ຊູດັງຫວັງເສດຖະກິດຟື້ນ ຫລັງອາເມລິກາຍົກເລີກຂວ້ຳບາດ
ຊູດັງປະເທດໃຫຍ່ອັນດັບສາມຂອງອາຟຣິກາຄາດຫວັງວ່າເສດຖະກິດຈະຟື້ນຕົວ, ພາຍຫລັງອາເມລິກາປະກາດຍົກເລີກມາດຕະການຂວ້ຳບາດເສດຖະກິດນັບແຕ່ວັນທີ 12 ຕຸລາ, ພາຍຫລັງປະກາດໃຊ້ມາແຕ່ປີ 1997 ຂໍ້ຫາສະໜັບສະໜູນກຸ່ມຕິດອາວຸດ.
ສະພາບເສດຖະກິດຢູ່ຊູດັງເຕັມໄປດ້ວຍຄວາມຍາກລຳບາກ, ລັດຖະບານຂາດດຸນການເງິນຊຳເຮື້ອ, ອັດຕາເງິນເຟີ້ສູງເຖິງ 35% ເພາະມາດຕະການຂວ້ຳບາດເສດຖະກິດຂອງອາເມລິກາເຮັດໃຫ້ຊູດັງຖືກຈຳກັດການເຮັດທຸລະກຳການທະນາຄານລະຫວ່າງປະເທດ, ການແລກປ່ຽນເຕັກໂນໂລຊີ ແລະ ຊິ້ນສ່ວນອາໄຫລ່ຕ່າງໆ, ສະຖານະການຮ້າຍແຮງອີກເມື່ອຊູດັງໃຕ້ແຍກຕົວຈາກຊູດັງເໜືອ ໃນປີ 2011, ພາຍຫລັງເຮັດສົງຄາມກາງເມືອງກັນມາຫລາຍປີ ເນື່ອງຈາກຊູດັງໃຕ້ເປັນແຫລ່ງຜະລິດນ້ຳມັນຂອງປະເທດ.
ອາຈານເສດຖະສາດຊາວຊູດັງທ່ານໜຶ່ງຊີ້ວ່າ: ເອີຣົບ ແລະ ບາງປະເທດໃນອາຊີ ແລະ ອາຣັບຂວ້ຳບາດເສດຖະກິດຊູດັງຕາມຮອຍອາເມລິກາ, ການທີ່ອາເມລິກາປະກາດຍົກເລີກຂວ້ຳບາດ ເຖິງວ່າຍັງບໍ່ເປີດເຜີຍໃນລາຍລະອຽດອາດຈະສົ່ງຜົນຫລາຍ ໂດຍສະເພາະເລື່ອງຄົມມະນາຄົມ, ການສຶກສາ ແລະ ສາທາລະນະສຸກ. ເຖິງຢ່າງໃດກໍດີ, ສະເພາະການຍົກເລີກມາດຕະການຂວ້ຳບາດບໍ່ສາມາດເຮັດໃຫ້ເສດຖະກິດຟື້ນຕົວໄດ້ແບບຍືນຍົງ, ລັດຖະບານຊູດັງຕ້ອງດຳເນີນມາດຕະການຂະໜາດໃຫຍ່ ທັງຫລຸດລາຍຈ່າຍ, ກວາດລ້າງການສໍ້ລາດບັງຫລວງ ແລະ ປັບປຸງສະພາບແວດລ້ອມ ເພື່ອເອື້ອອຳນວຍຕໍ່ການລົງທຶນ.
