ແຜ່ນດິນໄຫວຢູ່ໄຕ້ຫວັນ ມີຜູ້ເສຍຊີວິດແລ້ວ 7 ຄົນ ບາດເຈັບ 700 ກວ່າຄົນ
ລັດຖະບານໄຕ້ຫວັນລາຍງານວ່າມີຜູ້ເສຍຊີວິດແລ້ວຢ່າງໜ້ອຍ 7 ຄົນ ແລະ ບາດເຈັບ 711 ຄົນ ຈາກແຜ່ນດິນໄຫວຂະໜາດ 7,4 ທີ່ເກີດຂຶ້ນນອກຊາຍຝັ່ງເມືອງຮົວຫລຽນ ທາງຕາເວັນອອກ ຕອນເຊົ້າວັນທີ 3 ເມສາ ເຊິ່ງຖືເປັນແຜ່ນດິນໄຫວຄັ້ງຮຸນແຮງທີ່ສຸດຂອງໄຕ້ຫວັນໃນຮອບ 25 ປີ.
ຜົນກະທົບຈາກແຜ່ນດິນໄຫວສົ່ງຜົນເຮັດໃຫ້ອາຄານພັງຖະຫລົ່ມ ແລະ ໄດ້ຮັບຄວາມເສຍຫາຍຫລາຍກວ່າ 100 ຫລັງໃນຫລາຍເມືອງ ແລະ ມີປະຊາຊົນຢ່າງໜ້ອຍ 77 ຄົນຕົກຄ້າງຢູ່ພາຍໃນອາຄານ ເຊິ່ງໜ່ວຍກູ້ໄພກໍາລັງເລັ່ງດໍາເນີນການຊ່ວຍເຫລືອ ແລະ ມີລາຍງານກະແສໄຟຟ້າດັບເປັນວົງກວ້າງ ກະທົບປະຊາຊົນຫລາຍກວ່າ 3 ແສນຄອບຄົວທົ່ວໄຕ້ຫວັນ ເຊິ່ງທາງການກໍາລັງເລັ່ງສ້ອມແປງ.
ໄຕ້ຫວັນ, ຍີ່ປຸ່ນ ແລະ ຟີລິບປິນ ໄດ້ຍົກເລີກປະກາດເຕືອນໄພສຶນາມິແລ້ວ ໂດຍກົມອຸຕຸນິຍົມວິທະຍາຂອງຍີ່ປຸ່ນ ລາຍງານວ່າ: ມີຄື້ນສຶນາມິຂະໜາດນ້ອຍຫລາຍລູກທີ່ພັດໄປຮອດຝັ່ງແຂວງໂອກິນາວາ.
ຂະນະທີ່ລົດໄຟໂດຍສານ ແລະ ຖ້ຽວບິນຕ່າງໆທີ່ໂຈະໃຫ້ບໍລິການຊົ່ວຄາວຫລັງແຜ່ນດິນໄຫວທະຍອຍກັບມາໃຫ້ບໍລິການແລ້ວ ໂດຍບໍ່ພົບວ່າມີຄວາມເສຍຫາຍໃດໆຕໍ່ສະໜາມບິນ ຫລື ລະບົບລົດໄຟ.
ອ້າງອີງ:
- https://www.reuters.com/world/asia-pacific/strong-72-magnitude-earthquake-hits-taipei-2024-04-03/
- https://edition.cnn.com/asia/live-news/taiwan-earthquake-hualien-tsunami-warning-hnk-intl/index.html
- https://www.bbc.com/news/live/world-asia-68720022?src_origin=BBCS_BBC
