ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ

- 434002771 383804257766795 2453200720240285426 n scaled 1 e1711013685196 - ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ
- kitchen vibe - ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ

ທັບນັກກິລາຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນບານເຕະຄົນພິການຕາ 4 ຊາດ ຄື: ໄທ ເຈົ້າພາບ, ສປປ ລາວ, ຍີ່ປຸ່ນ ແລະ ອິນເດຍ ລາຍການ 2024 INVITATION BLIND FOOTBALL TOURNAMENT ລະຫວ່າງວັນທີ 24-31 ມີນາ 2024 ທີ່ແຂວງນົນທະບູລີ ປະເທດໄທ ຮັບເປັນເຈົ້າພາບ.


ໃນເມື່ອວັນທີ 20 ມີນາ 2024 ທີ່ສະໜາມກິລາບານເຕະ ຫຍ້າທຽມ ເບ ສະຫວັນ ເອັບຊີ ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ທັບນັກກິລາຄົນພິການຕາທີມຊາດລາວ ຊຶ່ງລວມມີຄະນະຄູຝຶກ, ຊ່ຽວຊານແພດຍິງ ຈາກປະເທດຍີ່ປຸ່ນ ແລະ ນັກກິລາ ໄດ້ສືບຕໍ່ຝຶກຊ້ອມມື້ທີ 36 ກ່ອນຈະອອກເດີນທາງເຂົ້າຮ່ວມແຂ່ງຂັນງານດັ່ງກ່າວ ໂດຍໃຫ້ກຽດລົງຕິດຕາມ ແລະ ໃຫ້ກຳລັງໃຈຢ່າງໃກ້ຊິດຂອງ ທ່ານ ບຸນມີ ຫຼ່ຽມໄຊຍະຈັກ ປະທານສະຫະພັນບານເຕະຄົນພິການຕາແຫ່ງຊາດລາວ.

- Visit Laos Visit SALANA BOUTIQUE HOTEL - ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ

ໂອກາດນີ້, ທ່ານ ບຸນມີ ຫຼ່ຽມໄຊຍະຈັກ ໃຫ້ສຳພາດວ່າ: ໃນການເຂົ້າຮ່ວມງານແຂ່ງຂັນຄັ້ງນີ້ ນັກກິລາໄດ້ມີຄວາມພ້ອມ 90 ເປີເຊັນແລ້ວ ແລະ ຈະໄດ້ອອກເດີນທາງໃນວັນທີ 24 ມີນາ 2024 ແລະ ມື້ຖັດໄປ ກໍຈະລົງແຂ່ງຂັນ ຄາດວ່າຈະສຳເລັດໃນວັນທີ 29 ມີນາ 2024 ໃນການເກັບຕົວຝຶກຊ້ອມໃນຄັ້ງນີ້ ມີຂໍ້ຫຍຸ້ງຍາກນັ້ນ ຄືຮູ້ກັນແລ້ວວ່າ ກິລາບານເຕະຄົນພິການຕາ ການໄປການມາ ຕ້ອງໄດ້ໄປຮັບໄປສົ່ງ ເພາະສະພາບການສັນຈອນໃນຕົວເມືອງມີລົດແອອັດຫຼາຍ ຈຶ່ງໄດ້ເລືອກໃຫ້ໄດ້ມີການຝຶກຊ້ອມ ໃນຕອນເຊົ້າ ແລະ ໃຫ້ຄະນະຮັບຜິດຊອບ ໄປຮັບໄປສົ່ງນັກກິລາແຕ່ລະຈຸດ ເລີ່ມຝຶກຊ້ອມ ປະມານ 07:00-10:00 ໂມງ ນອກນັ້ນ ພວກເຮົາກໍຍັງຂາດເຂີນເລື່ອງອຸປະກອນຕ່າງໆໂດຍສະເພາະຂອບສະໜາມຍັງບໍ່ທັນມີ, ກັນຫົວເຂົ່າ-ສອກ, ໜ້າກາກ ແລະ ອຸປະກອນອື່ນໆ. ແຕ່ເຖິງແນວໃດກໍດີ, ທາງສະຫະພັນພວກເຮົາກໍໄດ້ມີການສະເໜີຫາພາກສ່ວນສາກົນ ໂດຍສະເພາະສະຫະພັນກິລາບານເຕະຄົນພິການຕາແຫ່ງປະເທດໄທ ແລະ ເພິ່ນກໍຍິນດີທີ່ຈະສະໜັບສະໜູນສະຫະພັນພວກເຮົາຢ່າງເຕັມທີ່ ສ່ວນທາງດ້ານຂໍ້ສະດວກ ກໍມີ ພະນັກງານທີ່ ເຄີຍຜ່ານປະສົບການ ເປັນນັກກິລາທີ່ຫຼິ້ນໃນລະດັບລີກ ແລະ ລາຍການອື່ນໆ ມາເປັນຜູ້ຮັກສາປະຕູ ນອກນັ້ນ ກໍມີຄູຝຶກ ແລະ ສະໜາມກິລາ ເບ ສະຫວັນ ໃຫ້ເຂົາເຈົ້າໄດ້ເກັບຕົວຝຶກແອບຝຶກຊ້ອມ ພິເສດທີ່ສຸດ ກໍຕ້ອງຂໍສະແດງຄວາມຂອບໃຈເປັນຢ່າງສູງມາຍັງຄະນະນຳກະຊວງສຶກສາທິການ ແລະ ກິລາ ກໍຄື ກົມກິລາມວນຊົນ, ພະລະ ແລະ ສິລະປະສຶກສາ ຕະຫຼອດຮອດ ຄະນະກຳມະການພາຣາແລມປິກແຫ່ງຊາດລາວ ທີ່ໃຫ້ການສະໜັບສະໜູນເລື່ອງເງິນແຮ່ ໃຫ້ແກ່ຄະນະຄູຝຶກ ແລະ ນັກກິລາ ເຂົ້າຮ່ວມແຂ່ງຂັນໃນງານດັ່ງກ່າວ.

