ອາເມລິກາມີແຜນຂັບໄລ່ ນັກການທູດກູບາຄັ້ງໃຫຍ່
ລັດຖະບານວໍຊິງຕັນກຽມເນລະເທດເຈົ້າໜ້າທີ່ການທູດກູບາປະຈຳອາເມລິກາປະມານ 60% ເພື່ອຕອບໂຕ້ກໍລະນີທີ່ນັກການທູດຊາວອາເມລິກາປະຈຳນະຄອນຫຼວງຮາວານາຫລາຍກວ່າ 20 ຄົນ ບໍ່ສະບາຍຈາກອາການທີ່ຍັງເປັນປິດສະໜາ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 2 ຕຸລາ ໂດຍອ້າງຈາກລາຍງານຂອງສຳນັກຂ່າວ AP ແລະ ຣອຍເຕີ ລວມທັງໜັງສືພິມເດິໄມອາມີ ເຮຣັດ ວ່າ: ປະທານາທິບໍດີ ໂດນັນ ທຣຳ ຕ້ອງການໃຫ້ລັດຖະບານກູບາຫລຸດຈຳນວນເຈົ້າໜ້າທີ່ການທູດຢູ່ອາເມລິກາລົງ 2 ໃນ 3 ຂອງຈຳນວນໃນປັດຈຸບັນ ເພື່ອຕອບໂຕ້ “ການໂຈມຕີຈຳເພາະ” ທີ່ເກີດຂຶ້ນກັບເຈົ້າໜ້າທີ່ການທູດຂອງອາເມລິກາຢູ່ກູບາຢ່າງໜ້ອຍ 21 ຄົນ ນັບແຕ່ທ້າຍປີຜ່ານມາ ໂດຍເປັນອາການປ່ວຍທີ່ສົ່ງຜົນກະທົບຕໍ່ລະບົບປະສາດເຖິງຂັ້ນສູນເສຍການໄດ້ຍິນ, ການຊົງຕົວ ແລະ ການແນມເຫັນ.
ທັງນີ້, ສຳນັກຂ່າວທັງສາມແຫ່ງຕີລາຄາສະຖານະການໄປໃນທາງດຽວກັນວ່າ: ກະຊວງການຕ່າງປະເທດຢູ່ນະຄອນຫລວງວໍຊິງຕັນອາດຈະອອກຖະແຫລງການກ່ຽວກັບເລື່ອງດັ່ງກ່າວພາຍໃນອາທິດນີ້, ພາຍຫລັງທ່ານ ເຣັກ ທິລເລີສັນ ລັດຖະມົນຕີກະຊວງການຕ່າງປະເທດ ພົບປະຫາລືກັບຜູ້ນຳອາເມລິກາ ໃນວັນທີ 2 ກັນຍາ ໂດຍທ່ານ ທິລເລີສັນ ກ່າວໃນເດືອນຜ່ານມາວ່າ: ລັດຖະບານວໍຊິງຕັນອາດປິດສະຖານເອກອັກຄະລັດຖະທູດປະຈຳນະຄອນຫລວງຮາວານາ ທັງທີ່ຫາກໍເປີດໄດ້ພຽງ 2 ປີເທົ່ານັ້ນ.
ໃນອາທິດຜ່ານມາ, ກະຊວງການຕ່າງປະເທດອາເມລິກາຫລຸດຈຳນວນນັກການທູດປະຈຳນະຄອນຫລວງຮາວານາລົງຫລາຍກວ່າເຄິ່ງໜຶ່ງ ເຫລືອພຽງປະມານ 20 ທ່ານເທົ່ານັ້ນ, ພ້ອມທັງອອກປະກາດເຕືອນໄພພົນລະເມືອງໃຫ້ເພີ່ມຄວາມລະມັດລະວັງໃນການທ່ອງທ່ຽວຢູ່ກູບາ, ສ່ວນກະຊວງການຕ່າງປະເທດກູບາ ແລະ ສະຖານເອກອັກຄະລັດຖະທູດກູບາປະຈຳນະຄອນຫລວງວໍຊິງຕັນຍັງຮັກສາທ່າທີຕໍ່ລາຍງານດັ່ງກ່າວ, ແຕ່ການເຄື່ອນໄຫວຄັ້ງນີ້ຍ່ອມສົ່ງຜົນກະທົບຕໍ່ການພົວພັນລະຫວ່າງສອງປະເທດ ທີ່ຫາກໍເລີ່ມຟື້ນຟູຢ່າງເປັນທາງການໃນເດືອນທັນວາ 2014 ຕາມຂໍ້ຕົກລົງລະຫວ່າງອະດີດປະທານາທິບໍດີ ບາຣັກ ໂອບາມາ ຜູ້ນຳອາເມລິກາ ກັບປະທານາທິບໍດີ ຣາອູລ ກາສໂຕຣ ຜູ້ນຳກູບາ ຄົນປັດຈຸບັນ.
