນຂອງລັດທີ່ຍັງບໍ່ທັນເຂັ້ມງວດໃຫ້ມີການຕິດຕາມກວດກາຄືນ ໃຫ້ຖືກລະບຽບ, ພ້ອມດຽວກັນນີ້ ໂຄງການທີ່ບໍ່ມີປະສິດທິຜົນກໍຕ້ອງໃຫ້ຢຸດເຊົາ ຫຼື ຍົກເລີກ ສ່ວນໂຄງການໃດທີ່ເຮັດໄດ້ດີກໍຕ້ອງຊຸກຍູ້ສົ່ງເສີມໃຫ້ສອດຄ່ອງຕາມຕົວຈິງ ການຈັດສັນປະເພດທີ່ດິນທີ່ໄດ້ກຳນົດໄວ້ໃນກົດໝາຍ ເຖິງແມ່ນວ່າຜ່ານມາໄດ້ສຳເລັດການສ້າງແຜນການຈັດສັນທີ່ດິນແລ້ວກໍຕາມ ໃນຕໍ່ໜ້າກໍຕ້ອງໃຫ້ມີການຈັດສັນໃຫ້ຖືກລະບຽບຫຼາຍຂຶ້ນຕື່ມ,
ເພີ່ມທະວີຄວາມເອົາໃຈໃສ່ໃນການປະຕິບັດການຫັນເປັນທັນສະໄໝໃນຂົງເຂດທີ່ດິນ ເອົາໃຈໃສ່ສ້າງຖານຂໍ້ມູນໃຫ້ຄວາມທັນສະໄໝ ແລະ ຄົບຖ້ວນ ເພື່ອນຳໄປນຳໃຊ້ເຂົ້າໃນວຽກງານຕົວຈິງໃຫ້ທຸກຄົນຕື່ມຕົວປະບັດພັນທະເສຍພາສີທີ່ດິນຂອງຕົນຢ່າງຖືກຕ້ອງ, ສຳລັບການຈັດຕັ້ງປະຕິບັດວຽກງານຄຸ້ມຄອງສິ່ງແວດລ້ອມ ກໍຕ້ອງໄດ້ເພີ່ມທະວີເອົາໃຈໃສ່ໃຫ້ມີຄວາມເຂັ້ມແຂງ ເປັນເຈົ້າການຕິດຕາມກວດ ກາບັນດາໂຄງການ ບໍ່ໃຫ້ມີຜົນກະທົບຕໍ່ສິ່ງແວດລ້ອມ ໂດຍສະເພາະຢູ່ບັນດາແຂວງເປົ້າໝາຍທີ່ມີການຂຸດຄົ້ນແຮ່ ຕ້ອງໄດ້ເອົາໃຈໃສ່ຢ່າງຈິງຈັງໃຫ້ໄປຄຽງຄູ່ກັບການປົກປັກຮັກສາສິ່ງແວດລ້ອມຕາມທິດສີຂຽວ ແລະ ຍືນຍົງເທື່ອລະກ້າວ.