ໂຮງຮຽນເປັນເບົ້າຫລໍ່

- IMG 0190 - ໂຮງຮຽນເປັນເບົ້າຫລໍ່
- Untitled design - ໂຮງຮຽນເປັນເບົ້າຫລໍ່

ໂດຍ: ກ້ອງສ່ອງ ອິດສະຫລະ

​​ເຖິງ​ວ່າ​ວັນ​ຄູ​ແຫ່ງ​ຊາດ​ 7 ຕຸລາໄດ້ຜ່ານພົ້ນໄປແລ້ວກໍຕາມ, ແຕ່ບັນຍາກາດແຫ່ງການສະເຫລີມສະຫລອງວັນດັ່ງ​ກ່າວກໍຍັງມີ​ອາຍ​ອຸ່ນ​ ແລະ ​ໂອບ​ເອື້​ອ​ດ້ວຍຄວາມໝາຍ. ບັນດາເຫລົ່າ​ຄູ-ອາຈານ​ເຮົາ​ທັງຫລາຍຕ່າງ​ກໍ​​ດີ​ໃຈ​ທີ່​ພັກ ​ແລະ​ ລັດຖະບານ​ໄດ້​ໃຫ້​ຄວາມ​ສໍາຄັນ​ ໂດຍກໍານົດ​ໃຫ້​ມີ​ວັນ​ຂອງ​ຕົນ​ຂຶ້ນ​ໃນ​ຍຸກສະ​ໄໝ​ນີ້ນັ້ນກໍຄື “ວັນ​ຄູ​ແຫ່ງ​ຊາດ” ໂດຍຖືເອົາວັນດັ່ງກ່າວ, ເຫລົ່າຄູ-ອາຈານທັງຫລາຍຕ່າງກໍໄດ້ມີໂອກາດພັກຜ່ອນຢ່ອນກາຍ, ພົບປະສ້າງສັນສະເຫລີມສະຫລອງວັນຄູໃຫ້ມີບັນຍາກາດ ແລະ ມີຄວາມໝາຍໃນຊີວິດຂອງອາຊີບການເປັນຄູ. ອັນສໍາຄັນແມ່ນໄດ້ພາກັນສໍາຫລວດກວດກາຈຸດດີ, ຈຸດອ່ອນ​ແຫ່ງພາລະກິດຂອງຕົນໃນໜຶ່ງປີທີ່​ຜ່ານມາ ​ເພື່ອ​ເສີມ​ຂະຫຍາຍ​ດ້ານ​ດີ ​ແລະ ປັບປຸງ​ແກ້​ໄຂດ້ານອ່ອນ ແລະ ຄ້າງຄາຕ່າງໆ ແລະ ຈໍາກັດ​ປັດເປົ່າຢ່າງຈິງຈັງ ແລະ ເດັດຂາດ.

ດັ່ງພວກເຮົາຮູ້ນໍາກັນແລ້ວວ່າ, ຄູ-ອາຈານປຽບເໝືອນແມ່ພິມຂອງຊາດ, ໂຮງຮຽນກໍ​ປຽບ​ເໝືອນເບົ້າຫລໍ່ສ້າງຄົນໃຫ້ມີຄວາມຮູ້. ສະນັ້ນ ຈຶ່ງເວົ້າໄດ້ວ່າ, ໂຮງຮຽນກັບຄູ-ອາຈານມັນຕິດພັນ, ມີສາຍກ່ຽວພັນ​ເຊິ່ງ​ກັນ ​ແລະ ກັນທີ່​ບໍ່ສາມາດຕັດແຍກອອກຈາກກັນໄດ້ ຫລື ຖ້າຈະເວົ້າຕາມຫລັກປັດຊະຍາແລ້ວ, ໂຮງຮຽນກັບຄູ-ອາຈານກໍປຽບເໝືອນຄູ່​ມາດຕະ​ເກນ​ທີ່​ຄຽງ​ຄູ່​ກັນ ແລະ ​ຢູ່​ຮ່ວມ​​ກັນໄຕ້​ຮົ່ມ​ສາຍ​ຄາຂອງ​ບໍ່​ບໍາ​ເພັນ​ສ້າງ​ຊັບພະຍາກອນ​ມະນຸດ​ ເພື່ອ​ອອກ​ຮັບ​ໃຊ້​ຊາດ ​ແລະ ​​ສັງຄົມ. ​ບົນ​ພື້ນຖານ​ທີ່​ຕັ້ງ​ພາລະ​ບົດບາດ​ທີ່​​ໄດ້ກ່າວ​ມາ​ຂ້າງ​ເທິງຈຶ່ງ​ເວົ້າ​ໄດ້​ວ່າ, ​ໂຮງຮຽນ ​ແລະ ​ສະ​ຖາ​ບັນ​ການ​ສຶກສາຈຶ່ງ​ມີ​ບົດບາດສໍາຄັນ ​ແລະ​ ມີ​ຄຸນ​ປະ​ໂຫຍ​ດຢ່າງ​​ໃຫຍ່ຫລວງຕໍ່​ຄົນເຮົາທີ່​ເກີດ​ມາ​​ໃນແຕ່ລະ​ຍຸກແຕ່​ລະສະ​​ໄໝ. ​ຄູ-ອາຈານໄດ້​ອອກ​ເຫື່ອ​​ເທ​ແຮງ​ອຸທິດຕົນ​ຖ່າຍ​ເທ​ຄວາມ​ຮູ້ເພື່ອ​ສິດສອນ​ໃຫ້ພວກ​ເຮົາ​ຕັ້ງແຕ່​ນ້ອຍ​ຈົນ​ໃຫຍ່ມີ​ຄວາມຮູ້ຄວາມ​ຫລັກ, ມີວຽກ​ເຮັດ​ງານ​ທໍາ, ມີ​ອາຊີບ​ລ້ຽງ​ປາກ​ລ້ຽງ​ທ້ອງ,​ ເປັນ​ຄົນຮູ້​ຜູ້ດີ,​ ເປັນ​ພະນັກງານ​ຂອງ​ພັກ​ຂອງ​ລັດ, ​ເປັນ​ເຈົ້າ​ເປັນ​ນາຍ ແລະ ເປັນ​ພົນລະ​ເມືອງ​ທີ່ດີ​ຂອງ​ຊາດ​ ກໍ​ແມ່ນ​ຍ້ອນ​ຄູ-ອາຈານ​ທັງ​ນັ້ນ.

