ປກສ ເມືອງໂຂງ ສຶກສາອົບຮົມໄວໜຸ່ມ 12 ຄົນ ທີ່ສ້າງເປັນກຸ່ມແກ້ງກວນເມືອງ ແລະ ມົ້ວສຸມດື່ມນ້ຳກະທ່ອມ
March 5, 2024 - 2:15 PM
ວັນທີ 4 ມີນາ 2024, ຫ້ອງການກຸ່ມກະດັນ ກອງບັນຊາການ ປກສ ເມືອງໂຂງ ແຂວງຈຳປາສັກ ສຶກສາອົບຮົມໄວໜຸ່ມ 12 ຄົນ ທີ່ສ້າງເປັນກຸ່ມແກ້ງກວນເມືອງ ນັກເລງອັນທະພານ ແລະ ມົ້ວສຸມດື່ມນ້ຳກະທ່ອມ ດ້ວຍການໃຫ້ພວກກ່ຽວເຊັນບົດບັນທຶກ, ຈໍ້າໂປ້ ແລ້ວ ຜ່ານບົດບັນທຶກ ຕໍ່ໜ້າອໍານາດການປົກຄອງ ເພື່ອປະຕິຍານຕົນຈະບໍ່ກັບໄປພົວພັນກັບສິ່ງເສບຕິດອີກ ແລະ ໄດ້ມອບໃຫ້ອໍານາດການປົກຄອງບ້ານ ກໍຄື ພໍ່-ແມ່ ຜູ້ປົກຄອງເປັນຜູ້ສືບຕໍ່ສຶກສາອົບຮົມ ແລະ ຕິດຕາມການເຄື່ອນໄຫວຂອງລູກຫຼານ ກໍຄືກຸ່ມເປົ້າໝາຍຕໍ່ໄປ.
ທັງນີ້, ເພື່ອໃຫ້ເຂົາເຈົ້າຮັບຮູ້ເຖິງຜົນຮ້າຍ ຂອງຢາເສບຕິດ ສ້າງຄວາມສັບສົນວຸ້ນວາຍໃນສັງຄົມ ພາຍຫຼັງສຶກສາອົບຮົມ, ກ່າວເຕືອນ ແລະ ຂຽນບົດບັນທຶກກັບກຸ່ມເປົ້າໝາຍດັ່ງກ່າວແລ້ວ, ຖ້າວ່າພວກກ່ຽວຍັງບໍ່ຢຸດເຊົາພົວພັນກັບສິ່ງທີ່ຜິດ ແລະ ເຄື່ອນໄຫວກໍຄວາມບໍ່ສະຫງົບຄືເກົ່າ ແມ່ນຈະໄດ້ປະຕິບັດຕາມລະບຽບກົດໝາຍຢ່າງເຂັ້ມງວດ.
