ເດືອນກຸມພາ 2024 ທົ່ວປະເທດມີອຸບັດເຫດເກີດຂຶ້ນ 630 ກໍລະນີ ມີເສຍຊີວິດ 101 ຄົນ

ກົມຕຳຫລວດຈະລາຈອນ, ກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ (ປກສ) ລາຍງານວ່າ: ເດືອນກຸມພາຜ່ານມາ  ທົ່ວປະເທດມີອຸບັດເຫດເກີດຂຶ້ນທັງໝົດ 630 ກໍລະນີ, ທຽບໃສ່ໄລຍະດຽວກັນປີຜ່ານມາຫລຸດລົງ 143 ກໍລະນີ, ຄົນໄດ້ຮັບບາດເຈັບຫຼາຍກວ່າ 1.100ຄົນ, ຫລຸດລົງ 225 ຄົນ, ເສຍຊີວິດ 101 ຄົນ, ຫລຸດລົງ 18 ຄົນ.

   ສະເພາະຢູ່ນະຄອນຫລວງວຽງຈັນ ອຸບັດເຫດເກີດຂຶ້ນ 91 ລາຍ, ຫລຸດລົງ 45 ກໍລະນີ, ຄົນໄດ້ຮັບບາດເຈັບ 94 ຄົນ, ຫລຸດລົງ 66 ຄົນ, ຄົນເສຍຊີວິດ 13 ຄົນ, ຫລຸດລົງ 5 ຄົນ.

     ສຳລັບສາເຫດທີ່ພາໃຫ້ເກີດອຸບັດຕິເຫດຕົ້ນຕໍແມ່ນດື່ມສິ່ງມຶນເມົາ ແລ້ວ ຂັບຂີ່ລົດ, ຂັບຂີ່ຄວາມໄວເກີນກຳນົດ, ບໍ່ປ່ອຍສິດ, ຊີງຂຶ້ນໜ້າບໍ່ຮັບປະກັນ, ປ່ຽນທິດທາງເດີນ, ເຕັກນິກບໍ່ຮັບປະກັນ, ລ່ວງປ້າຍຫ້າມ ແລະ ອື່ນໆ.

  ສ່ວນແຂວງທີ່ເກີດອຸບັດເຫດຫລາຍກວ່າໝູ່ແມ່ນ ນະຄອນຫລວງວຽງຈັນ, ຈຳປາສັກ, ວຽງຈັນ, ສະຫວັນນະເຂດ ແລະ ອັດຕະປື ຕຳລຳດັບ.