ແຂວງຄໍາມ່ວນຄັກສົມນາມງາມສົມຊື່
ໂດຍ: ທິດກໍ່າ
ອາທິດຜ່ານມາ, ທິດກໍ່າໄດ້ມີໂອກາດໄປສໍາຜັດບັນຍາກາດການສ້າງສາພັດທະນາແຖວແຂວງຄໍາມ່ວນ. ນອກນັ້ນກໍຍັງໄດ້ໄປທ່ຽວຊົມທໍາມະຊາດອັນສວຍງາມຂອງຖ້ຳແອ່ນ, ຖ້ຳພະໜອງປາຝາ ອັນເປັນສະຖານທີ່ທ່ອງທ່ຽວສໍາຄັນທາງທໍາມະຊາດຂອງແຂວງຄໍາມ່ວນ ກໍຄືຂອງຊາວເມືອງທ່າແຂກ. ດົນໆຈຶ່ງໄປພົບເຫັນການສ້າງສາພັດທະນາເກືອບເວົ້າໄດ້ວ່າກ້າວກະໂດດຂັ້ນອີ່ຫລີ. ກ່ອນໜ້ານີ້ປະມານສິບປີຄືນຫລັງຕາມເສັ້ນທາງໄປມະຫາໄຊ, ຍົມມະລາດມີແຕ່ທົ່ງນາ ແລະ ພູຜາປ່າເລົ່າ. ພໍມາຮອດປັດຈຸບັນ ເຮືອນຊານບ້ານຊ່ອງ, ຕຶກອາຄານປຸກຢັ່ງຢາຍເດຍລະດາດ, ເກືອບເວົ້າໄດ້ວ່າຕິດຈອດກັນເປັນຍ່ານໆ. ໃນຄວາມຈິງແລ້ວແຂວງຄໍາມ່ວນເປັນແຂວງທີ່ມີພູຜາປ່າໄມ້ ແລະ ມີແມ່ນ້ຳລໍາເຊອັນສວຍງາມຢູ່ຫລາຍບ່ອນ.ສິ່ງທີ່ກ່າວມານີ້ ກາຍເປັນຊັບສົມບັດອັນລ້ຳຄ່າຂອງແຂວງ ກໍຄືຂອງປະເທດຊາດ. ຈາກຄວາມອຸດົມສົມບູນຂອງແຫລ່ງທໍາມະຊາດນີ້ໄດ້ເປັນທ່າແຮງທາງດ້ານເສດຖະກິດ-ສັງຄົມ ໃຫ້ແກ່ແຂວງ ຫລື ປະເທດໄດ້ເປັນຢ່າງດີ.
ຖ້າຈະໃຫ້ທິດກໍ່າຍົກນິ້ວມືມານັບເລົ່າເຖິງແຫລ່ງທ່ອງທ່ຽວວັດທະນະທໍາຂອງແຂວງກໍມີພະທາດສີໂຄດຕະບອງ ຕະຫລອດວັດວາອາຮາມຕ່າງໆທີ່ເປັນບ່ອນເຄົາລົບບູຊາຂອງຄົນໃນທ້ອງຖິ່ນ. ສ່ວນວ່າແຫລ່ງທ່ອງທ່ຽວທໍາມະຊາດນັ້ນກໍເກືອບວ່ານັບບໍ່ໄຄ່ວ. ອັນໂຕທີ່ມີຊື່ສຽງໂດ່ງດັງໃນປັດຈຸບັນກໍຄືຖ້ຳນາງແອ່ນ, ຖ້ຳພະໜອງປາຝາ, ຖ້ຳກອງລໍ-ນາຕານ, ຂຸນກອງແລງ, ຂຸນນ້ຳໂດນ, ຖ້ຳຊ້າງລອດເຊບັ້ງໄຟ, ນ້ຳຕົກຕາດນ້ຳສະນາມ ແລະ ບ່ອນອື່ນໆທີ່ຍັງພົບເຫັນໃໝ່ໆ ເຊິ່ງບໍ່ທັນໄດ້ຂຸດຄົ້ນອອກມາໂຄໃຫ້ຄົນໄປທ່ອງທ່ຽວ. ຕາມທິດກໍ່າວ່າ, ຖ້າຕ້ອງການໄປທ່ຽວກິນອາກາດສົດໆເລາະຊົມພູຜາປ່າໄມ້ນັບແຕ່ເມືອງທ່າແຂກຂຶ້ນໄປແຖວຍົມມະລາດ, ມະຫາໄຊ ແວ່ຊົມຄວາມງາມ ແລະ ຄວາມອາລັງການຂອງເຂື່ອນນ້ຳເທີນສອງ, ຈາກນັ້ນກໍໂງໂຄ້ງໄປໃສ່ເມືອງຄໍາເກີດ ເພື່ອຊົມທໍາມະຊາດພູຜາປ່າໄມ້ກໍອີ່ມເອີບຢ່າງເຫລືອເຟືອ. ໃນເຂດນີ້ຍັງແວ່ຊົມຜາຫີນໜາມໜໍ່ອັນສວຍສົດງົດງາມປານພະອິນມາປັ້ນແຕ່ງ, ມະຫາຜາຫີນທີ່ສວຍງາມນີ້ພວມຢູ່ໃນໄລຍະຄົ້ນຄວ້າ ແລະ ສະເໜີເປັນມໍລະດົກໂລກ. ນອກຈາກສິ່ງທີ່ໄດ້ກ່າວມານີ້ແລ້ວ, ໃນດ້ານຮີດຄອງປະເພນີການນຸ່ງຖື, ການຂັບການລໍາກໍເປັນທີ່ມ່ວນຊື່ນເລືອງລື ແລະ ກາຍເປັນເອກະລັກຂອງທ້ອງຖິ່ນໄດ້ຢ່າງກົມກືນ. ຄົນແຂວງຄໍາມ່ວນຖ້າໄດ້ຍິນສຽງລໍາມະຫາໄຊກໍປານວ່າໄດ້ກິນຢາຊູກໍາລັງຄິດເຫັນໜ້າພໍ່ແມ່, ຄິດຮອດບ້ານເກີດເມືອງນອນ, ຄິດເຫັນທຸກສິ່ງທຸກຢ່າງທີ່ໄດ້ເຕີບໃຫຍ່ຢູ່ກັບທົ່ງໄຮ່ທົ່ງນາ, ພໍເຖິງເດືອນສິບເອັດໄດ້ກ່ຽວເຂົ້ານາ, ໄດ້ກິນປາລົງຕ້ອນຄວາມສຸກນັ້ນເປັນສິ່ງທີ່ຫາຍາກສໍາລັບປະເທດທີ່ຈະເລີນກ້າວໜ້າທາງດ້ານວັດຖຸ.
ຈາກສິ່ງທີ່ທິດກໍ່າໄດ້ພັນລະນາມານີ້ ຈຶ່ງຖືວ່າແຂວງຄໍາມ່ວນຈັ່ງແມ່ນຄັກສົມນາມງາມສົມຊື່ແລະ ນອກຈາກສິ່ງທີ່ບໍ່ທັນໄດ້ພັນລະນາມານີ້, ແຂວງຄໍາມ່ວນກໍຍັງມີຫລາຍສິ່ງຫລາຍຢ່າງທີ່ຫລາກຫລາຍດ້ວຍຕໍານານພື້ນແຜ່ນທີ່ລຶກລັບ ແລະ ມະຫັດສະຈັນ ເຊິ່ງໄດ້ແອບແຝງຢູ່ກັບຄວາມຮູ້ສຶກຂອງຄົນໃນທ້ອງຖິ່ນຈົນກາຍເປັນປະເພນີ ແລະ ວັດທະນະທໍາອັນດີງາມເທົ່າຜອງທຸກວັນນີ້. ອີກປະການໜຶ່ງປະຊາຊົນຊາວແຂວງຄໍາມ່ວນຍັງມີມູນເຊື້ອພິລະອາດຫານໃນການຕໍ່ສູ້ກັບສັດຕູເພື່ອປົກປ້ອງມາຕຸພູມ, ບັ້ນຮົບທີ່ເດັ່ນສຸດກໍແມ່ນບັ້ນຮົບຕໍ່ສູ້ກັບຝຣັ່ງຜູ້ຮຸກຮານໃນວັນທີ 21 ມີນາ 1946 ໂດຍການນໍາພາຂອງສະເດັດເຈົ້າສຸພານຸວົງ.
