ທ່ານ ປູຕິນຊະນະການເລືອກຕັ້ງປະທານາທິບໍດີສະໄໝທີ 5 ຄະແນນສຽງສູງສຸດໃນປະຫວັດສາດ
ປະທານາທິບໍດີ ວະລາດິເມຍ ປູຕິນ ໄດ້ຮັບໄຊຊະນະໃນການເລືອກຕັ້ງປະທານາທິບໍດີຣັດເຊຍສໍາເລັດໃນວັນທີ 17 ມີນາ ໂດຍໄດ້ຄະແນນສຽງສູງກວ່າ 87 ເຊິ່ງສູງສຸດໃນປະຫວັດສາດການເລືອກຕັ້ງຜູ້ນໍາຣັດເຊຍຫລັງຍຸກສະຫະພາບໂຊວຽດ.
ຜົນການເລືອກຕັ້ງດັ່ງກ່າວເຮັດໃຫ້ທ່ານ ປູຕິນ ອາຍຸ 71 ປີ ຄອງອໍານາດປະທານາທິບໍດີສະໄໝທີ 5 ຕໍ່ອີກໃນວາລະ 6 ປີ ແລະ ກາຍເປັນປະທານາທິບໍດີຣັດເຊຍທີ່ດໍາລົງຕໍາແໜ່ງຍາວນານທີ່ສຸດໃນຮອບ 200 ກວ່າປີ ແຊງທ່ານ ໂຈເຊຟ ສຕາລິນ.
ຂະນະທີ່ທ່ານ ປູຕິນ ກ່າວສູນທອນພົດປະກາດໄຊຊະນະຕໍ່ກຸ່ມຜູ້ສະໜັບສະໜູນໃນນະຄອນຫລວງມົດສະກູ ໂດຍຢືນຢັນວ່າຈະໃຫ້ຄວາມສໍາຄັນໃນການແກ້ໄຂບັນຫາທີ່ກ່ຽວກັບປະຕິບັດການພິເສດທາງທະຫານຢູ່ອູແກຣນ ແລະ ຈະສົ່ງເສີມຄວາມແຂງແກ່ນຂອງກອງທັບຣັດເຊຍ.
ທັງນີ້, ກຸ່ມຜູ້ສະໜັບສະໜູນທ່ານ ນາວາລນີ ໃນຫລາຍເມືອງຂອງຣັດເຊຍຍັງໄດ້ມີການປະທ້ວງທາງສັນຍາລັກ ເອີ້ນວ່າ: ການຕໍ່ຕ້ານທ່ານ ປູຕິນ ໃນເວລາທ່ຽງ (Noon against Putin) ໂດຍການໄປໃຊ້ສິດລົງຄະແນນຕໍ່ຕ້ານທ່ານ ປູຕິນ ໃນເວລາຕອນທ່ຽງ ເຊິ່ງເຮັດໃຫ້ຫລາຍໜ່ວຍເລືອກຕັ້ງຢູ່ມົດສະກູ, ເຊນປິເຕີສເບິກ ແລະ ສະຖານທູດຢູ່ຕ່າງປະເທດ ມີຜູ້ໄປຕໍ່ແຖວຍາວເພື່ອລົງຄະແນນ.
ໂດຍລະຫວ່າງການປະທ້ວງໄລຍະ 3 ວັນ (15-17 ມີນາ) ມີລາຍງານເຫດວຸ້ນວາຍຈາກການປະທ້ວງເກີດຂຶ້ນໃນຫລາຍຈຸດເຊັ່ນ: ການຈູດໄຟເຜົາບ່ອນເລືອກຕັ້ງ, ເທສີລົງໄປໃນຫີບລົງຄະແນນ ຫລື ໂພສຮູບພາບທີ່ຂຽນຂໍ້ຄວາມຕໍ່ຕ້ານທ່ານ ປູຕິນ ລົງໃນບັດລົງຄະແນນ.
ເຖິງຢ່າງໃດກໍຕາມ, ຄາດວ່າການປະທ້ວງດ້ວຍວິທີນີ້ບໍ່ສົ່ງຜົນກະທົບໃດໆຕໍ່ຜົນການເລືອກຕັ້ງ ໂດຍຄະນະກໍາມະການການເລືອກຕັ້ງເປີດເຜີຍວ່າ: ຈໍານວນປະຊາຊົນຣັດເຊຍທີ່ອອກໄປໃຊ້ສິດທົ່ວປະເທດມີ 74,22% ຈາກຜູ້ມີສິດລົງຄະແນນທັງໝົດ 114 ລ້ານກວ່າຄົນ ເຊິ່ງຫລາຍກວ່າປີ 2018 ທີ່ມີຜູ້ອອກໄປໃຊ້ສິດ 67,5%.
ອ້າງອີງ:
- https://www.bbc.com/news/world-europe-68592781
- https://www.reuters.com/world/europe/russias-presidential-vote-starts-final-day-with-accusations-kyiv-sabotage-2024-03-17/
