ເຈົ້າໜ້າທີ່ປ່າໄມ້ ເອົາໃຈໃສ່ສະກັດກັ້ນຜູ້ລັກລອບຕັດໄມ້  

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ໃນອາທິດຜ່ານມານີ້ ເຈົ້າໜ້າທີ່ປ່າໄມ້ສາມາດກັກຢຶດໄມ້ ທີ່ຜິດລະບຽບກົດໝາຍ ຢູ່ແຂວງສະຫວັນນະເຂດ ໄດ້ທັງໝົດ 231 ໂຕ, ມີບໍລິມາດ 3,72 ແມັດກ້ອນ ແລະ ໄດ້ກັກລົດແກ່ໄມ້ໄດ້ 4 ຄັນ. ປັດຈຸບັນ ກໍາລັງດໍາເນີນການສືບສວນ-ສອບສວນ ແລະ ປັບໄໝຕາມລະບຽບກົດໝາຍ. ນອກຈາກນີ້ ໜ່ວຍງານສະເພາະກິດຂອງແຂວງບໍ່ແກ້ວ ໄດ້ລົງເຄື່ອນໄຫວຮື້ຖອນໂຮງງານເຟີນີເຈີທີ່ບໍ່ມີໃບອະນຸຍາດ ຢູ່ເມືອງປາກທາ ແລະ ເມືອງຜາອຸດົມ ຕາມເປົ້າໝາຍ 21 ແຫ່ງ, ໃນນີ້ ຮື້ຖອນແລ້ວ 16 ແຫ່ງ ແລະ ກວດການສິນຄ້າປະເພດຢ່າງພາລາຜ່ານດ່ານບ້ານມ່ອມ ໄປ ສປ ຈີນ 6 ໂຕນ ແລະ ໄດ້ສືບສວນ-ສອບສວນ ຄະດີຖາງປ່າເຮັດໄຮ່ຢູ່ເຂດປ່າສະຫງວນແຫ່ງຊາດນໍ້າກ່ານ ໃນເນື້ອທີ່ 1.680 ເຮັກຕາ.

ກະຊວງກະສິກກໍາ ໃຫ້ຮູ້ອີກວ່າ: ຢູ່ແຂວງ ຄໍາມ່ວນ ແລະ ສະຫວັນນະເຂດ ໄດ້ເອົາໃຈໃສ່ກວດກາ ແລະ ຢຶດສັດປ່າ, ສັດນໍ້າປະເພດຫວງຫ້າມໄດ້ທັງໝົດ 21 ໂຕ, ນໍ້າໜັກ 167,6 ກິໂລກຣາມ ແລະ ໄດ້ກ່າວເຕືອນສຶກສາອົບຮົມຜູ້ກທຊາຜິດຕາມລະບຽບກົດໝາຍ.