ລົງກວດກາສະຖານທີ່ ກໍ່ສ້າງໂຮງໝໍຫລັງໃໝ່ ຢູ່ສາລະວັນ ເພື່ອສະເໜີລັດຖະບານສະໜອງທຶນໃຫ້ 34 ກວ່າລ້ານໂດລາ

ວັນທີ 3 ກຸມພາ 2024, ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ, ເຮັດວຽກ ແລະ ພົບປະໂອ້ລົມພະນັກງານຫຼັກແຫຼ່ງໃນຂົງເຂດສາທາລະນະສຸກ ຢູ່ແຂວງສາລະວັນໃນການປະຕິບັດໜ້າທີ່, ຄວາມຮັບຜິດຊອບໃນການບໍລິການປີ່ນປົວ, ຮັກສາສຸຂະພາບຂອງປະຊາຊົນ, ຂອດການຈັດຕັ້ງປະຕິບັດວຽກງານອື່ນໆ, ພ້ອມທັງສຶກສາຄວາມເປັນໄປໄດ້ທີ່ຈະກໍ່ສ້າງໂຮງໝໍ ຫຼັງໃໝ່ ຢູ່ແຂວງສາລະວັນ ແລະ ເບີ່ງສະຖານທີ່ຕົວຈິງໃນການກໍ່ສ້າງ, ເພື່ອສະໜອງຂໍ້ມູນອັນລະອຽດໃຫ້ລັດຖະບານ ທີ່ຈະສະໜອງທຶນຫຼາຍກວ່າ 34 ລ້ານໂດລາສະຫະລັດໃນການກໍ່ສ້າງ ເພື່ອຮອງຮັບໃຫ້ແກ່ການພັດທະນາເສດຖະກິດ-ສັງຄົມ ກໍຄືການແກ້ໄຂປີ່ນປົວ, ຮັກສາສຸຂະພາບຂອງປະຊາຊົນ ຢູ່ແຂວງສາລະວັນ, ໃນຕໍ່ໜ້າ ຈະກາຍເປັນໂຮງໝໍ ທີ່ທັນສະໄໝ, ນຳໃຊ້ອຸປະກອນ, ເຄື່ອງມືການແພດຄົບຊຸດ ກ້າວໄປສູ່ຄຸນນະພາບທີ່ດີຂຶ້ນ.

ນອກນັ້ນກໍໄດ້ແລກປ່ຽນ ກັບ ອົງການປົກຄອງແຂວງສາລະວັນ ກ່ຽວກັບການສ້າງບຸກຄະລາກອນແພດໝໍ, ການຊ່ວຍຊຸກຍູ້ ແລະ ສົ່ງເສີມການສ້າງພະນັກງານແພດໝໍໃຫ້ກາຍເປັນຊ່ຽວຊານ, ຮັກສາຊ່ຽວຊານທີ່ມີຢູ່ແລ້ວ ສຸມໃສ່ການຄົ້ນຄວ້າປີ່ນປົວ ໃຫ້ຫຼາຍ ຈະກາຍເປັນທ່າແຮງໜຶ່ງເຮັດໃຫ້ວຽກງານສາທາລະນະສຸກ ໃຫ້ເຂັ້ມແຂງ ແລະ ມີຄຸນນະພາບ.