ປະທານສະຫະພັນບານເຕະຄົນພິການຕາແຫ່ງຊາດລາວ ໃຫ້ຮູ້ຕື່ມອີກວ່າ: ນັກກິລາໃນຊຸດນີ້ ກໍຍັງເປັນຊຸດເກົ່າ ທີ່ຜ່ານການເຂົ້າຮ່ວມ ງານກິລາ ອາຊຽນ ພາຣາເກມ ທຸກຄົນຫາກໍໄດ້ເຕົ້າໂຮມກັນເປັຍເວລາ 3 ອາທິດ ແຕ່ຍ້ອນຈິດໃຈນັກກິລາ, ຄູຝຶກ ແລະ ປະທານ ໄດ້ມີໃຈມັກຮັກກິລານີ້ ຈຶ່ງມີການເຕົ້າໂຮມເປັນອັນໜຶ່ງອັນດຽວ ລົງດຳເນີນການຝຶກຊ້ອມແລະ ມີຄວາມພ້ອມດີພໍສົມຄວນ ຫຼັງຈາກຈົບຈາກການແຂ່ງຂັນຄັ້ງນີ້ ຫາກວ່າໄດ້ຮັບການສະໜັບສະໜູນຕາມໜັງສືະເໜີຂໍນັ້ນ ກໍຈະມາສ້າງສະໜາມໃຫ້ມີຂອບສະໜາມ ເພື່ອໃຫ້ນັກກິລາໄດ້ມີການເກັບຕົວຝຶກແອບຝຶກຊ້ອມ ເພື່ອຈະຈັດແຂ່ງຂັນກິລາຄົນພິການແຫ່ງຊາດ ຄັ້ງທີ 4 ຈະຈັດຂຶ້ນທີ່ ນະຄອນຫຼວງວຽງຈັນ ເປັນເຈົ້າພາບ ໃນປີ 2025 ແລະ ກຽມນັກກິລາເຂົ້າຮ່ວມງານກິລາອາຊຽນ ພາຣາເກມ ຄັ້ງທີ 13 ທີ່ປະເທດໄທ ເປັນເຈົ້າພາບ ໃນປີ 2026.

