ສະວີເດັນກຽມເປັນສະມາຊິກໃໝ່ NATO ຫລັງສະພາຮົງກາລີໃຫ້ສັດຕະຍາບັນຮັບຮອງ

      ວັນທີ 26 ກຸມພາ, ລັດຖະສະພາຮົງກາລີມີມະຕິ 188 ຕໍ່ 6 ສຽງ ໃຫ້ສັດຕະຍາບັນຮັບຮອງສະວີເດັນເຂົ້າເປັນສະມາຊິກປະເທດທີ 32 ຂອງອົງການນາໂຕ (NATO) ໂດຍຖືເປັນການຜ່ານອຸປະສັກສຸດທ້າຍໃນການສະໝັກເຂົ້າເປັນສະມາຊິກ NATO ໂດຍທ່ານ ອູລ ຄຣິສເຕີສັນ ນາຍົກລັດຖະມົນຕີສະວີເດັນ ຊີ້ວ່າ: ຖືເປັນ “ວັນປະຫວັດສາດ” ແລະ ເປັນ “ກ້າວສໍາຄັນ” ຂອງສະວີເດັນທີ່ຈະປະຖິ້ມຄວາມເປັນກາງເຊິ່ງຢຶດຖືມາຕະຫລອດ 200 ປີ.

      ສະວີເດັນຍື່ນເຈດຈໍານົງຈະສະໝັກເຂົ້າເປັນສະມາຊິກ NATO ຫລັງຈາກຣັດເຊຍເລີ່ມຮຸກຮານອູແກຣນໃນຕົ້ນປີ 2022 ໂດຍປະເທດຜູ້ສະໝັກຈະຕ້ອງໄດ້ຮັບມະຕິເຫັນພ້ອມຈາກລັດຖະສະພາປະເທດສະມາຊິກເກົ່າທຸກປະເທດ ເຊິ່ງຮົງກາລີຖືເປັນປະເທດສຸດທ້າຍທີ່ໄດ້ລົງມະຕິດັ່ງກ່າວ ຫລັງໃຊ້ເວລາພິຈາລະນາກວ່າ 18 ເດືອນ.

     ທ່ານ ວິກຕໍ ອໍບານ ນາຍົກລັດຖະມົນຕີຮົງກາລີ ຊີ້ແຈງວ່າ: ສຽງວິພາກວິຈານຄວາມເປັນປະຊາທິປະໄຕຢູ່ຮົງກາລີໂດຍບັນດານັກການເມືອງສະວີເດັນໄດ້ບັນທອນການພົວພັນຂອງທັງສອງປະເທດ ແລະ ມີສ່ວນເຮັດໃຫ້ລັດຖະສະພາຮົງກາລີພິຈາລະນາຄໍາຂໍເຂົ້າເປັນສະມາຊິກໃໝ່ NATO ຂອງສະວີເດັນຊັກຊ້າ.

     ໂດຍຜູ້ນໍາທັງສອງປະເທດໄດ້ພົບປະກັນຢູ່ນະຄອນຫລວງບູດາເປສ ຂອງຮົງກາລີ ໃນທ້າຍອາທິດຜ່ານມາ ກ່ອນທັງສອງຈະຮັດແໜ້ນການພົວພັນດ້ານການທະຫານ ລວມທັງຕົກລົງຊື້ຂາຍເຮືອບິນ JAS 39 Gripen ສັນຊາດສະວີເດັນ ຈໍານວນ 4 ລໍາ ເພື່ອເພີ່ມຄວາມແຂງແກ່ນໃຫ້ກອງທັບຮົງກາລີ.

ອ້າງອີງ:

• www.bbc.com/news/world-europe-68405893 
• www.aljazeera.com/news/2024/2/26/hungary-ratifies-swedens-nato-bid-clearing-final-obstacle-to-membership
• https://edition.cnn.com/2024/02/26/europe/sweden-nato-accession-hungary-intl/index.html