ກໍາປູເຈຍກວດພົບຜູ້ຕິດເຊື້ອພະຍາດໝາກສຸກລີງຄົນທີ 10

     ວັນທີ 13 ກຸມພາ, ກະຊວງສາທາລະນະສຸກຂອງກໍາປູເຈຍລາຍງານການກວດພົບຜູ້ຕິດເຊື້ອພະຍາດໝາກສຸກລີງເພີ່ມຂຶ້ນ 1 ຂຶ້ນ ເຮັດໃຫ້ຈໍານວນຜູ້ຕິດເຊື້ອພະຍາດດັ່ງກ່າວພາຍໃນປະເທດມີທັງໝົດ 10 ຄົນ ນັບແຕ່ເດືອນທັນວາຜ່ານມາ.

     ລາຍງານລະບຸວ່າ: ຜົນກວດສອບຈາກຫ້ອງປະຕິບັດການຂອງສະຖາບັນສາທາລະນະສຸກແຫ່ງຊາດໃນວັນທີ 12 ກຸມພາ ຢືນຢັນການຕິດເຊື້ອຂອງຜູ້ຕິດເຊື້ອເພດຊາຍຄົນນີ້ ເຊິ່ງອາໄສຢູ່ເຂດດັງເກົາຂອງນະຄອນຫລວງພະນົມເປັນ ແລະ ກໍາລັງຮັບການປິ່ນປົວຢູ່ໂຮງໝໍ.

     ກະຊວງສາທາລະນະສຸກຂອງກໍາປູເຈຍ ລາຍງານອີກວ່າ: ທ່າອ່ຽງການແຜ່ກະຈາຍຂອງເຊື້ອໄວຣັສໝາກສຸກລີງຢູ່ກໍາປູເຈຍເພີ່ມຂຶ້ນ ຈຶ່ງເຕືອນປະຊາຊົນເພີ່ມຄວາມລະມັດລະວັງເປັນພິເສດ.

     ເຊື້ອໄວຣັສໝາກສຸກລີງສາມາດແຜ່ກະຈາຍຈາກຄົນສູ່ຄົນຜ່ານການຕິດຕໍ່ທາງເພດສໍາພັນທຸກຮູບແບບ ລວມທັງຜ່ານການສໍາຜັດໂດຍກົງຈາກບາດແພ, ສານຄັດຫລັ່ງຂອງຮ່າງກາຍ, ນໍ້າລາຍ ແລະ ອຸປະກອນທີ່ປົນເປື້ອນເຊື້ອໄວຣັສນີ້ ຕະຫລອດຈົນແຜ່ເຊື້ອຈາກແມ່ສູ່ລູກຜ່ານສາຍສະດືໃນລະຫວ່າງ ຫລື ຫລັງເກີດ.