ທ່ານ ບຸນມີ ຫຼ່ຽມໄຊຍະຈັກ ໃຫ້ຮູ້ຕື່ມອີກວ່າ: ຄືຮູ້ກັນແລ້ວວ່ານັກກິລາຄົນພິການຕາ ຈະມີຄວາມຫຍຸ້ງຍາກລຳບາກໃນການໄປການມາ ໃນປັດຈຸບັນໃນທົ່ວປະເທດລາວ ກໍຈະມີຄົນພິການຕາຢ່າງຫຼວງຫຼາຍ ສະນັ້ນ ຈຶ່ງໄດ້ມີການປຶກສາຫາລືກັບກະຊວງສຶກສາທິການ ແລະ ກິລາ ໂດຍສະເພາະກົມກ່ຽວຂ້ອງ ກໍຄື ກົມກິລາມວນຊົນ, ພະລະ ແລະ ສິລະປະສຶກສາ ເພື່ອຊອກຫາຊ່ອງທາງແກ້ໄຂ ໂດຍໄດ້ມີການກຳນົດໃຫ້ມີການຄັດເລືອກເອົານັກກິລາຄົນພິການຕາພອນສະຫວັນດີເດັ່ນໃນທົ່ວປະເທດ ຈະສ້າງໃຫ້ຕິດທີມຊາດ ໂດຍຄຽງຄູ່ໃຫ້ເຂົາເຈົ້າມີອາຊີບມີວຽກເຮັດງານທຳທີ່ດີໆຊຶ່ງພວກເຮົາຈະໄດ້ເປີດຮ້ານນວດບໍລິການ ເພື່ອໃຫ້ເຂົາເຈົ້າໄດ້ບໍລິການໃຫ້ສັງຄົມ ສ້າງລາຍໄດ້ເປັນກອງທຶນກິລາ ຕິດພັນກັບການຫຼິ້ນກິລາໄປນຳ ສະນັ້ນ ຂໍຖືເອົາໂອກາດນີ້ ຮຽກຮ້ອງມາຍັງບັນດາພາກສ່ວນຕ່າງໆ ໃຫ້ການສະໜັບສະໜູນເຂົາເຈົ້າໃຫ້ເຂົາເຈົ້າໄດ້ມີຜົນສຳເລັດ ແລະ ສ້າງຜົນງານເປັນກຽດສັກສີໃຫ້ແກ່ປະເທດຊາດ ໃນຕໍ່ໜ້າ ແລະ ຂໍຝາກເຖິງພໍ່ແມ່ປະຊາຊົນລາວທົ່ວປະເທດ ຂໍໃຫ້ຕິດຕາມຜົນງານຂອງຄົນພິການຕາ ຫາກວ່າທ່ານໃດຢາກສະໜັບສະໜູນນັກກິລາຄົນພິການຕາທີ່ດ້ອຍໂອກາດ ທາງພວກເຮົາກໍຍິນດີຮັບສະເໝີ ເພື່ອສົ່ງເສີມເຂົາເຈົ້າໃຫ້ໄປເຖິງຈຸດເປົ້າໝາຍທີ່ວາງໄວ້.


