ເປັນຫ່ວງກາເຟອິນເຕີເນັດ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ບໍ່ຮູ້ວ່າສັງຄົມຈະມີຄວາມກັງວົນ ແລະ ເປັນຫ່ວງຕໍ່ການເຄື່ອນໄຫວ ແລະ ເກີດຂຶ້ນຂອງຮ້ານກາເຟອິນເຕີເນັດຢູ່ນະຄອນຫລວງວຽງຈັນໃນປັດຈຸບັນເຫັນວ່າມີຫລາຍ ແລະ ບັນດາຮ້ານກາເຟອິນເຕີເນັດດັ່ງກ່າວນັ້ນມັນໄດ້ແອບແຝງໄປດ້ວຍການຫລິ້ນການພະນັນຜ່ານອອນລາຍ, ຫລິ້ນເກມ ແລະ ອື່ນໆ, ບາງແຫ່ງມີຮອດສາວບໍລິການ, ແຕ່ບໍ່ຮູ້ວ່າດ້ວຍເຫດຜົນໃດ ບັນດາຮ້ານອິນເຕີເນັດ ແລະ ຮ້ານເກມດັ່ງກ່າວນັ້ນຈຶ່ງເກີດຂຶ້ນໄດ້, ຖ້າແມ່ນການອະນຸຍາດຂອງເບື້ອງລັດ ຫລື ອຳນາດການປົກຄອງທ້ອງຖິ່ນກໍຕ້ອງມີການຄຸ້ມຄອງກວດກາໃຫ້ດີ ເພື່ອບໍ່ໃຫ້ພວກເຂົາສວຍໃຊ້ໄປໃນທາງທີ່ບໍ່ດີ ແລະ ສ້າງຄວາມເຊື່ອມເສຍໃຫ້ໄວໜຸ່ມເຮົາ.
ພວກເຄີຍເຂົ້າໄປຫລິ້ນຮ້ານເກມດັ່ງກ່າວເລົ່າສູ່ຟັງວ່າ: ປັດຈຸບັນ ບໍ່ຈຳເປັນຕ້ອງເຂົ້າຮ້ານກາຊີໂນເຮັດຫຍັງ ເພາະຮ້ານກາເຟອິນເຕີເນັດແບບນີ້ມີການບໍລິການຫລິ້ນການພະນັນຢ່າງຄົບວົງຈອນ, ພ້ອມມີຫລາຍອັນສ້າງຄວາມສົນໃຈໃຫ້ຜູ້ເຂົ້າໄປໃຊ້ບໍລິການດັ່ງກ່າວ ແລະ ຖ້າໃຜຫາກໄດ້ເຂົ້າໄປຫລິ້ນແລ້ວແມ່ນຍາກທີ່ຈະອອກຈາກສິ່ງດຶງດູດຂອງການພະນັນດັ່ງກ່າວໄດ້ ແລະ ຕໍ່ສະພາບແບບນີ້ກໍຂໍໃຫ້ເບື້ອງລັດພິຈາລະນາກວດກາ, ຖ້າບໍ່ສົມຄວນກໍຄວນມີມາດຕະການທີ່ເໝາະສົມ ເພື່ອສະກັດກັ້ນສິ່ງບໍ່ດີດັ່ງກ່າວ.
