ທ່ານ ປຣາໂບໂວ ຊູບຽນໂຕ ປະກາດໄຊຊະນະ ກຽມດໍາລົງຕໍາແໜ່ງປະທານາທິບໍດີອິນໂດເນເຊຍຄົນໃໝ່
ທ່ານ ປຣາໂບໂວ ຊູບຽນໂຕ ລັດຖະມົນຕີວ່າກະຊວງການປ້ອງກັນປະເທດອິນໂດເນເຊຍ ອາຍຸ 72 ປີ ປະກາດໄຊຊະນະກຽມດໍາລົງຕໍາແໜ່ງປະທານາທິບໍດີອິນໂດເນເຊຍຄົນໃໝ່ ຫລັງຈາກຜົນການເລືອກຕັ້ງຢ່າງບໍ່ເປັນທາງການຊີ້ວ່າ: ທ່ານ ປຣາໂບໂວ ໄດ້ຄະແນນສຽງເກືອບ 60% ຫລຸດໂອກາດຈະຕ້ອງໄປຕັດສິນໃນການເລືອກຕັ້ງຮອບສອງ (Runoff) ໄດ້ສໍາເລັດ.
ທ່ານ ປຣາໂບໂວ ເນັ້ນວ່າ: “ໄຊຊະນະຄັ້ງນີ້ເປັນໄຊຊະນະຂອງຊາວອິນໂດເນເຊຍທຸກຄົນ”.
ສ່ວນຜົນການເລືອກຕັ້ງຢ່າງເປັນທາງການຄາດວ່າຈະຕ້ອງໃຊ້ໄລຍະເວລາອີກຫລາຍອາທິດ ໂດຍທ່ານ ປຣາໂບໂວ ແລະ ທ່ານ ກິບຣັນ ຣາກາບູມິງ ຣາກາ ລູກຊາຍກົກຂອງທ່ານ ໂຈໂກ ວິໂດໂດ ປະທານາທິບໍດີອິນໂດເນເຊຍຄົນປັດຈຸບັນ ຈະຮ່ວມພິທີສາບານຕົນເຂົ້າຮັບຕໍາແໜ່ງປະທານາທິບໍດີ ແລະ ຮອງປະທານາທິບໍດີຄົນໃໝ່ຂອງອິນໂດເນເຊຍໃນວັນທີ 20 ຕຸລາ 2024.
ໂດຍທ່ານ ປຣາໂບໂວ ຖືເປັນປະທານາທິບໍດີອິນໂດເນເຊຍ ຄົນທີ 3 ຈາກທັງໝົດ 8 ຄົນທີ່ມາຈາກການເລືອກຕັ້ງໂດຍກົງຈາກປະຊາຊົນ ນັບແຕ່ປີ 2004 ຕໍ່ຈາກທ່ານ ຊູຊີໂລ ບໍາບັງ ຢູໂດໂຢໂນ (2004-2014) ແລະ ທ່ານ ໂຈໂກວີ (2014-2024).
ເຖິງຢ່າງໃດກໍຕາມ, ຫລາຍຝ່າຍສະແດງຄວາມກັງວົນວ່າອິນໂດເນເຊຍພາຍໃຕ້ການນໍາຂອງທ່ານ ປຣາໂບໂວ ອາດຖອຍຫລັງກັບໄປສູ່ຍຸກຜະເດັດການອໍານາດນິຍົມອີກ.
ທ່ານ ປຣາໂບໂວ ກ່າວຂອບໃຈປະຊາຊົນສ່ວນຫລາຍທີ່ລົງຄະແນນສຽງໃຫ້ທ່ານ, ພ້ອມຂອບໃຈປະທານາທິບໍດີ ໂຈໂກວີ ທີ່ກໍາລັງຈະໝົດວາລະໃນມໍ່ໆນີ້ສໍາລັບແຮງສະໜັບສະໜູນທາງການເມືອງທີ່ມີໃຫ້ກັນ ໂດຍທ່ານໃຫ້ຄໍາໝັ້ນວ່າຈະສືບຕໍ່ແນວທາງນະໂຍບາຍຂອງທ່ານ ໂຈໂກວີ ຕໍ່ໄປ.
ອ້າງອີງ:
- https://www.bbc.com/news/world-asia-68293800
- https://www.nytimes.com/2024/02/13/world/asia/indonesia-election-jokowi-role.html
- https://www.japantimes.co.jp/news/2024/02/14/asia-pacific/politics/indonesia-presidential-election/
