ຜັກຕຳນິນມີຫລາຍສັບພະຄຸນຕ້ານພະຍາດ

ຜັກຕຳນິນມີ 2 ຊະນິດ ຄື : ຜັກຕຳນິນແມ່ ແລະ ຜັກຕຳນິນຜູ້ ເຊິ່ງຜັກຕຳນິນທີ່ເຮົາກິນເປັນປະຈຳແມ່ນຜັກຕຳນິນແມ່ ເພາະໃບງາມກ່ວາຜັກຕຳນິນຜູ້. ສ່ວນຜັກຕຳນິນຜູ້ນັ້ນ ຖ້າຄົນທີ່ມີທາດອ່ອນກິນຫລາຍເປັນປະຈຳ ຈະເຮັດໃຫ້ເຈັບທ້ອງໄດ້. ດັ່ງນັ້ນ ເວລາກິນຕ້ອງລະວັງ ຖ້າເຮົາຈະເກັບຜັກຕຳນິນມາກິນເອງກໍຄວນສັງເກດໃຫ້ດີໆ ຜັກຕຳນິນຜູ້ຈະມີຂະໜາດໃບນ້ອຍ, ດອກເປັນສີຂາວ, ອອກດອກແຕ່ບໍ່ມີໝາກຄືກັບຜັກຕຳນິນແມ່.

ຄຸນຄ່າທາງອາຫານຂອງຜັກຕຳນິນສ່ວນຫລາຍຢູ່ຍອດ ປະລິມານ 100 ກຣາມ ປະກອບດ້ວຍໂປຣຕິນ 3,3 ກຣາມ, ວິຕາມິນເບ 1 ມີ 0,17 ມິນລີກຣາມ, ທາດການຊຽມ 126 ມິນລີກຣາມ, ຟົສຟໍ 30 ມິນລີກຣາມ, ທາດເຫລັກ 4,6 ມິນລີກຣາມ, ໄນອາຊີນ 1,2 ມິນລີກຣາມ, ວິຕາມິນເຊ 13 ມິນລີກຣາມ, ໄຍອາຫານ 2,2 ກຣາມ ແລະ ເບຕ້າແຄໂຣທີນຫລາຍເຖິງ 699,88 ໄມໂຄຣກຣາມຫລາຍກ່ວາໝາກອຶ ແລະ ມັນດ້າງ ເຊິ່ງມີເບຕ້າແຄໂຣທີນ 225 ແລະ 175 ໄມໂຄຣກຣາມຕາມລຳດັບ ຕໍ່ປະລິມານ 100 ກຣາມຄືກັນ.

ຄຸນປະໂຫຍດຂອງຜັກຕຳນິນນັ້ນ ໃບຊ່ວຍດັບພິດຮ້ອນ, ຖອນພິດໄຂ້, ແກ້ໂຕຮ້ອນ, ດັບພິດຝີ, ແກ້ປວດແສບອອກຮ້ອນ, ແກ້ຄັນ. ສ່ວນດອກຜັກຕຳນິນໃຊ້ແກ້ຄັນ, ເອົາແກ່ນມາຕຳປະສົມກັບນຳ້ມັນໝາກພ້າວທາແກ້ພະຍາດຂີ້ຫິດ. ສາມາດເອົານຳ້ຈາກເຄືອຜັກຕຳນິນມາຢອດຕາແກ້ຕາຟາງ, ຕາແດງ, ຕາຊຳ້, ຕາປຽກ, ພິດອັກເສບໃນຕາ, ດັບພິດແກ້ອັກເສບ, ຊົງໃສ່ນຳ້ດື່ມແກ້ອາການວິນຫົວ. ສ່ວນຮາກຜັກຕຳນິນໃຊ້ດັບພິດຕາເປັນຝ້າ, ຫລຸດໄຂ້, ແກ້ອາການປວດຮາກ. ສ່ວນນຳ້ຢາງ, ຕົ້ນ, ໃບ, ຮາກ ໃຊ້ປິ່ນປົວພະຍາດເບົາຫວານໄດ້.

ປິ່ນປົວພະຍາດເບົາຫວານໂດຍໃຊ້ເຄືອແກ່ໆປະມານ 1 ກຳມື ຕົ້ມໃສ່ນຳ້ ຫລື ຄັ້ນເອົານຳ້ຈາກໝາກຕຳນິນດິບ ດື່ມມື້ລະ 2 ເທື່ອ ເຊົ້າ – ແລງ ຈະສາມາດຊ່ວຍຫລຸດນຳ້ຕານໃນເລືອດໄດ້.

ປິ່ນປົວອາການແພ້, ຫລຸດອາການຄັນ, ອາການອັກເສບ, ແມງໄມ້ກັດຕອດ ເຊັ່ນ : ຍຸງກັດ, ມົດກັດ, ແພ້ລະອອງເຂົ້າ ໂດຍເອົາໃບຜັກຕຳນິນສົດ 1 ກຳມື ລ້າງໃຫ້ສະອາດ ແລ້ວຕຳໃຫ້ແຫລວປະສົມນຳ້ໜ້ອຍໜຶ່ງ ແລ້ວຄັ້ນເອົານຳ້ຈາກໃບມາທາບໍລິເວນທີ່ມີອາການ ທາຊຳ້ຫລາຍໆເທື່ອເມື່ອນຳ້ແຫ້ງຈົນກ່ວາອາການຈະເຊົາ.

ຫລຸດອາການຍື່ງທ້ອງ ຄວນກິນຜັກຕຳນິນສົດໆ ເພາະເອັນໄຊໃນຜັກຕຳນິນຈະຍ່ອຍສະຫລາຍງ່າຍເມື່ອຖືກຄວາມຮ້ອນ.

ບາດແຜອັກເສບໃຫ້ໃຊ້ໃບຜັກຕຳນິນດິບຕຳພອກບໍລິເວນທີ່ເປັນ.

ແກ້ຕາຊຳ້ຕາແດງ ເອົາເຄືອເປັນທ່ອນຍາວປະມານ 5 ຊັງຕີແມັດມາບີບໃຫ້ຊຳ້ຈະເກີດຟອງໃຫ້ຢອດຕາ.

ຜິວໜ້າກ້ຽງງາມສົດໃສ ເອົາຍອດຜັກຕຳນິນເຄິ່ງຖ້ວຍນ້ອຍ, ນຳ້ເຜິ້ງເຄິ່ງຖ້ວຍນ້ອຍມາປະສົມກັນແລ້ວປັ່ນຈົນແຫລວພອກໜ້າ ປະໄວ້ 20 ນາທີ ຈຶ່ງລ້າງອອກ.