ມອບສາຍຄໍຄຳ ໜັກ 1 ບາດ ທີ່ພົນລະເມືອງດີເກັບໄດ້ ມາຄືນໃຫ້ເຈົ້າຂອງເດີມ
ວັນທີ 4 ມີນາ 2024 ນີ້, ຢູ່ຫ້ອງການດ່ານ ຕຳຫຼວດກວດຄົນເຂົ້າເມືອງ(ຕມ) ສາກົນ ປາກຊັນ ເຈົ້າໜ້າທີ່ຕຳຫລວດຫ້ອງການດັ່ງກ່າວ ໄດ້ມອບສາຍຄໍຄຳ 1 ເສັ້ນ ໜັກ, 1 ບາດ ຄືນໃຫ້ ນາງ ໃຈ ສີສຸມັງ, ອາຊີບ ເຮັດນາ, ຢູ່ບ້ານ ປາກຊູນ, ເມືອງ ປາກກະດິງ ຜູ່ເປັນເຈົ້າຂອງເດີມ.
ເຈົ້າໜ້າທີ່ຕຳຫລວດດ່ານສາກົນ ປາກຊັນ ໃຫ້ຮູ້ວ່າ: ໃນວັນທີ 2 ມີນາ 2024 ພົນລະເມືອງດີຊື່ ນາງ ແດງ ພະນັກງານ ຊິບປິ່ງ ບໍລິສັດ ວັນຈະເລີນ ໄດ້ເຫັນສາຍຄໍຄ້າຍຄືຄຳ 1 ເສັ້ນ ຕົກເຮ່ຍຢູ່ພື້ນບໍລິເວນຫ້ອງແຈ້ງເອກະສານຄົນເຂົ້າ-ຂາອອກເມືອງ ຂອງດ່ານ ສາກົນ ປາກຊັນ ຈຶ່ງໄດ້ນຳໄປແຈ້ງ ແລະ ມອບ ໃຫ້ເຈົ້າໜ້າທີ່ຕຳຫລວດ ປະຈຳດ່ານເພື່ອປະກາດຫາ ແລະ ມອບຄືນຊັບດັ່ງກ່າວໃຫ້ເຈົ້າຂອງເດີມ;
ມາຮອດວັນທີ 4 ມີນາ 2024 ນາງ ໃຈ ສີສຸມັງ, ອາຊີບ ເຮັດນາ, ຢູ່ບ້ານ ປາກຊູນ, ເມືອງ ປາກກະດິງ, ແຂວງ ບໍລິຄຳໄຊ ໄດ້ນຳເອົາຫລັກຖານມາຢັ້ງຢືນ ແລະ ຮັບເອົາຊັບສີນເດີມຂອງຕົນ ນຳເຈົ້າ ໜ້າທີ່ຕຳຫລວດກວດຄົນເຂົ້າ-ອອກເມືອງດ່ານ ສາກົນປາກຊັນ ໂດຍຊ້ອງໜ້າພົນລະເມືອງດີທີ່ເກັບສາຍຄໍຄຳໄດ້ ພ້ອມສະແດງຄວາມຂອບໃຈ ນາງ ແດງ ຜູ້ທີ່ເກັບສາຍຄໍຄຳຂອງຕົນໄດ້ແລ້ວສົ່ງມອບຄືນໃຫ້ຕົນເອງ.
