ຄະນະນັກກິລາບ໋ອດເຊຍທີມຊາດລາວ ຊຸດຄວ້າ 1 ຫຼຽນຄຳ ແລະ 4 ຫຼຽນເງິນ ລາຍການ ມາເລເຊຍ ໂອເພັນ 2024 ຖືກຕ້ອນຮັບຢ່າງອົບອຸ່ນ
ຄະນະທັບນັກກິລາຄົນພິການບ໋ອດເຊຍທີມຊາດລາວ ທີ່ສາມາດຍາດມາໄດ້ 1 ຫຼຽນຄຳ ແລະ 4 ຫຼຽນເງິນ ໃນການເຂົ້າຮ່ວມແຂ່ງຂັນກິລາບ໋ອດເຊຍ ລາຍການ ມາເລເຊຍ ໂອເພັນ ປະຈຳປີ 2024 ທີ່ນະຄອນຫຼວງກົວລາລຳເປີ ປະເທດມາເລເຊຍ ເປັນເຈົ້າພາບ ໄດ້ເດີນທາງກັບມາເຖິງ ນະຄອນຫຼວງວຽງຈັນ ເປັນທີ່ຮຽບຮ້ອຍ ເມື່ອວັນທີ 7 ມີນາ ຜ່ານມາ ທີ່ສະໜາມບິນສາກົນວັດໄຕ ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ນາງ ຂັນທະລີ ສີຣິພົງພັນ ອະດີດຮອງລັດຖະມົນຕີກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການພາຣາແລມປິກແຫ່ງຊາດລາວ ຫຼື ຄພລ ແລະ ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການ ຄພລ ພ້ອມດ້ວຍຄະນະ ແລະ ບັນດາມວນຊົນຊາວລາວ ກໍຄື ຊາວນະຄອນຫຼວງວຽງຈັນ ຕະຫຼອດຮອດບັນດາຍາດຕິພີ່ນ້ອງເຂົ້າຮ່ວມຢ່າງຫຼວງຫຼາຍ.
ໂອກາດນີ້, ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ທັງເປັນປະທານກິດຕິມະສັກສະຫະພັນກິລາບ໋ອດເຊຍແຫ່ງຊາດລາວ ສຳພາດວ່າ: ການເຂົ້າຮ່ວມແຂ່ງຂັນຄັ້ງນີ້ ພວກເຮົາໄດ້ສົ່ງນັກກິລາເຂົ້າຮ່ວມທັງໝົດ 5 ຄົນ ນອກນັ້ນ ກໍຍັງມີຄະນະນຳ, ຄູຝຶກ ແລະ ແພດປະຈຳທີມ ຈັດຂຶ້ນໃນລະຫວ່າງວັນທີ 1-4 ມີນາ 2024 ທີ່ນະຄອນຫຼວງກົວລາລຳເປີ ປະເທດມາເລເຊຍ ເປັນເຈົ້າພາບ ຊຶ່ງມີນັກກິລາມາຈາກ 14ແຂວງພາຍໃນ ປະເທດມາເລເຊຍເຂົ້າຮ່ວມຊີງໄຊ ລະ ມີບັນດາປະເທດໃກ້ຄຽງເຂົ້າຮ່ວມ ມີການຊີງໄຊທັງປະເພດດ່ຽວ ແລະ ທີມ ຜ່ານການແຂ່ງຂັນນັ້ນ ນັກກິລາບ໋ອດເຊຍຄົນພິການທີມຊາດລາວ ກໍຮັບຜົນສຳເລັດດີ ສາມາດຍາດໄດ້ 1 ຫຼຽນຄຳ ແລະ ໄດ້ 4 ຫຼຽນເງິນ, ໃນນັ້ນ ໄດ້ຈາກປະເພດດ່ຽວ 4 ຫຼຽນ ກໍຄື 1 ຫຼຽນຄຳ ແລະ 3 ຫຼຽນເງິນ ແລະ ອີກ 1 ຫຼຽນເງິນໄດ້ຈາກປະເພດທີມ. ເຖິງຢ່າງໃດກໍດີ, ໃນການເຂົ້າຮ່ວມຄັ້ງນີ້ ມີອຸປະສັກ ແລະ ມີສິ່ງທ້າທ່າຍຫຼາຍ ເພາະມີນັກກິລາທີມຊາດ ມາເລເຊຍ ທີ່ມີອັນດັບ 6 ຂອງໂລກ ສະນັ້ນ ພວກເຮົາບໍ່ສາມາດຜ່ານຈຳນວນນັ້ນໄດ້ ແຕ່ໂດຍລວມພວກເຮົາກໍຮັບໝາກຜົນທີ່ດີນຳເອົາກຽດ ແລະ ຊື່ສຽງໃຫ້ແກ່ວົງການກິລາລາວ ກໍຄື ປະເທດຊາດ ຫາກຈັດອັນດັບທົ່ວປະເທດມາເລເຊຍ ພວກເຮົາກໍຈະຖືກຈັດຢູ່ອັນດັບທີ 2 ຂອງລາຍການດັ່ງກ່າວ.
