ລັດຖະມົນຕີປ້ອງກັນຄວາມສະຫງົບ, ພາຍໃນ ກຳປູເຈຍ-ລາວ-ຫວຽດນາມຄັ້ງທີ 1 ຕົກລົງເຫັນດີຮ່ວມ 7 ບັນຫາທີ່ສຳຄັນ
ວັນທີ 29 ມີນາ 2024 ທ່ານຮອງນາຍົກ ລັດຖະມົນຕີປ້ອງກັນຄວາມສະຫງົບ ເຂົ້າຮ່ວມກອງປະຊຸມ ລັດຖະມົນຕີປ້ອງກັນຄວາມສະຫງົບ ພາຍໃນ ກຳປູເຈຍ-ລາວ-ຫວຽດນາມ ຄັ້ງທີ 1 ໄດ້ຈັດຂຶ້ນໃນ ຢູ່ທີ່ນະຄອນດານັງ, ສສ ຫວຽດນາມ ໂດຍການເປັນປະທານຮ່ວມຝ່າຍກຳປູເຈຍ ໂດຍ ທ່ານ ອະພິສັນຕິບັນດິດ ຊໍ ສົກຂາ ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນກຳປູເຈຍ, ຝ່າຍລາວ ໂດຍ ທ່ານ ພົອ ວິໄລ ຫຼ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ແລະ ທ່ານ ພົອ ໂຕ ເລິມ ລັດຖະມົນຕີກະຊວງປ້ອງກັນ ຄວາມສະຫງົບຫວຽດນາມ ພ້ອມດ້ວຍຄະນະຜູ້ແທນທັງສາມກະຊວງເຂົ້າຮ່ວມ.
ໃນກອງປະຊຸມ ບັນດາທ່ານລັດຖະມົນຕີສາມກະຊວງ ໄດ້ຜັດປ່ຽນກັນຂຶ້ນນຳສະເໜີສະພາບການຂອງໂລກ, ພາກພື້ນ ແລະ ພາຍໃນປະເທດຂອງຕົນ; ພ້ອມທັງເຫັນດີໃນການສືບຕໍ່ຮັດ ແໜ້ນສາຍພົວພັນ ແລະ ການຮ່ວມມືຂອງສາມກະຊວງ ໃຫ້ນັບມື້ເພີ່ມທະວີຂຶ້ນໄປເລື້ອຍໆ; ກອງປະຊຸມຄັ້ງນີ້ແມ່ນມີຄວາມໝາຍ -ຄວາມສຳຄັນຢ່າງຍິ່ງ ເຊິ່ງຈະໄດ້ຮ່ວມມືກັນໃນຫຼາຍດ້ານ ເປັນຕົ້ນແມ່ນ ການເພີ່ມທະວີຮ່ວມມືຕໍ່ສູ້ຕ້ານອາຊະຍາກຳຄ້າມະນຸດ, ການປະສານສົມທົບສະກັດກັ້ນ ແລະ ຕ້ານຢາເສຍຕິດ, ຍົກສູງໝາກຜົນການຮ່ວມມືໃນຂົງເຂດສັນຕິບານ ປະກອບສ່ວນໃນການ ປ້ອງກັນຄວາມສະຫງົບແຫ່ງຊາດ ໃນສະພາບການໃໝ່ ແລະ ຮັກ ສາຄວາມສະຫງົບບໍລິເວນຊາຍແດນຕິດຈອດ ກໍ່ຄືເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ (CLV).
