ຮອງນາຍົກ ເນັ້ນໃຫ້ແຂວງຄຳມ່ວນ ຊີ້ນຳນຳພາວຽກງານແບບໃກ້ຊິດຕິດແທດກັບທ້ອງຖິ່ນຫລາຍຂຶ້ນ

ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ໄດ້ລົງໄດ້ໂອ້ລົມຕໍ່ພະນັກງານການນຳຫລັກແຫລ່ງຂອງແຂວງຄຳມ່ວນ ເນື່ອງໃນໂອກາດເຄື່ອນໄຫວ ແລະ ເຮັດວຽກຢູ່ແຂວງຄຳມ່ວນ ວັນທີ 19 ມີນາ 2024 ນີ້ວ່າ: ສະແດງຄວາມຊົມເຊີຍຕໍ່ການນຳຂອງແຂວງທີ່ໄດ້ພ້ອມກັນສູ້ຊົນຈັດຕັ້ງປະຕິບັດວຽກງານຫລາຍດ້ານແມ່ນໄດ້ບັນລຸຕາມຈຸດປະສົງ ແລະ ເປົ້າໝາຍ ໂດຍສະເພາະການເກັບລາຍຮັບໃນປີທີ່ຜ່ານມາ ກາຍເປັນແຂວງທີ່ມີຄວາມໂດດເດັ່ນໃນການເກັບລາຍຮັບງົບປະມານໄດ້ເກີນແຜນ.

ໄປຄຽງຄູ່ກັນນັ້ນກໍເນັ້ນໃຫ້ການນຳຂອງແຂວງ-ເມືອງ ສືບຕໍ່ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ, ປຸກລະດົມຈິດໃຈ ສະມາຊິກພັກ-ພະນັກງານໃຫ້ມີຄວາມໜັກແໜ້ນ ໂດຍສະເພາະໃນສະພາບທີ່ປະເທດເຮົາກຳລັງປະເຊີນກັບບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໃນປັດຈຸບັນ, ເອົາໃຈໃສ່ປັບປຸງແບບແຜນວິທີນໍາພາ, ວິທີເຮັດວຽກ, ເອົາໃຈໃສ່ລົງໃກ້ຊິດຕິດແທດກັບທ້ອງຖິ່ນຮາກຖານໃຫ້ຫລາຍຂຶ້ນ, ຕໍ່ກັບການພັດທະນາຍຸດທະສາດ ຕາມ 3 ທ່າແຮງຂອງແຂວງທີ່ໄດ້ກຳນົດ ແມ່ນໃຫ້ມີຄວາມດຸ່ນດ່ຽງລະຫວ່າງ ຂະແໜງການອຸດສາຫະກຳພະລັງງານ-ບໍ່ແຮ່ ກັບ ຂະແໜງການບໍລະການ ແລະ ທ່ອງທ່ຽວ ເພື່ອໃຫ້ມີຄວາມຍືນຍົງ.