ອາເມລິກາ-ອີຢູ ຫາລືການ ຂວ້ຳບາດກອງທັບມຽນມາ
ແຫລ່ງຂ່າວຕ່າງປະເທດລາຍງານວ່າ: ລັດຖະບານອາເມລິກາ ແລະ ສະຫະພາບເອີຣົບ ອ້າງກຳລັງມີການຫາລື ເພື່ອກຽມຂວ້ຳບາດທາງເສດຖະກິດຕໍ່ເຈົ້າໜ້າທີ່ລະດັບສູງໃນກອງທັບມຽນມາ. ຂະນະທີ່ເກີດເຫດເຮືອຜູ້ລີ້ໄພຊາວໂຣຮິນຈາຂວ້ຳລະຫວ່າງຂ້າມແມ່ນ້ຳໄປບັງກະລາເທດ ມີຜູ້ເສຍຊີວິດຢ່າງໜ້ອຍ 12 ຄົນ.
ສຳນັກຂ່າວຕ່າງປະເທດລາຍງານຈາກເມືອງຢາງກຸ້ງ ປະເທດມຽນມາ ໃນວັນທີ 9 ຕຸລາ ໂດຍອ້າງຈາກລາຍງານຂອງສຳນັກຂ່າວຣອຍເຕີ ເຊິ່ງສຳພາດແຫລ່ງຂ່າວດ້ານການທູດທັງຢູ່ນະຄອນຫລວງວໍຊິງຕັນ, ເມືອງຢາງກຸ້ງ ແລະ ຢູ່ເອີຣົບວ່າ: ລັດຖະບານວໍຊິງຕັນ ແລະ ສະຫະພາບເອີຣົບ (EU) ກຳລັງມີກອງປະຊຸມເພື່ອພິຈາລະນາມາດຕະການລົງໂທດເຈົ້າໜ້າທີ່ລະດັບສູງໃນກອງທັບມຽນມາ ເພື່ອຕອບໂຕ້ສະຖານະການດ້ານຄວາມໝັ້ນຄົງ ແລະ ມະນຸດສະທຳເທື່ອຫລ້າສຸດຢູ່ລັດຍະໄຂ່ ທີ່ຍືດເຍື້ອມາແຕ່ທ້າຍເດືອນສິງຫາຜ່ານມາ ແລະ ມີຜູ້ເສຍຊີວິດຫລາຍກວ່າ 500 ຄົນແລ້ວ.
ທັງນີ້ ລັດຖະມົນຕີຕ່າງປະເທດຂອງ EU ມີກຳນົດຈັດກອງປະຊຸມກ່ຽວກັບສະຖານະການລັດຍະໄຂ່ ໃນວັນທີ 16 ຕຸລານີ້ ໂດຍທ່ານນາງ ຢູລາ ທໍເນສ ລັດຖະມົນຕີດ້ານການຮ່ວມມືເພື່ອການພັດທະນາຂອງດານມາກ ກ່າວວ່າ: ລັດຖະບານໂກເປັນເຮເກນກຳລັງຊຸກຍູ້ເລື່ອງນີ້ເຂົ້າສູ່ກອງປະຊຸມ ເພື່ອເພີ່ມແຮງກົດດັນໃຫ້ກອງທັບມຽນມາ.
ຂະນະທີ່ແຫລ່ງຂ່າວໃນລັດຖະບານວໍຊິງຕັນເປີດເຜີຍວ່າ: ກຳລັງມີການຫາລືພາຍໃນກ່ຽວກັບການຂວ້ຳບາດທາງເສດຖະກິດຕໍ່ ພົນເອກ ມິນອ່ອງລ່າຍ ຜູ້ບັນຊາການທະຫານສູງສຸດຂອງມຽນມາ ແລະ ເຈົ້າໜ້າທີ່ລະດັບຜູ້ບັນຊາການອີກຫລາຍທ່ານ ໂດຍມາດຕະການອາດເປັນການອາຍັດຊັບສິນຢູ່ອາເມລິກາ, ຈຳກັດການອອກວີຊາ ແລະ ຫ້າມພົນລະເມືອງອາເມລິກາຕິດຕໍ່ເຮັດທຸລະກຳຮ່ວມກັບນາຍທະຫານກຸ່ມນີ້. ເຖິງຢ່າງໃດກໍຕາມ, ທ່ານ ແພທຣິກ ເມີຟີ ຜູ້ຊ່ວຍລັດຖະມົນຕີຕ່າງປະເທດອາເມລິກາດ້ານກິດຈະການອາຊີຕາເວັນອອກສຽງໃຕ້ ກ່າວຕໍ່ກອງປະຊຸມຄະນະກຳມາທິການວິເທດສຳພັນຂອງສະພາຜູ້ແທນລາຊະດອນ ໃນອາທິດຜ່ານມາວ່າ: ລັດຖະບານວໍຊິງຕັນ “ຈະຍັງບໍ່ດຳເນີນມາດຕະການໃດໆໃນຕອນນີ້” ທີ່ອາດສົ່ງຜົນໃຫ້ສະຖານະການຢູ່ລັດຍະໄຂ່ຮ້າຍແຮງ.
ໃນເວລາດຽວກັນ ເກີດເຫດເຮືອຜູ້ລີ້ໄພຊາວໂຣຮິນຈາລຳໜຶ່ງຂວ້ຳກາງແມ່ນນ້ຳນາບ ເຊິ່ງເປັນຊາຍແດນທຳມະຊາດລະຫວ່າງພາກຕາເວັນຕົກຂອງມຽນມາກັບພາກຕາເວັນອອກຂອງບັງກະລາເທດ ໃນຄືນວັນທີ 8 ຕຸລາ ມີຜູ້ເສຍຊີວິດຢ່າງໜ້ອຍ 12 ຄົນ, ແຕ່ຍັງສູນຫາຍອີກຫລາຍສິບຄົນ ໂດຍມີລາຍງານວ່າຈຳນວນຜູ້ໂດຍສານແອອັດຢູ່ໃນເຮືອປະມານ 80-100 ຄົນ.
ວີດີໂອປະກອບ: Al Jazeera English