ຍ້ອນ​ເຫັນ​ໄດ້​ໄຕ້​ຮົ່ມ​ສາຍ​ຄາ​ຂອງ​ໂຮງຮຽນທີ່​ມີ​ຄຸນ​ປະ​ໂຫຍ​ດຢ່າງ​ລົ້ນເຫລືອ​, ຍາມ​ໃດ​ພັກ ​ແລະ ​ລັດຖະບານ​ເຮົາ​ກໍ​ເຫັນ​ຄວາມ​ສໍາຄັນ ​ແລະ ​ສ້າງ​ກາລະ​ໂອກາດ​ໃຫ້​ເດັກນ້ອຍ​ເຍົາວະ​ຊົນ ​ແລະ ​ຊາວ​ໜຸ່ມ​ໃນ​ແຕ່ລະ​ຍຸກ​ສະ​ໄໝ​ໃຫ້​ກາຍ​ເປັນ​ຜູ້​ສືບ​ທອດ​ພາລະກິດ​ຂອງ​ຊາດ. ທັດສະນະ​ຂອງ​ພັກ​ທີ່​ສະ​ແດງ​ອອກ​ໃນ​ດ້ານ​ທິດ​ສະ​ດີ​ນັ້ນ​ກໍ​ແມ່ນ​ຖື​ເອົາ​ການ​ບຸກທະລຸ​ໃນ​ດ້ານ​ການ​ສ້າງ​ຊັບພະຍາກອນ​ມະນຸດ​ເປັນ​ໜຶ່ງ​ໃນ​​ແຜນ​ພັດທະນາ​ເສດຖະກິດ​-ສັງຄົມຂອງ​ຊາດ. ຢາກ​ບັນລຸ​ຕາມ​ເປົ້າ​ໝາຍ​ທີ່​ຄາດກະ​ໄວ້​ ກ່ອນ​ອື່ນ​ໝົດ​ຕ້ອງ​ວາງ​ນະ​ໂຍບາຍ​ການ​ສຶກສາ​ໄປ​ຕາມ 3 ລັກສະນະ 5 ຫລັກໝູນ​ຂອງ​ລະບົບ​ການ​ສຶກສາ. ນອກ​ນັ້ນ ກໍ​ເລັ່ງກໍ່ສ້າງ​ພື້ນຖານທາງ​ດ້ານ​ວັດຖຸ​ເຕັກນິກ ​ເພື່ອ​ເຮັດ​ໃຫ້ການ​ສຶກສາ​ເດີນ​ແມ່ນ​ແລ່ນ​ສະດວກ ​ເຊິ່ງມາ​ຮອດ​ປັດຈຸບັນໂຮງຮຽນ​ປະຖົມ​ ແລະ​ ມັດທະຍົມ​ໄດ້​ຮັບ​ການ​ກໍ່ສ້າງ​ຂຶ້ນ​ເກືອບ​ທຸກ​ບ້ານ​ ແລະ ​ທຸກ​ເມືອງ​ແມ່ນມີ​ໂຮງຮຽນ​ມັດທະຍົມ​ສົມບູນ​​ເປັນ​ຂອງ​ຕົນ​ເອງ. ນອກຈາກ​ຂະຫຍາຍ​ໂຮງຮຽນ​ຂອງ​ລັດ​ແລ້ວ, ຂອງ​ເອກະ​ຊົນ​ກໍ​ໄດ້​ເຕີບ​ໃຫຍ່​ຢ່າງ​ກວ້າງ​ຂວາງ, ພາບ​ທີ່​ເດັ່ນ​ສຸດ​ແມ່ນ​ຢູ່​ຕາມ​ຕົວ​ເມືອງ​ໃຫຍ່​ໄດ້​ມີ​ໂຮງຮຽນ​ວິທະຍາ​ໄລ, ມະຫາວິທະຍາ​ໄລ​ພາກ​ລັດ ​ແລະ ​ເອກະຊົນ​ເກີດ​ຂຶ້ນຕາມ​ຄວາມ​ຮຽກຮ້ອງ​ຕ້ອງການ​ ກໍ​ຄື​ການ​ຂະຫຍາຍຕົວ​ຂອງ​ສັງຄົມ. ສິ່ງ​ທີ່​ຜູ້​ຂຽນ​ໄດ້​ຍົກ​ຂຶ້ນ​ມາ​ນີ້ ​ແມ່ນ​ຜົນງານສິ້ນ​ໃຫຍ່ໆ ​ພາຍຫລັງ​ທີ່​ປະ​ເທດ​ຊາດ​ຂອງ​ພວກ​ເຮົາ​ໄດ້​ຮັບ​ການ​ປົດ​ປ່ອຍ, ມີ​ເອກະລາດ,​ ປະຊາທິປະ​ໄຕ​ມາ​ໄດ້ 40 ກວ່າປີ​ມາ​ນີ້.

