ລາວ ສະເໜີໃຫ້ລຸກຊຳບວກ ຮ່ວມມືດ້ານການເງິນດິຈິຕອລ ເພື່ອອຳນວຍຄວາມສະດວກໃຫ້ແກ່ການດຳເນີນທຸລະກິດໃນຕໍ່ໜ້າ

ຕອບສະໜອງຕາມການເຊື້ອເຊີນຂອງ ທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ ຊາວີເອ ເບັດແຕນລ໌ (Xavier BETTEL), ຮອງນາຍົກລັດ ຖະມົນຕີ, ລັດຖະມົນຕີກະຊວງການຕ່າງປະເທດ ແລະ ການຄ້າຕ່າງປະ ເທດ ແລະ ລັດຖະມົນຕີຮ່ວມມືເພື່ອການພັດທະນາ ແລະ ວຽກງານມະນຸດສະທຳ ແຫ່ງ ຣາຊະອານາຈັກ ລຸກຊໍາບວກ ໄດ້ນຳພາຄະນະມາຢ້ຽມຢາມເຮັດວຽກ ຢູ່ ສປປ ລາວ ໃນວັນທີ 5-9 ກຸມພາ 2024 ເພື່ອສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີມາແຕ່ດົນນານ ລະຫວ່າງ ສປປ ລາວ ແລະ ຣາຊະອານາຈັກ ລຸກຊໍາບວກ.

ການພົບປະສອງຝ່າຍໃນວັນທີ 8 ກຸມພາ 2024, ສອງຝ່າຍເຫັນດີເປັນເອກະພາບ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີຂອງສອງປະເທດ ລາວ ແລະ ລຸກຊຳບວກ ທີ່ໄດ້ສ້າງ ຕັ້ງສາຍພົວພັນການທູດຮ່ວມກັນໃນວັນທີ 25 ກັນຍາ 1997 (ຄົບຮອບ 27 ປີ) ສືບຂະຫຍາຍ ຕົວເປັນ ກ້າວໆມາ, ການພົວພັນຮ່ວມມືຂອງສອງປະເທດ ທາງດ້ານການເມືອງ ແມ່ນໃນລະດັບດີ ແລະ
ເປັນປົກກະຕິ ສະແດງອອກໃນການພົບປະແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຂອງສອງປະເທດ, ເຊິ່ງ ລຸກຊຳບວກ ແມ່ນເປັນຄູ່ຮ່ວມມືພັດທະນາທີ່ດີ ທີ່ໄດ້ຊ່ວຍເຫລືອການພັດທະນາຂອງ ສປປ ລາວ ເຊັ່ນ: ບັນດາໂຄງການຊ່ວຍເຫລືອ ເປັນຕົ້ນ ສາທາລະນະສຸກ, ການສຶກສາການທ່ອງທ່ຽວ , ການໂຮງແຮມ-ການບໍລິການ, ແຮງງານ ແລະ ສະຫວັດດີການສັງຄົມ (ວຽກໄພພິບັດ ແລະ ການເກັບກູ້ລະເບີດບໍ່ທັນແຕກ), ການເງິນ-ການທະນາຄານ, ການພັດທະນາຊົນນະບົດ, ພື້ນຖານໂຄງລ່າງຂອງພາກລັດ ແລະ ການຊ່ວຍເຫລືອສໍາຄັນອື່ນໆ ໂດຍຜ່ານອົງການຈັດຕັ້ງສາກົນ, ສອງຝ່າຍ ຍັງໄດ້ສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ ເປັນຕົ້ນ ສປຊ, ອາຊຽນ ແລະ ອື່ນໆ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ມີໝາກຜົນດີ, ເຊິ່ງໄດ້ປະກອບສ່ວນສຳຄັນເຂົ້າໃນການຍົກລະດັບຊີວິດການເປັນຢູ່ຂອງປະຊາຊົນລາວ

ສອງຝ່າຍ ເຫັນດີສືບຕໍ່ຊຸກຍູ້ສົ່ງເສີມຂະແໜງການກ່ຽວຂ້ອງຂອງສອງປະເທດ ລາວ ແລະ ລຸກຊຳບວກ ໃນການຈັດຕັ້ງປະຕິບັດບັນດາແຜນງານ ແລະ ໂຄງການຮ່ວມມືຂອງສອງລັດຖະບານ ໃນດ້ານຕ່າງໆໃຫ້ສໍາເລັດຜົນຕາມຄາດໝາຍ, ຊຸກຍູ້ໃຫ້ມີການພົບປະແລກປ່ຽນກັນຫລາຍຂຶ້ນ ລະຫວ່າງຄະນະຜູ້ແທນສອງປະເທດໃນຕໍ່ໜ້າ. ເຫັນດີໃຫ້ມີການແລກປ່ຽນ ແລະ ສ້າງຂີດຄວາມສາມາດດ້ານຊັບພະ ຍາກອນມະນຸດ ລົງເລິກດ້ານວິຊາສະເພາະໃຫ້ພະນັກງານວິຊາການໃຫ້ມີຄຸນນະພາບສູງ ເພື່ອເຊື່ອມຕໍ່ການຄ້າໃນພາກພື້ນ ແລະ ສາກົນ;
ລັດຖະບານ ລຸກຊຳບວກ ຍິນດີຈະສືບຕໍ່ໃຫ້ການຮ່ວມມື ແລະ ສະໜັບສະໜູນໃນການຊ່ວຍສ້າງຂີດຄວາມສາມາດດ້ານການແພດແກ່ ສປປ ລາວ ໂດຍ ການສົ່ງຊ່ຽວຊານດ້ານການແພດຈາກເອີຣົບ ມາຝຶກອົບຮົມໃຫ້ແກ່ຝ່າຍລາວ, ການຊ່ວຍເຫລືອສະໜອງອຸປະກອນການແພດ, ການກໍ່ສ້າງ-ສ້ອມແປງໂຮງໝໍ ແລະ ອື່ນໆ. ເຫັນດີເປັນເອກະພາບ ຈະຮ່ວມມືກັນຢ່າງໃກ້ຊິດໃນການຊຸກຍູ້ສົ່ງເສີມການຮ່ວມມືໃນຂະແໜງການສຶກສາ ທີ່ຕິດພັນກັບວຽກທ່ອງທ່ຽວ ແລະ ຍຸຕິທຳ, ດ້ານແຮງງານ ແລະ ສະຫວັດດີການສັງຄົມ, ວຽກງານມະນຸດສະທຳ, ການເກັບກູ້ລະເບີດບໍ່ທັນແຕກ, ກະສິກຳ ແລະ ປ່າໄມ້, ສະຖິຕິແຫ່ງຊາດ ແລະ ການທະນາຄານ.

ໂອກາດນີ້ ຝ່າຍລາວ ຍັງໄດ້ສະເໜີໃຫ້ມີການຮ່ວມມືໃນວຽກງານການເງິນດິຈິຕອລ ແລະ ການຊຳລະຜ່ານລະບົບດິຈິຕອລຂອງທະນາຄານ ເພື່ອອຳນວຍຄວາມສະດວກໃຫ້ແກ່ການດຳເນີນທຸລະກິດ, ການຄ້າ ແລະ ການທ່ອງທ່ຽວ ສປປ ລາວ ໃນຕໍ່ໜ້າ, ເຫັນດີເປັນເອກະພາບສືບຕໍ່ໃຫ້ການຮ່ວມມື ແລະ ສະໜັບສະໜູນຊ່ວຍເຫລືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ລວມທັງ ສິ່ງທີ່ສອງຝ່າຍມີຄວາມສົນໃຈຮ່ວມກັນ.