ພໍຕົກມາຮອດຍຸກສ້າງສາພັດທະນາປະເທດຊາດ, ແຂວງຄໍາມ່ວນດິນແດນພິລະອາດຫານກໍພວມກ້າວເດີນໄປບົນເສັ້ນທາງແຫ່ງຂະບວນວິວັດທະນາການຂອງຍຸກສະໄໝ. ປັດຈຸບັນແຂວງຄໍາມ່ວນມີໂຄງການ ແລະ ກິດຈະການຫລາຍແຫ່ງທີ່ພວມດໍາເນີນໄປຢ່າງເຄັ່ງຮ້ອນ,ໂຄງການທີ່ໃຫຍ່ກໍຄືເຂດເສດຖະກິດສະເພາະ. ນອກນັ້ນ ແຂວງຄໍາມ່ວນຍັງມີບັນດາເຂື່ອນທີ່ເປັນການລົງທຶນຂອງຕ່າງປະເທດ ໄດ້ແກ່ເຂື່ອນເທີນຫີນບູນ, ເຂື່ອນນ້ຳເທີນສອງ ແລະເຂື່ອນອື່ນໆທີ່ພວມລົງມືກໍ່ສ້າງ. ໃນບັນດາໂຄງການ ແລະ ກິດຈະການຕ່າງໆໄດ້ສ້າງເງື່ອນໄຂກະຕຸກຊຸກຍູ້ການພັດທະນາທ້ອງຖິ່ນໄດ້ເປັນຢ່າງດີ.
ແນວໃດກໍຕາມ, ທິດກໍ່າວ່ານອກຈາກຜົນງານ ແລະ ສິ່ງເອື້ອອໍານວຍທີ່ກ່າວມາຂ້າງເທິງນີ້ ແຂວງຄໍາມ່ວນຍັງຕ້ອງໄດ້ປັບປຸງໃນຫລາຍດ້ານເພື່ອຮອງຮັບໃຫ້ປີທ່ອງທ່ຽວລາວທີ່ຈະມາເຖິງ ເປັນຕົ້ນເລື່ອງຖະໜົນຫົນທາງໄປຍັງສະຖານທີ່ທ່ອງທ່ຽວແຕ່ລະແຫ່ງມັນເປັນບວກຂຸມແລະ ເປ່ເພຫລາຍບ່ອນ, ການບໍລິການດ້ານອາຫານ ແລະ ໂຮງແຮມກໍຂ້ອນຂ້າງມາດຕະຖານບໍ່ສູງ, ຄ່າບໍລິການຍວດຍານພາຫະນະຕຸກໆຈໍາໂບ້ໃຫ້ຢູ່ໃນເກນທີ່ເໝາະສົມບໍ່ໃຫ້ແພງຈົນເກີນເຫດ ເຊັ່ນວ່າຄ່າບໍລິການເຂົ້າຊົມຖ້ຳແອ່ນຫົວຄົນໜຶ່ງ 20.000 ກີບ ເຮົາເຫັນວ່າມັນແພງໂພດ ເຫັນຄວນຢູ່ໃນລະດັບ 10.000 ກີບແມ່ນເໝາະສົມທີ່ສຸດ. ນອກນັ້ນກໍແມ່ນປັບປຸງແຫລ່ງທ່ອງທ່ຽວໃຫ້ກາຍເປັນທີ່ຍອມຮັບ ແລະ ຈັບໃຈຂອງຄົນຜູ້ໄປທ່ຽວຊົມ ຈຶ່ງຈະສົມກັບວ່າ ແຂວງຄໍາມ່ວນຄັກສົມນາມງາມສົມຊື່ເລືອງລືໄປດ້ວຍສິລະປະວັດທະນະທໍາຂອງຄົນໃຈກວ້າງ.
