ອິດສະລາແອນປະທ້ວງໃຫຍ່ໄລທ່ານ ເນທັນຢາຮູ ຮຽກຮ້ອງປ່ອຍຕົວປະກັນ
ປະຊາຊົນອິດສະລາແອນຫລາຍໝື່ນຄົນ ລວມທັງຝ່າຍຄ້ານ ແລະ ສະມາຊິກຄອບຄົວຕົວປະກັນທີ່ຢູ່ເຂດກາຊາ ພາກັນໄປຊຸມນຸມຢູ່ໜ້າອາຄານລັດຖະສະພາໃນນະຄອນເຢລູຊາເລັມໃນວັນທີ 31 ມີນາ ເພື່ອຮ່ວມປະທ້ວງໃຫຍ່ ທ່າມກາງການຮຽກຮ້ອງໃຫ້ລັດຖະບານ ແລະ ນາຍົກລັດຖະມົນຕີ ເບນຈາມິນ ເນທັນຢາຮູ ລາອອກ ເພື່ອເປີດທາງໃຫ້ມີການເລືອກຕັ້ງໃໝ່ ແລະ ຮຽກຮ້ອງໃຫ້ບັນລຸຂໍ້ຕົກລົງຢຸດຍິງກັບຮາມັດ ເພື່ອນໍາໄປສູ່ການປ່ອຍຕົວປະກັນທັງໝົດຢູ່ກາຊາ.
ການປະທ້ວງຄັ້ງນີ້ຖືເປັນການປະທ້ວງຄັ້ງໃຫຍ່ທີ່ສຸດນັບແຕ່ສົງຄາມເລີ່ມຂຶ້ນຈາກການໂຈມຕີຂອງກຸ່ມຮາມັດໃນວັນທີ 7 ຕຸລາ 2023 ເຊິ່ງຮອດປັດຈຸບັນຍັງມີຕົວປະກັນທີ່ຖືກກັກຂັງຢູ່ກາຊາ 130 ກວ່າຄົນ.
ໂດຍຜູ້ຈັດການປະທ້ວງຄືກຸ່ມແນວຮ່ວມຕໍ່ຕ້ານລັດຖະບານອິດສະລາແອນ ເຊິ່ງລວມທັງກຸ່ມ Kaplan Force ແລະ ກຸ່ມ Brothers in Arms ວາງແຜນຈະຈັດປະທ້ວງໃຫຍ່ຕໍ່ເນື່ອງເປັນເວລາ 4 ວັນ ເພື່ອສະແດງຄວາມບໍ່ພໍໃຈຕໍ່ຄວາມລົ້ມເຫລວໃນການປະຕິບັດໜ້າທີ່ຂອງລັດຖະບານ ເນທັນຢາຮູ ໂດຍສະເພາະກໍລະນີການຊຸກຍູ້ກົດໝາຍຍົກເວັ້ນການເກນທະຫານສໍາລັບເຍົາວະຊົນຊາວຢິວນິກາຍອໍໂທດອກ (Ultra-Orthodox) ເຊິ່ງຜູ້ຊຸມນຸມເບິ່ງວ່າເປັນທ່າທີທີ່ບໍ່ໄດ້ຄໍານຶງເຖິງປະຊາຊົນທີ່ໄດ້ຮັບຜົນກະທົບຈາກສົງຄາມກັບກຸ່ມຮາມັດ.
ທ່ານ ຢາອີ ລາປິດ ຜູ້ນໍາຝ່າຍຄ້ານ ກ່າວຕໍ່ຜູ້ຊຸມນຸມວ່າ: ທ່ານ ເນທັນຢາຮູ ໃຫ້ຄວາມສໍາຄັນຕໍ່ການຮັກສາພັນທະມິດໃນລັດຖະບານປະສົມຂອງທ່ານຫລາຍກວ່າການຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກສົງຄາມ.
ທັງນີ້, ການປະທ້ວງໂດຍລວມຢູ່ໜ້າລັດຖະສະພາເປັນໄປຢ່າງສະຫງົບ, ແຕ່ບໍລິເວນນອກພື້ນທີ່ພົບວ່າມີກຸ່ມຜູ້ປະທ້ວງບາງຄົນພະຍາຍາມສ້າງຄວາມວຸ້ນວາຍ ດ້ວຍການປິດຖະໜົນ ແລະ ຂົວ ແລະ ຈູດໄຟເຜົາສິ່ງຂອງ ເຮັດໃຫ້ຕໍາຫລວດຕ້ອງເຂົ້າຄວບຄຸມສະຖານະການ ແລະ ເກີດການປະທະ ແລະ ມີການຈັບຜູ້ປະທ້ວງຢ່າງໜ້ອຍ 1 ຄົນ.
ອ້າງອີງ:
- https://www.timesofisrael.com/tens-of-thousands-throng-knesset-at-start-of-4-day-protest-against-government/
- https://www.aljazeera.com/news/2024/3/31/israelis-stage-largest-anti-government-protest-since-gaza-war-began
- https://edition.cnn.com/middleeast/live-news/israel-hamas-war-gaza-news-03-31-24/index.html
- https://www.reuters.com/world/middle-east/tens-thousands-rally-against-netanyahu-government-jerusalem-2024-03-31/