ທ່ານ ສົມພອນ ສອນດາລາ ກ່າວຕື່ມອີກວ່າ: ໃນຕໍ່ໜ້າໂດຍລວມ ນັກກິລາບ໋ອດເຊຍ ໃນທົ່ວປະເທດກໍຍັງມີຫຼາຍ ສະນັ້ນ ສະຫະພັນກິລາຄົນພິການບ໋ອດເຊຍແຫ່ງຊາດລາວ ຈະໄດ້ມີການສົມທົບກັບທ່ານ ໂກະດະ ຊຶ່ງເພິ່ນເປັນຄູຝຶກໄດ້ສະໜັບສະໜູນທາງດ້ານທຶນຮອນ ແລະ ອຸປະກອນຂອງພວກເຮົາ ຄາດວ່າປະມານເດືອນກໍລະກົດນີ້ ຈະມີການຈັດການແຂ່ງຂັນ ບ໋ອດເຊຍທົ່ວປະເທດ ຄັ້ງທີ 1 ຢູ່ທີ່ນະຄອນຫຼວງວຽງຈັນ ສະນັ້ນ ຂໍຝາກເຖີງຄະນະນຳ ກໍຄື ບັນດາແຕ່ລະແຂວງ ຈົ່ງໄດ້ຄົ້ນຄວ້າຫານັກກິລາທີ່ມີຄວາມບົກຜ່ອງທາງດ້ານຮ່າງກາຍ ໃຫ້ເຂົ້າຮ່ວມແຂ່ງຂັນໃນຄັ້ງນີ້ ເພື່ອສ້າງໂອກາດໃຫ້ເຂົາເຈົ້າໄດ້ມາຮ່ວມແຂ່ງຂັນ ແລະ ຄັດເລືອກນັກກີລາທີມຊາດ ພິເສດ ກໍຂໍຮຽກຮ້ອງມາຍັງສັງຄົມ ຕະຫຼອດຮອດຫົວໜ່ວຍທຸລະກິດໃຫ້ການສະໜັບສະໜູນຜູ້ທີ່ບົກຜ່ອງທາງດ້ານຮ່າງກາຍ ແລະ ຜູ້ດ້ອຍໂອກາດທາງດ້ານເງື່ອນໄຂ ເຮັດໃຫ້ເຂົາເຈົ້າໄດ້ສະແດງອອກຄວາມສາມາດຢ່າງແທ້ຈິງ.
ລາຍການນີ້, ສະຫະພັນກິລາບ໋ອດເຊຍແຫ່ງຊາດລາວ ໄດ້ສົ່ງຄະນະນຳ, ຄູຝຶກ ແລະ ນັກກິລາ ຈຳນວນ 12 ຄົນ ໃນນີ້ແບ່ງເປັນນັກກິລາ 5 ຄົນ ນຳໂດຍ ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ທັງເປັນປະທານກິດຕິມະສັກສະຫະພັນກິລາບ໋ອດເຊຍແຫ່ງຊາດລາວ, ທ່ານ ອານຸຄິດ ແກ່ນວັນຄຳ ປະທານບໍລິສັດ ພຣາຍ ສຳຫຼວດ-ອອກແບບ ແລະ ກໍ່ສ້າງເຄຫາເຄຫາສະຖານ ຈຳກັດຜູ້ດຽວ ທັງເປັນປະທານສະຫະພັນກິລາບ໋ອດເຊຍແຫ່ງຊາດລາວ, ທ່ານ ຈາຕຸລົນ ສີລິສັກ ຄູຝຶກ, ທ່ານ ນິດຕະກອນ ສີປະເສີດ ຜູ້ຊ່ວຍຄູຝຶກ ແລະ ທ່ານ ນາງ ສອນທອງ ພອນພະຈັນ ຜູ້ຊ່ວຍຄູຝຶກ. ສ່ວນນັກກິລາ ປະກອບມີ ທ້າວ ຄຳເງາະ ພົງພະນາ ນັກກິລາປະເພດ Bc4, ທ້າວ ຄຳສິງ ຂາວອ່ອນ ນັກກິລາປະເພດ Bc1, ນາງ ວຽງສິງ ຫຼວງລາດ ນັກກິລາປະເພດ Bc21, ນາງ ຕູນີ ອອນມຸຍ ນັກກິລາປະເພດ Bc11 ແລະ ທ້າວ ຈະໄກສີ ນັກກິລາປະເພດ Bc21.
ຜ່ານການແຂ່ງຂັນຜົນປະກົດວ່າ ຄະນະນັກກິລາບ໋ອດເຊຍຄົນພິການທີມຊາດລາວ ເຮົາສາມາດສ້າງຜົນງານໄດ້ຢ່າງໂດດເດັ່ນ ຍາດມາໄດ້ 1 ຫຼຽນຄຳ ແລະ 4 ຫຼຽນເງິນ ໃນນີ້ 1 ຫຼຽນຄຳ ໄດ້ຈາກ ທ້າວ ຄຳສິງ ຂາວອ່ອນ ນັກກິລາປະເພດ Bc1 ສ່ວນອີກ 4 ຫຼຽນເງິນ ໄດ້ຈາກທ້າວ ຄຳເງາະ ພົງພະນາ ນັກກິລາປະເພດ Bc4, ນາງ ວຽງສິງ ຫຼວງລາດ ນັກກິລາປະເພດ Bc2, ນາງ ຕູນີ ອອນມຸຍ ນັກກິລາປະເພດ Bc1 ແລະ ໄດ້ຈາກປະເພດທີມ.
