ຫສນຍ ເຜີຍແຜ່ກົດໝາຍວ່າດ້ວຍລັດຖະບານ ແລະ ຕິນິກຳທີ່ກ່ຽວຂ້ອງ

ວັນທີ 29 ມີນາ 2024 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ເຜີຍແຜ່ກົດໝາຍວ່າດ້ວຍລັດຖະບານ ແລະ ຕິນິກຳທີ່ກ່ຽວຂ້ອງ ໃຫ້ກະຊວງ-ອົງການຂັ້ນສູນກາງ ແລະ ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະ ມົນຕີ, ມີທ່ານຮອງຫົວໜ້າຫ້ອງວ່າການສູນກາງພັກ, ບັນດາຮອງລັດຖະມົນຕີ ກະຊວງກ່ຽວຂ້ອງເຂົ້າຮ່ວມ.

ການເຜີຍແຜ່ກົດໝາຍວ່າດ້ວຍລັດຖະບານ ແລະ ນິຕິກຳທີ່ກ່ຽວຂ້ອງຄັ້ງນີ້, ແນໃສ່ໃຫ້ບັນດາກະຊວງ-ອົງ ການຂັ້ນສູງກາງ ແລະ ນະຄອນຫລວງວຽງຈັນ ມີຄວາມຮັບຮູ້, ເຂົ້າໃຈ ຢ່າງເລິກເຊິງ ພ້ອມທັງສາມາດນໍາໄປຈັດຕັ້ງປະຕິບັດ ໄດ້ຢ່າງເປັນເອກະພາບ, ມີປະສິດທິພາບ ແລະ ປະສິດທິຜົນ. ສໍາລັບເນື້ອໃນຂອງກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການລາຍງານ 6 ເອກະສານສໍາຄັນ ຄື: ການເຜີຍແຜ່ກົດໝາຍ ລັດຖະບານ; ຂໍ້ຕົກລົງ ເລກທີ 41/ນຍ ວ່າດ້ວຍລະບຽບການ ແລະ ກົນໄກການເຮັດວຽກຂອງລັດຖະບານ ຊຸດທີ 9; ການຕິດຕາມການປະຕິບັດກົດໝາຍ; ການສ້າງເອກະສານທາງການ; ການສ້າງຄວາມເຂັ້ມແຂງກ່ຽວກັບວຽກງານຄົ້ນຄວ້າ-ສັງລວມ; ການສ້າງຄວາມເຂັ້ມ ແຂງວຽກງານໂຄສະນາປະຊາສຳພັນຕິດພັນກັບ ການຫັນເປັນທັນສະໄໝ ຂອງຫ້ອງວ່າການສຳນັກງານນາຍົກລັດຖະ ມົນຕີ. ນອກນັ້ນ, ຍັງຈະໄດ້ມີການແລກປ່ຽນຄຳຄິດເຫັນ ກ່ຽວກັບຜົນສຳເລັດ, ຂໍ້ຈໍາກັດ, ສິ່ງທ້າທ້າຍ ແລະ ກາລະໂອກາດ ໃນຂະບວນການສ້າງນິຕິກຳ ເພື່ອເປັນຂໍ້ມູນນຳໄປປັບປຸງຄຸນນະພາບຂອງນິຕິກຳ ໃຫ້ສາມາດຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ ປະສິດທິຜົນ.

ໃນໂອກາດກ່າວເປີດ, ປະທານກອງປະຊຸມ ໄດ້ຮຽກຮ້ອງມາຍັງຜູ້ເຂົ້າຮ່ວມ ຈົ່ງພ້ອມກັນຄົ້ນຄວ້າ ແລະ ເຊື່ອມຊຶມເອກະສານຕ່າງໆ ເພື່ອຄວາມເປັນເອກະພາບ ໃນການຈັດຕັ້ງປະຕິບັດກົດໝາຍດັ່ງກ່າວ ແລະ ພ້ອມກັນປະກອບຄຳເຫັນຢ່າງມີຈຸດສຸມ, ນຳສະເໜີວິທີແກ້ໄຂທີ່ເໝາະສົມ, ສອດຄ່ອງກັບສະພາບຕົວຈິງ ຢ່າງກົງໄປກົງມາ, ລົງເລິກປະກອບຄຳເຫັນ ຕໍ່ການແກ້ໄຂບັນຫາທີ່ເກີດຂຶ້ນ ໃນປັດຈຸບັນ ແລະ ສິ່ງທ້າທາຍ ໃນຕໍ່ໜ້າ. ພາຍຫລັງສຳເລັດກອງປະຊຸມໃນຄັ້ງນີ້, ຈະໄດ້ນຳເອົາບົດຮຽນໄປຜັນຂະຫຍາຍ ໃຫ້ເກີດໝາກຜົນເປັນຮູບປະທຳຕົວຈິງ.