ປະຊາຊົນບ້ານບໍ່ສ້ານ ສະເໜີລັດຖະບານຄົ້ນຄວ້າພິຈາລະນາ ປູຢາງ ແຕ່ທາງແຍກບໍ່ແຕນ ຮອດດ່ານປະເພນີເໝືອງແພ່ ແຂວງໄຊຍະບູລີ
ວັນທີ 24 ກຸມພາ 2024, ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ ຮ່ວມກັບ ທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງໄຊຍະບູລີ ແລະ ຄະນະຕິດຕາມ ລົງເຄື່ອນໄຫວພົບປະຢ້ຽມຢາມພໍ່ແມ່ປະຊາຊົນ ບ້ານບໍ່ສ້ານ ເມືອງບໍ່ແຕນ
ໃນໂອກາດດັ່ງກ່າວ ໄດ້ຮັບຟັງການລາຍງານກ່ຽວກັບສະພາບໂດຍຫຍໍ້ຂອງບ້ານ, ການສະເໜີຂໍງົບປະມານຈຳນວນໜຶ່ງ ເພື່ອຂະ ຫຍາຍສາຍນ້ຳລິນ, ບໍາລຸງຮັກສານໍ້າລິນໃຫ້ພຽງພໍຕໍ່ກັບການຊົມໃຊ້ ແລະ ສະເໜີລັດຖະບານ ປູຢາງແຕ່ທາງແຍກບໍ່ແຕນ ຮອດດ່ານປະເພນີເໝືອງແພ່.
ພົທ. ສຸວອນ ເລືອງບຸນມີ ຕາງໜ້າໃຫ້ແກ່ຄະນະປະຈຳສະພາແຫ່ງຊາດ (ຄປຈສພຊ) ສະແດງຄວາມຍ້ອງຍໍຊົມເຊີຍຕໍ່ຄວາມພິລະອາດຫານຂອງພໍ່ແມ່ປະຊາຊົນບ້ານບໍ່ສ້ານ ທີ່ຍາມໃດກໍສະແດງນ້ຳໃຈຮັກຊາດ ຮັກຜືນແຜ່ນດິນລາວແຫ່ງນີ້ ເຊິ່ງເປັນສະໜາມຮົບໃນເມື່ອກ່ອນ. ພ້ອມກັນນີ້, ທ່ານກໍແຈ້ງໃຫ້ຊາບວ່າ ຈະນຳເອົາຄຳສະເໜີຕ່າງໆຂອງພໍ່ແມ່ປະຊາຊົນບ້ານບໍ່ສ້ານ ໄປລາຍງານຕໍ່ ຄະນະປະຈຳສະພາແຫ່ງຊາດ ເພື່ອຊຸກຍູ້ກະຊວງ, ອົງການ, ພະແນກການ ແລະ ຂະແໜງການກ່ຽວຂ້ອງ ຄົ້ນຄວ້າພິຈາລະນາ.
ໃນໂອກາດທີ່ລົງມາຢ້ຽມຢາມພໍ່ແມ່ປະຊາຊົນຄັ້ງນີ້, ທ່ານ ຍັງໄດ້ມອບເງິນສ່ວນຕົວຈຳນວນ 20 ລ້ານກີບ ເພື່ອປະກອບສ່ວນຊື້ອຸປະກອນ ເຮັດເພດານສະໂມສອນບ້ານບໍ່ສ້ານ ອີກດ້ວຍ.