ດ້ານ ທ່ານ ສີທົນ ຣາດຊະວົງ ຫົວໜ້າຄູຝຶກບານເຕະຄົນພິການຕາທີມຊາດລາວ ກໍໃຫ້ສຳພາດວ່າ: ໃນການເຂົ້າຮ່ວມແຂ່ງຂັນ ພວກເຮົາຈະໄດ້ເກັບຕົວຝຶກຊ້ອມ 40 ວັນ ໂດຍອີງຕາມສະພາບຄວາມພ້ອມຂອງນັກກິລາ ທຸກຄົນໄດ້ມີຄວາມຫ້າວຫັນບຸກບືນເຂົ້າໃນການຝຶກແອບຝຶກຊ້ອມຢ່າງຕັ້ງໜ້າ ນັກກິລາຊຸດນີ້ ມີເຕັກນິກຄ່ອງແຄ້ວຕົວສູງ ໃນການຄອງບານ ແຕ່ສິ່ງທີ່ໜ້າເປັນຫ່ວງເລື່ອງພະລະກຳລັງ ແລະ ຮ່າງກາຍ ຢ້ານນັກກິລາແຮງຕົກຈະໝົດກວ່າເຂົາເຈົ້າ ໂດຍລວມນັກກິລາແມ່ນຈະຢູ່ໃນຊຸດເກົ່າ ທີ່ເຄີຍຜ່ານປະສົບການຮ່ວມຊີວິດມານຳກັນ ໂດຍເຄີຍຜ່ານການແຂ່ງຂັນ ອາຊຽນ ພາຣາເກມ ແລະ ລາຍການ ຢູ່ປະເທດໄທ ພິເສດ ກໍຍັງເຄີຍພົບກັບນັກກິລາຍີ່ປຸ່ນ ມາແລ້ວ ຊຶ່ງງານນີ້ ຖືວ່າເປັນງານສຳຄັນທີ່ພວກເຮົາ ຈະໄດ້ເກັບກ່ຽວເອົາປະສົບການ ແລະ ຈະພ້ອມກັນເຮັດວຽກໃຫ້ໜັກ ເພື່ອຈະກຽມຄວາມພ້ອມ ເຂົ້າຮ່ວມງານມະຫະກຳກິລາອາຊຽນ ພາຣາເກມ ຄັ້ງທີ 19 ຈະຈັດຂຶ້ນ ທີ່ປະເທດໄທ ເປັນເຈົ້າພາບໃນປີ 2026 ນີ້.
ຂະນະທີ່ ທ້າວ ບຸນຈົບ ຫວານແພງພັນ ນັກກິລາບານເຕະຄົນພິການຕາທີມຊາດລາວ ບ້ານເກີດແຂວງເຊກອງ ໃນຕຳແໜ່ງກອງກາງ ກໍໄດ້ບອກວ່າ: ສະພາບລວມຂອງທີມ ໃນປັດຈຸບັນ ຖືວ່າມີຄວາມພ້ອມຫຼາຍດ້ານແລ້ວ ໂດຍສະເພາະພວກເຮົາມີຄວາມສະດວກທາງດ້ານສະໜາມຝຶກຊ້ອມ ແລະ ຄວາມເອື້ອອຳນວຍຄວາມສະດວກຈາກຂັ້ນເທິງ ກໍຄື ປະທານສະຫະພັນ ສະນັ້ນ ພວກນ້ອງຈະພ້ອມກັນສູ້ຊົນຜ່ານຜ່າ ເພື່ອນຳເອົາກຽດຊື່ສຽງມາສູ່ພີ່ນ້ອງຊາວລາວທຸກຄົນ.
ສຳລັບແຣັງກິ້ງຂອງ 4 ທີມ ທີ່ເຂົ້າຮ່ວມແຂ່ງຂັນລາຍການດັ່ງກ່າວ ສະເພາະເຈົ້າພາບ ໄທ ແມ່ນຢູ່ອັນດັບທີ 4 ຂອງໂລກ, ຍີ່ປຸ່ນ ອັນດັບທີ 2 ຂອງໂລກ ສ່ວນ ອິນເດຍ ແມ່ນຢູ່ອັນດັບທີ 14 ຂອງໂລກ ແລະ ສປປ ລາວ ຢູ່ອັນດັບ 33 ຂອງໂລກ.

- 433969654 303346239436489 1538649922705902264 n scaled 1 1024x683 - ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ

ຂ່າວຈາກ: ສສກ

- 3 - ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ
- 5 - ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ
- 4 - ທັບຄົນພິການຕາທີມຊາດລາວ ພ້ອມທີ່ຈະຮ່ວມແຂ່ງຂັນ ບານເຕະ 4 ຊາດ ທີ່ປະເທດໄທ ເປັນເຈົ້າພາບ