- Wave100S AD to Website 2020 0 - ໂຮງຮຽນເປັນເບົ້າຫລໍ່

​ເຖິງ​ຢ່າ​ງ​ໃດ​ກໍ​ດີ, ຕາມ​ຜູ້​ຂຽນ​ວ່າ​ອີງ​ໃສ່​ຄວາມ​ຮຽກຮ້ອງ​ຕ້ອງການ​ຂອງ​ການ​ພັດທະ​ນາ​ເສດຖະກິດ-ສັງ​ຄົມ​ຂອງ​ປະ​ເທດ​ຊາດໃນ​ໄລຍະ​ປ່ຽນ​ແປງ​ໃໝ່​ພວກ​ເຮົາ​ຕ້ອງ​ເບິ່ງ​ໃນ​ຫລາຍ​ແງ່​ມຸມ ​ແລະ ​ແກ້​ໄຂບັນດາ​ສິ່ງ​ຄ້າງ​ຄາ​ໃນ​ບາງ​ດ້ານ​ ເປັນ​ຕົ້ນຕ້ອງ​ເຮັດ​ໃຫ້​ໂຮງຮຽນ ​ແລະ ​ສະ​ຖາ​ບັນ​ການ​ສຶກສາ​ກາຍ​ເປັນ​ເບົ້າຫລໍ່​ສ້າງ​ຄົນ​ໃຫ້​ເປັນ​ຄົນ​ຢ່າງ​ແທ້ຈິງ, ອັນ​ໂຕ​ທີ​ເປັນ​ບັນຫາຫລັກໆ​ກໍ​ແມ່ນ​ສ້າງ​ຄົນ​ໃຫ້​ເປັນ​ຄົນ​ດີ​ຮຽນ​ເກັ່ງ, ​ເປັນ​ຄົນ​ທີ່​ມີ​ຄຸນສົມບັດ​ທັດສະນະ​ນອບ​ນ້ອມ​ຖ່ອມ​ຕົນ, ​ເປັນ​ຄົນ​​ຮູ້​ບຸນ​ຮູ້​ຄຸນ​ພໍ່​ແມ່​ ແລະ​ ຄູບາ​ອາຈານ. ສ່ວນວ່າ​ມາດຕະຖານ​ຂອງ​ໂຮງຮຽນ​ນັ້ນ​ກໍ​ຕ້ອງ​ແມ່ນ​ໂຮງ​ຮຽນ​ສີຂຽວ, ​ໂຮງຮຽນ​ປອດ​ຢາ​ເສບ​ຕິດ ​ແລະ ​ໂຮງຮຽນຕົວແບບ​ຈຶ່ງ​ຈະ​ສົມ​ກັບ​ວ່າ​ໂຮງຮຽນ​ເປັນ​ເບົ້າ​ຫລໍ່​ຄົນ​ໃຫ້​ມີ​ຄວາມ​ຮູ້.

- WhatsApp Image 2020 05 27 at 5 - ໂຮງຮຽນເປັນເບົ້າຫລໍ່
- WhatsApp Image 2020 05 27 at 5 - ໂຮງຮຽນເປັນເບົ້າຫລໍ່
error: Alert: ເນື້ອຫາຂ່າວມີລິຂະສິດ !!