ທ່ານ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດ ຖະມົນຕີກະຊວງປ້ອງກັນຄວາມສະຫງົບລາວ ໄດ້ຕາງໜ້າໃຫ້ຄະ ນະຜູ້ແທນຂັ້ນສູງກະຊວງປ້ອງກັນຄວາມສະຫງົບລາວ; ຝາກຄວາມຢື້ຢາມຖາມຂ່າວອັນອົບອຸ່ນຄວາມສາມັກຄີຮັກແພງຈາກ ຄະນະນໍາກະຊວງ ແລະ ພະນັກງານນັກຮົບ ໃນທົ່ວກໍາລັງປ້ອງກັນຄວາມສະຫງົບລາວ ມາຍັງ-ບັນດາທ່ານໃນທົ່ວກໍາລັງປ້ອງກັນຄວາມສະຫງົບ- ຄະນະນໍາ, ກະຊວງພາຍໃນກຳປູເຈຍ ແລະ ຫວຽດນາມ.
ທັງນີ້ ກໍເພື່ອຮ່ວມກັນສະກັດກັ້ນ ແລະ ຕ້ານການເຄື່ອນໄຫວກໍ່ອາຊະຍາກຳທຸກຮູບແບບ ເພື່ອຜົນປະໂຫຍດລວມຂອງສາມປະເທດ ກຳປູເຈຍ-ລາວ-ຫວຽດນາມ.
ຈາກນັ້ນ, ລັດຖະມົນຕີສາມກະຊວງກໍໄດ້ອອກຖະແຫຼງການ ຮ່ວມ 7 ບັນຫາທີ່ສຳຄັນ ເພື່ອຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ເພື່ອສະຖຽນລະພາບ ແລະ ການພັດທະນາເສດຖະກິດ – ສັງຄົມ ຂອງແຕ່ລະປະເທດ; ກໍຄືການຮັບມືຢ່າງມີປະສິດທິພາບ ຕໍ່ສິ່ງທ້າທາຍຕ່າງໆດ້ານຄວາມ ສະຫງົບ ທີ່ກຳລັງເກີດຂຶ້ນ ລວມທັງອາຊະຍາກຳຂ້າມຊາດຢູ່ພາກ ພື້ນ ແລະ ສາກົນ ໃນສະພາບການຟື້ນຟູເສດຖະກິດ – ສັງຄົມ ຫຼັງ ຈາກສາມປະເທດພົບກັບການແພເລະບາດຂອງພະຍາດ; ເພື່ອຫັນເອົາເນື້ອໃນຈິດໃຈ ຂອງການພົບປະ ລະຫວ່າງ ຜູ້ນຳຂັ້ນສູງ ສຸດ ກຳປູເຈຍ – ລາວ – ຫວຽດນາມ ໃນຄັ້ງວັນທີ 06 ກັນຍາ 2023 ຢູ່ນະຄອນຫຼວງຮ່າໂນ້ຍ ໃຫ້ເປັນຮູບປະທຳ, ເຊິ່ງຮັບຮູ້ເຖິງຄວາມຈຳເປັນໃນການ ສືບຕໍ່ການຮ່ວມມືຕາມກົນໄກທີ່ມີຢູ່.ຈັດຕັ້ງຜັນຂະຫຍາຍເນື້ອໃນຂອງການພົບປະ ລະຫວ່າງ ນາຍົກລັດຖະ ມົນຕີຂອງທັງສາມປະເທດ ກຳປູເຈຍ – ລາວ – ຫວຽດນາມ ໃນຄັ້ງວັນທີ 17 ທັນວາ 2023 ຢູ່ຍີ່ປຸ່ນ ເພື່ອທົບທວນຄືນບັນດາໝາກຜົນຂອງກອງປະຊຸມລັດຖະມົນຕີ ລະຫວ່າງ ລັດຖະມົນຕີກະຊວງພາຍໃນ ແຫ່ງ ຣາຊະອານາຈັກ ກຳປູເຈຍ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ລັດຖະ ມົນຕີ ກະຊວງປ້ອງກັນຄວາມສະຫງົບ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ທີ່ໄດ້ຈັດຂຶ້ນແບບເຊິ່ງໜ້າ ແລະ ຮູບ ແບບທາງໄກ ໃນປີ 2011, 2014, ແລະ 2022.
