ຄັ້ງທຳອິດຂອງໂລກ ແພດອາເມລິກາປູກຖ່າຍໄຕໝູໃຫ້ຄົນເຈັບສໍາເລັດ

- Untitled 6 - ຄັ້ງທຳອິດຂອງໂລກ ແພດອາເມລິກາປູກຖ່າຍໄຕໝູໃຫ້ຄົນເຈັບສໍາເລັດ
- kitchen vibe - ຄັ້ງທຳອິດຂອງໂລກ ແພດອາເມລິກາປູກຖ່າຍໄຕໝູໃຫ້ຄົນເຈັບສໍາເລັດ

      ທີມແພດອາເມລິກາ ປະສົບຜົນສໍາເລັດໃນການປູກຖ່າຍໄຕໝູທີ່ໄດ້ຮັບການດັດແປງພັນທຸກໍາສູ່ຮ່າງກາຍຂອງຄົນເຈັບທີ່ຍັງມີຊີວິດຢູ່ເປັນຄັ້ງທໍາອິດ. ຖືເປັນຂະບວນການທີ່ຊ່ວຍແກ້ໄຂບັນຫາຊໍ້າເຮື້ອຂອງການຂາດເຂີນອະໄວຍະວະບໍລິຈາກ.

     ວັນທີ 22 ມີນາ, ສໍານັກຂ່າວຕ່າງປະເທດລາຍງານວ່າ: ໂຮງໝໍແມສຊາຊູເຊດ ເຈເນີຣັລ (MGH) ລະບຸໃນຖະແຫລງການວ່າ: ທີມແພດດໍາເນີນການຜ່າຕັດປູກຖ່າຍໄຕໃຫ້ທ້າວ ຣິຊາດ ສເລແມນ ອາຍຸ 62 ປີ ເຊິ່ງເປັນຄົນເຈັບພະຍາດໄຕວາຍໄລຍະສຸດທ້າຍ ໂດຍໃຊ້ເວລາປະມານ 4 ຊົ່ວໂມງ.

- Visit Laos Visit SALANA BOUTIQUE HOTEL - ຄັ້ງທຳອິດຂອງໂລກ ແພດອາເມລິກາປູກຖ່າຍໄຕໝູໃຫ້ຄົນເຈັບສໍາເລັດ

      MGH ລະບຸວ່າ: ຂະບວນການດັ່ງກ່າວຖືເປັນບາດກ້າວສໍາຄັນໃນການຫາອະໄວຍະວະທີ່ພ້ອມໃຊ້ໃຫ້ຄົນເຈັບໄດ້ຫລາຍຂຶ້ນ. ຂະນະທີ່ ທ່ານໝໍ ທັດສິໂອະ ຄາວາອິ ສະມາຊິກທີມແພດທີ່ດໍາເນີນການຜ່າຕັດຄັ້ງສໍາຄັນນີ້ ຫວັງວ່າແນວທາງການປູກຖ່າຍນີ້ຈະຊ່ວຍຊີວິດຄົນເຈັບຫລາຍລ້ານຄົນທົ່ວໂລກທີ່ກໍາລັງທຸກທໍລະມານຈາກສະພາບໄຕວາຍ.

      ທັງນີ້, MGH ກ່າວວ່າ: ໄຕໝູທີ່ແພດໃຊ້ໃນການປູກຖ່າຍດັ່ງກ່າວໄດ້ຮັບມາຈາກ eGenesis ເຊິ່ງເປັນບໍລິສັດເຕັກໂນໂລຊີຊີວະພາບໃນລັດແມສຊາຊູເຊດ ແລະ ໄດ້ຮັບການດັດແປງທາງພັນທຸກໍາ ເພື່ອກໍາຈັດຈຸລັງໝູທີ່ເປັນອັນຕະລາຍ ແລະ ເພີ່ມຈຸລັງຂອງມະນຸດບາງຕົວ.

      ພາຍຫລັງການຜ່າຕັດປູກຖ່າຍ, ທ້າວ ສເລແມນ ຍັງຢູ່ລະຫວ່າງການພັກຟື້ນ ແລະ ຄາດວ່າຈະອອກຈາກໂຮງໝໍໃນມໍ່ໆນີ້ ເຖິງວ່າລາວຈະຕ້ອງໃຊ້ຢາກົດພູມຕ້ານທານ ເພື່ອປ້ອງກັນການປະຕິເສດໄຕໝູ, ແຕ່ທ້າວ ສເລແມນ ກ່າວວ່າ: ລາວເຫັນພ້ອມຕໍ່ການປູກຖ່າຍໄຕໝູ ເພາະມັນເປັນວິທີຊ່ວຍຊີວິດລາວ ແລະ ສ້າງຄວາມຫວັງໃຫ້ຄົນອີກຫລາຍພັນຄົນທີ່ຈໍາເປັນຕ້ອງໄດ້ຮັບການປູກຖ່າຍໄຕ.

     ກ່ອນໜ້ານີ້, ອາເມລິກາເຄີຍດໍາເນີນການປູກຖ່າຍໄຕໝູສູ່ຮ່າງກາຍຂອງຄົນເຈັບສະໝອງຕາຍ, ແຕ່ທ້າວ ສເຕແມນ ເປັນຄົນເຈັບຄົນທໍາອິດທີ່ໄດ້ຮັບໄຕດັ່ງກ່າວໂດຍຍັງມີຊີວິດຢູ່.

      MGH ລະບຸອີກວ່າ: ອະໄວຍະວະທີ່ໃຊ້ໃນການປູກຖ່າຍມາຈາກໝູທີ່ລ້ຽງແຍກພາຍໃຕ້ສະພາບແວດລ້ອມພິເສດ ເພື່ອປ້ອງກັນບໍ່ໃຫ້ໝູສໍາຜັດກັບການຕິດເຊື້ອທີ່ອາດເປັນອັນຕະລາຍຕໍ່ຄົນເຈັບ ເຊິ່ງໝູພິເສດເຫລົ່ານີ້ມີອະໄວຍະວະທີ່ມີຂະໜາດໃກ້ຄຽງ ແລະ ເຮັດວຽກຄືກັບອະໄວຍະວະຂອງມະນຸດ. ອີກທັງການດັດແປງພັນທຸກໍາຂອງໝູເຫລົ່ານີ້ຍັງເຮັດໃຫ້ອະໄວຍະວະຂອງພວກມັນເຂົ້າກັບຮ່າງກາຍຂອງມະນຸດໄດ້ຫລາຍຂຶ້ນ.

- 5 - ຄັ້ງທຳອິດຂອງໂລກ ແພດອາເມລິກາປູກຖ່າຍໄຕໝູໃຫ້ຄົນເຈັບສໍາເລັດ
- 3 - ຄັ້ງທຳອິດຂອງໂລກ ແພດອາເມລິກາປູກຖ່າຍໄຕໝູໃຫ້ຄົນເຈັບສໍາເລັດ
- 4 - ຄັ້ງທຳອິດຂອງໂລກ ແພດອາເມລິກາປູກຖ່າຍໄຕໝູໃຫ້ຄົນເຈັບສໍາເລັດ