ລັດຖະບານຈະເລັ່ງແກ້ໄຂບັນຫາເງິນເຟີ້, ອັດຕາແລກປ່ຽນ ແລະ ຄວບຄຸມບໍ່ໃຫ້ສວຍໂອກາດຂຶ້ນລາຄາສິນຄ້າໃນບຸນປີໃໝ່ລາວ

ກອງປະຊຸມສະໄໝສາມັນຂອງລັດຖະບານປະຈຳເດືອນມີນາ ທີ່ດຳເນີນໄປໃນ ວັນທີ 26-27 ມີນາ 2024, ໂດຍການເປັນປະທານ ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ. ໄດ້ກຳນົດ ທິດທາງແຜນການທີ່ຈະສຸມໃສ່ຈັດຕັ້ງປະຕິບັດ ປະຈຳເດືອນເມສາ 2024 ມີຫຼາຍດ້ານເປັນຕົ້ນ ແມ່ນວຽກ ງານປ້ອງກັນຊາດ-ປ້ອງກັນຄວາມສະຫງົບ: ສືບຕໍ່ຈັດຕັ້ງປະຕິບັດຕາມ 4 ໜ້າທີ່ໃຫຍ່ 26 ແຜນງານ ຢ່າງຕັ້ງໜ້າ ແລະ ຕໍ່ເນື່ອງ ເພື່ອຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບ ຕາມບໍລິເວນຊາຍແດນ, ພ້ອມທັງສຸມໃສ່ວຽກງານກໍ່ສ້າງຮາກຖານການເມືອງ ໃຫ້ມີຄວາມໜັກແໜ້ນ ເຂັ້ມແຂງ ຮອບດ້ານ, ສຸມໃສ່ຈັດຕັ້ງປະຕິບັດ 4 ແຜນງານ 41 ໂຄງການ, ເອົາໃຈໃສ່ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ເປັນຕົ້ນ ການແກ້ໄຂບັນຫາຢາເສບຕິດ, ລັກຊັບ, ອຸບັດເຫດ ແລະ ອັກຄີໄພຕ່າງໆ. ຄຸ້ມຄອງ ອາວຸດເຖື່ອນ ແລະ ອາວຸດດັດແປງ. ສະກັດກັ້ນການກໍ່ອາຊະຍາກໍາທາງໄຊເບີ ລວມທັງການນຳໃຊ້ສື່ສັງຄົມອອນລາຍ; ຂົງເຂດ ພະລັງງານ ແລະ ບໍ່ແຮ່; ຂົງເຂດອຸດສາຫະກຳ ແລະ ການຄ້າ; ຂົງເຂດໂຍທາທິການ ແລະ ຂົນສົ່ງ; ຂົງເຂດ ກະສິກຳ ແລະ ປ່າໄມ້; ຂົງເຂດຊັບພະຍາກອນທຳມະຊາດ ແລະ ສິ່ງແວດລ້ອມ; ຂົງເຂດວຽກງານວັດທະນະທຳ-ສັງຄົມ; ຂົງເຂດວຽກງານການຕ່າງປະເທດ ໃຫ້ດຳເນີນໄປຕາມແຜນການທີ່ກຳນົດໄວ້ຢ່າງມີປະສິດທິຜົນສູງ.

ອັນສຳຄັນຮີບດ່ວນແມ່ນ ການແກ້ໄຂວຽກງານເຄັ່ງຮ້ອນ ທາງດ້ານເສດຖະກິດ: ສຸມໃສ່ແກ້ໄຂບັນຫາເງິນເຟີ້, ອັດຕາແລກປ່ຽນ, ຄຸ້ມຄອງລາຄາສິນຄ້າເຄື່ອງອຸປະໂພກ-ບໍລິໂພກ ທີ່ມີຜົນກະທົບຕໍ່ຊີວິດການເປັນຢູ່ຂອງພະນັກງານ, ທະຫານ, ຕໍາຫລວດ ໂດຍສະເພາະ ໃນໄລຍະເທດສະການປີໃໝ່ລາວ ໃນເດືອນເມສາ, ບໍ່ໃຫ້ສວຍໂອກາດຂຶ້ນລາຄາສິນຄ້າ. ຊຸກຍູ້ບັນດາແຂວງສຸມໃສ່ການຜະລິດເພື່ອທົດແທນການນຳເຂົ້າ. ສຸມໃສ່ປະຕິບັດບັນດາມາດຕະການຮັບມືສະພາບຄວາມສ່ຽງໃນການຂາດແຄນນ້ຳມັນເຊື້ອໄຟ, ບັນຫາໄຟຟ້າບໍ່ພຽງພໍ ດ້ວຍການສົ່ງເສີມການປະຢັດພະລັງງານ, ສຸມໃສ່ເກັບລາຍຮັບເຂົ້າງົບປະມານລັດ ໃຫ້ໄດ້ຫລາຍຂຶ້ນ,ສືບຕໍ່ຄຸ້ມຄອງການນຳເຂົ້າ-ສົ່ງອອກໃຫ້ເຄັ່ງຄັດ, ສະກັດກັ້ນການລັກລອບໜີພາສີ, ການຄ້າ-ຂາຍນອກລະບົບ ທຸກຮູບແບບຕາມຂອບເຂດຊາຍແດນ.

ຕິດຕາມເກັບກຳຂໍ້ມູນ ສະພາບການເໜັງຕີງລາຄາສິນຄ້າ ໃຫ້ຮູ້ໄດ້ສາເຫດການຂຶ້ນ-ລົງ ເພື່ອປະຕິບັດມາດຕະການໃນການຄຸ້ມຄອງລາຄາສິນຄ້າໃຫ້ທັນກັບສະພາບການ; ຕິດຕາມຢ່າງໃກ້ຊິດການສະໜອງນ້ຳມັນເຊື້ອໄຟ ແລະ ຄົ້ນຄວ້າມາດຕະການແກ້ໄຂ ສະພາບການຂາດແຄນທີ່ອາດເກີດຂຶ້ນ ດ້ວຍຫລາຍວິທີ ແລະ ຫລາຍມາດຕະການ ໃຫ້ທັນກັບສະພາບການ.