ປີ 2023 ເມືອງຊຽງຮ່ອນ ສົ່ງອອກຢາງພາລາ ໄດ້ 52 ຕື້ກວ່າກີບ

  ທ່ານ ສີເມືອງ ອິນທະວົງ ຫົວໜ້າຫ້ອງການອຸດສາຫະກຳ ແລະ ການຄ້າເມືອງຊຽງຮ່ອນ ແຂວງໄຊຍະບູລີ ລາຍງານໃນກອງປະຊຸມສະຫລຸບການຈັດຕັ້ງປະຕິບັດວຽກງານການ ຊື້-ຂາຍ ແລະ ສົ່ງອອກຜະລິດຕະພັນປຸງແຕ່ງຢາງພາລາ ປະຈຳປີ 2023 ແລະ ວາງທິດທາງແຜນການປີ 2024 ວັນທີ 6 ມີນາ 2024 ວ່າ: ປີຜ່ານມາ ເມືອງຊຽງຮ່ອນ ໄດ້ສົ່ງອອກຢາງພາລາກ້ອນ  430 ໂຕນ, ມູນຄ່າ 1 ຕື້ 720 ລ້ານກີບ ແລະ ສົ່ງອອກຢາງພາລາປຸງແຕ່ງເຄິ່ງສຳເລັດຮູບ  6.400 ໂຕນ ມູນຄ່າ 51 ຕື້ 200 ລ້ານກີບ.

  ທົ່ວເມືອງຊຽງຮ່ອນ ມີເນື້ອທີ່ປູກຢາງພາລາທັງໝົດ 6.200 ເຮັກຕາ, ໃນນັ້ນເນື້ອທີ່ ທີ່ໄດ້ປາດແລ້ວຈຳນວນ 4.224 ເຮັກຕາ ລະເລຍສະມັດຕະພາບຜົນຜະລິດໄດ້ 4,6 ໂຕນຕໍ່ເຮັກຕາ ແລະ ສະເລ່ຍປີໜຶ່ງໄດ້ຜົນຜະລິດຫຼາຍກວ່າ 19.400 ໂຕນ, ມີ 41 ບ້ານ, ມີ 3.229 ຄອບຄົວ, ມີ 4 ບໍລິສັດໄດ້ມາລົງທຶນສົ່ງເສີມການປູກ.