ເມືອງຄຳເກີດ ມີຜູ້ເສຍຊີວິດ 1 ຄົນ ແລະ ໄດ້ຮັບບາດເຈັບ 14 ຄົນ ຈາກພະຍຸພັດຜ່ານ
ວັນທີ 1 ເມສາ 2024, ທ່ານ ບຸນຍົມ ຫລວງບຸນມາ ປະທານຄະນະກໍາມະການຄຸ້ມຄອງໄພພິບັດ ເມືອງຄໍາເກີດ, ແຂວງບໍລິຄໍາໄຊ ໃຫ້ສໍາພາດຜ່ານລາຍການຮອບບ້ານຜ່ານເມືອງ ວິທະຍຸກະຈາຍສຽງແຫ່ງຊາດລາວ ວ່າ: ລົມພະຍຸທີ່ພັດຜ່ານເທດສະບານເມືອງຄໍາເກີດໃນຕອນເຊົ້າວັນທີ 29 ມີນາ ຜ່ານມາ ເຮັດໃຫ້ມີລົມແຮງ, ຝົນ ແລະ ໝາກເຫັບຕົກ ເປັນເວລາບໍ່ຮອດເຄິ່ງຊົ່ວໂມງ ແຕ່ໄດ້ສ້າງຄວາມເສຍຫາຍໃຫ້ທັງໝົດ 11 ບ້ານພາຍໃນເທດສະບານເມືອງ, ໃນນີ້ ມີເຮືອນ, ໂຮງຮຽນ, ຮ້ານອາຫານ, ປໍ້ານໍ້າມັນ ແລະ ອາຄານຕ່າງໆ ເສຍຫາຍ 788 ຫລັງ, ລະບົບໄຟຟ້າ ແລະ ນໍ້າປະປາໄດ້ຮັບຄວາມເສຍຫາຍຫລາຍສົມຄວນ. ຮ້າຍແຮງກວ່ານັ້ນ ມີຜູ້ເສຍຊີວິດ 1 ຄົນ ເປັນເພດຊາຍ ອາຍຸ 61 ປີ ຢູ່ບ້ານໂພນແພງ ຍ້ອນກະເບື້ອງມຸງຫຼັງຄາຕົກໃສ່ ແລະ ໄດ້ຮັບບາດເຈັບ 14 ຄົນ.
ສໍາລັບຜູ້ທີ່ໄດ້ຮັບບາດເຈັບເບື້ອງຕົ້ນສົ່ງມາປິ່ນປົວຢູ່ນະຄອນຫລວງວຽງຈັນ, ໂຮງໝໍແຂວງຄໍາມ່ວນ ແລະ ປະເທດໃກ້ຄຽງ, ເຊິ່ງປັດຈຸບັນທຸກຄົນມີອາການດີຂຶ້ນ ແລະ ກັບຄືນໄປປິ່ນປົວຢູ່ເຮືອນຂອງຕົນເອງແລ້ວ. ສ່ວນລະບົບໄຟຟ້າ ແລະ ນໍ້າປະປາທີ່ໄດ້ຮັບຄວາມເສຍຫາຍ ໜ່ວຍງານທີ່ກ່ຽວຂ້ອງໄດ້ສ້ອມແປງຄືນສໍຳເລັດແລ້ວປະມານ 80%, ເຊັ່ນດຽວກັບບັນດາໂຮງຮຽນທີ່ໄດ້ຮັບຄວາມເສຍຫາຍກໍໄດ້ສ້ອມແປງເພື່ອໃຫ້ນັກຮຽນໄດ້ກັບຄືນມາຮຽນໜັງສືປົກກະຕິແລ້ວ.
ຂ່າວ: ວິທະຍຸກະຈາຍສຽງແຫ່ງຊາດລາວ
