ໂຮງຮຽນຢູ່ຟີລິບປິນເກືອບ 4 ພັນແຫ່ງ ປ່ຽນມາຮຽນອອນລາຍຫລັງອາກາດຮ້ອນ
ວັນທີ 3 ເມສາ, ກະຊວງສຶກສາທິການຂອງຟີລິບປິນເປີດເຜີຍວ່າ: ໂຮງຮຽນທົ່ວປະເທດ ຈໍານວນ 3.954 ແຫ່ງ ໄດ້ປ່ຽນໄປໃຊ້ການຮຽນການສອນທາງອອນລາຍ ເພື່ອປົກປ້ອງນັກຮຽນຈາກດັດຊະນີຄວາມຮ້ອນເພີ່ມສູງຂຶ້ນ ທ່າມກາງສະພາບອາກາດຮ້ອນອົບເອົ້າໃນປັດຈຸບັນ.
ລາຍງານລະບຸວ່າ: ໂຮງຮຽນຫລາຍແຫ່ງໂຈະການຮຽນການສອນໃນຊັ້ນຮຽນແບບປົກກະຕິ ເພື່ອນັກຮຽນສາມາດຮຽນຈາກຢູ່ເຮືອນແທນການເດີນທາງມາໂຮງຮຽນ ແລະ ບໍ່ຕ້ອງຜະເຊີນອາກາດຮ້ອນ ໂດຍໂຮງຮຽນເຫລົ່ານີ້ຢູ່ໃນ 11 ພາກພື້ນເຊັ່ນ: ມະຫານະຄອນມະນິລາ ແລະ ມີນັກຮຽນຫລາຍກວ່າ 1,3 ລ້ານຄົນ.
ຂະນະດຽວກັນ, ກະຊວງສາທາລະນະສຸກຂອງຟີລິບປິນເຕືອນສາທາລະນະຊົນລະວັງອາການເຈັບເປັນທີ່ກ່ຽວຂ້ອງກັບອາກາດຮ້ອນ ໂດຍການຜະເຊີນອາກາດຮ້ອນເປັນເວລາດົນເພີ່ມຄວາມສ່ຽງເປັນພະຍາດລົມແດດ (heat stroke) ທີ່ເຮັດໃຫ້ໝົດສະຕິ, ມືນ ຫລື ຊັກ ເຊິ່ງອາດເປັນອັນຕະລາຍເຖິງຊີວິດຖ້າບໍ່ໄດ້ຮັບການປິ່ນປົວ.
ທັງນີ້, ບາງແຂວງຂອງຟີລິບປິນມີອຸນຫະພູມດັດຊະນີຄວາມຮ້ອນສູງເຖິງ 45 ອົງສາ ໃນວັນທີ 28 ມີນາ – 1 ເມສາ ແລະ ຄາດວ່າສະພາບອາກາດຮ້ອນຈະຍັງຄົງຢູ່ໃນອີກຫລາຍວັນ.
