ປາກົດເຫັນ ມີການເກັບເງິນຄ່າລົດທີ່ຈອດຢູ່ແຄມທາງຫລວງບໍລິເວນຕໍ່ໜ້າວັດອົງຕື້

ວັນທີ 12 ກຸມພາ 2024 ນີ້, ມີຜູ້ໃຊ້ລົດໃຊ້ຖະໜົນສ່ອງແສງວ່າ: ຄ່ຳຄືນວັນທີ 11 ກຸມພາ 2024 ຕົນໄດ້ໄປຈອດລົດຢູ່ແຄມທາງບໍລິເວນຕໍ່ໜ້າວັດອົງຕື້ມະຫາວິຫານ ເມືອງຈັນທະບູລີ ນະຄອນຫລວງວຽງຈັນ ໄດ້ມີຊາຍຄົນໜຶ່ງຍ່າງເຂົ້າມາຈົດປີ້ຝາກລົດໃຫ້ມູນຄ່າ 10.000 ກີບຕໍ່ຄັນ ຕົນເກີດມີຄວາມສົງໃສຈຶ່ງໄດ້ຖາມຜູ້ເກັບເງິນວ່າການທີ່ຈອດລົດຢູ່ແຄມທາງຕາມບໍລິເວນນີ້ກໍໄດ້ເກັບເງິນບໍ? ເພາະວ່າມັນເປັນເສັ້ນທາງຫລວງ ບໍ່ແມ່ນບ່ອນຈັດສັນເປັນສະຖານທີ່ຝາກລົດ?. ຜູ້ເກັບເງິນຕອບວ່າ ລົດທຸກຄັນທີ່ມາຈອດຢູ່ບໍລິເວນນີ້ຕ້ອງໄດ້ເສຍເງິນຄ່າຝາກລົດ ເນື່ອງຈາກວ່າທາງຫ້ອງການປົກກຄອງບ້ານວັດຈັນ ແຈ້ງບອກໃຫ້ມາເກັບເງິນນຳລົດທີ່ມາຈອດຕາມແຄມທາງເຂດນີ້. ພ້ອມທັງບອກວ່າ ຖ້າບໍ່ເຊື່ອຊິພາໄປຫ້ອງການເພື່ອຖາມນາຍບ້ານນຳກັນ ແຕ່ຕົນບໍ່ມັກເລື່ອງຈຶ່ງຍອມຈ່າຍເງິນໃຫ້ຜູ້ກ່ຽວໄປ.

ດັ່ງນັ້ນ, ຈຶ່ງຝາກໃຫ້ທາງຫ້ອງການບ້ານທີ່ຖືກຜູ້ກ່ຽວແອບອ້າງ ຊ່ວຍຊີ້ແຈງ ວ່າການຈັດຕັ້ງເກັບເງິນນຳຜູ້ໃຊ້ລົດໃຊ້ຖະໜົນຢູ່ເຂດດັ່ງກ່າວນັ້ນແມ່ນການປະຕິບັດຕາມຄຳສັ່ງຂອງບ້ານແທ້ຫລືບໍ່? ຍ້ອນເຫດ ຜົນແນວໃດຈຶ່ງເກັບ? ຖ້າແມ່ນແທ້ຈະດ້ວຍເຫດຜົນອັນໃດກໍ່ເປັນການດີຢ່າງໜ້ອຍກໍ່ເປັນການປະກອບ ສ່ວນຊ່ວຍເຫຼືອສັງຄົມ, ທັງນີ້ກໍເພື່ອບໍ່ໃຫ້ເກີດມີການສວຍໂອກາດເກັບເອົາເງິນຂອງປະຊາຊົນດ້ວຍຮູບການເກັບເງິນຄ່າຝາກລົດທີ່ຈອດຢູ່ຕາມແຄມທາງຕາມລຳພັງໃຈ.