ອີຣານເຜີຍ ອິດສະລາແອນໂຈມຕີສະຖານກົງກຸນຢູ່ຊິຣີ ສັງຫານຜູ້ບັນຊາການກອງທັບ
ກອງກໍາລັງຮັກສາການປະຕິວັດອີຣານ (Revolutionary Guard Corps: IRGC) ຂອງອີຣານ ອອກຖະແຫລງການໃນວັນທີ 1 ເມສາ ຢືນຢັນວ່າ: ພົນຈັດຕະວາ ໂມຮໍາໝັດ ເຣຊາ ຊາເຮດີ (Mohammad Reza Zahedi) ຜູ້ບັນຊາການອາວຸໂສຂອງໜ່ວຍຮົບພິເສດຄຸດ (Quds) ເປັນ 1 ໃນ 7 ເຈົ້າໜ້າທີ່ຂອງອີຣານທີ່ເສຍຊີວິດຈາກກໍລະນີອິດສະລາແອນໂຈມຕີທາງອາກາດ ຖະຫລົ່ມອາຄານສະຖານກົງສຸນອີຣານຢູ່ນະຄອນຫລວງດາມັດກັດຂອງຊິຣີ.
ຜູ້ເສຍຊີວິດຄົນອື່ນໆ ລວມທັງ ພົນຈັດຕະວາ ໂມຮໍາໝັດ ຮາດີ ຮາຈີ-ຣາຮິມີ (Mohammad Hadi Haji-Rahimi) ຮອງຜູ້ບັນຊາການໜ່ວຍຮົບພິເສດຄຸດ ຕະຫລອດຈົນສະມາຊິກ IRGC ອີກ 3 ຄົນ ແລະ ທີ່ປຶກສາຊາວອີຣານອີກ 2 ຄົນ.
ພາຍຫລັງເກີດເຫດ ລັດຖະບານອີຣານ ແລະ ຊິຣີອອກມາປະນາມການໂຈມຕີດັ່ງກ່າວ ທີ່ທໍາລາຍອາຄານສະຖານກົງກຸນອີຣານ ເຊິ່ງຢູ່ຕິດກັບສະຖານທູດອີຣານເປ່ເພເສຍຫາຍ ໂດຍໜ່ວຍກູ້ໄພຂອງຊິຣີໄດ້ເຂົ້າຊ່ວຍເຫລືອຜູ້ບາດເຈັບ ແລະ ນໍາເອົາສົບຜູ້ເສຍຊີວິດອອກຈາກຊາກອາຄານແລ້ວ.
ທ່ານ ຮຸສເຊນ ອັກບາຣີ ເອກອັກຄະລັດຖະທູດອີຣານປະຈໍາຊິຣີ ເຊິ່ງບໍ່ໄດ້ຢູ່ໃນອາຄານເວລາເກີດເຫດ ໃຫ້ສໍາພາດຕໍ່ສະຖານີໂທລະພາບຂອງທາງການອີຣານວ່າ: ການໂຈມຕີດັ່ງກ່າວເປັນຝີມືເຮືອບິນຮົບ F-35.
ຂະນະທີ່ທ່ານ ຮໍເຊນ ອາມີ-ອັບດຸລລາຮຽນ (Hossein Amir-Abdollahian) ລັດຖະມົນຕີກະຊວງການຕ່າງປະເທດຂອງອີຣານ ລະບຸວ່າ: ການໂຈມຕີທີ່ເກີດຂຶ້ນຖືເປັນການລະເມີດພັນທະກໍລະນີ ແລະ ອະນຸສັນຍາສາກົນທັງໝົດ ແລະ ຢືນຢັນວ່າ: ອິດສະລາແອນຈະຕ້ອງຮັບຜິດຊອບຜົນທີ່ຕາມມາຂອງການໂຈມຕີ ແລະ ຮຽກຮ້ອງໃຫ້ມີການຕອບສະໜອງຢ່າງຈິງຈັງຈາກປະຊາຄົມສາກົນ.
ໂດຍທາງກະຊວງການຕ່າງປະເທດອີຣານໄດ້ອອກຖະແຫລງການຢືນຢັນວ່າຈະພິຈາລະນາຕອບໂຕ້ການໂຈມຕີດັ່ງກ່າວ.
ສ່ວນກອງທັບອິດສະລາແອນບໍ່ໄດ້ສະແດງຄວາມເຫັນໃດໆຕໍ່ການໂຈມຕີທີ່ເກີດຂຶ້ນ ເຊິ່ງຜ່ານມາອິດສະລາແອນຍອມຮັບວ່າໄດ້ປະຕິບັດການໂຈມຕີເປົ້າໝາຍຢູ່ຊິຣີຫລາຍຮ້ອຍຄັ້ງໃນໄລຍະຜ່ານມາ ໂດຍອ້າງວ່າເປົ້າໝາຍນີ້ມີການເຊື່ອມໂຍງຕໍ່ອີຣານ ແລະ ກຸ່ມຕິດອາວຸດທີ່ອີຣານສະໜັບສະໜູນ ແລະ ໄດ້ຮັບການຝຶກຝົນໂດຍ IRGC.
ອ້າງອີງ:
- https://www.channelnewsasia.com/world/israel-destroys-iranian-consular-annex-syria-killing-all-inside-4234946
- https://www.aljazeera.com/news/2024/4/1/several-killed-in-israeli-strike-on-iranian-consulate-in-damascus-reports
- https://www.bbc.com/news/world-middle-east-68708923
