ຜູ້ນຳກາຕາໂລນີຍັງບໍ່ປະກາດຊັດເຈນ ວ່າຈະແຍກຕົວຈາກແອັສປາຍ
ທ່ານ ກາຣເລສ ປຸເດມອງ ຜູ້ນຳແຄວ້ນກາຕາໂລນີ ຍັງບໍ່ແຈ້ງຢ່າງຈະແຈ້ງໃນວັນທີ 16 ຕຸລາວ່າ: ທ່ານໄດ້ປະກາດເອກະລາດຈາກແອັສປາຍໃນອາທິດຜ່ານມາ ຫລື ບໍ່ ເຊິ່ງເຮັດໃຫ້ລັດຖະບານແອັສປາຍຍັງຮັກສາການຄວບຄຸມ ແລະ ບໍລິຫານແຄວ້ນກາຕາໂລນີໄດ້ໂດຍກົງ.
ກ່ອນໜ້ານີ້, ນາຍົກລັດຖະມົນຕີ ມາຣີອາໂນ ຣາຮອຍ ຂອງແອັສປາຍ ໄດ້ໃຫ້ເວລາຈົນຮອດ 10:00 ໂມງຂອງວັນທີ 16 ຕຸລາຕາມເວລາທ້ອງຖິ່ນ ຫລື 15:00 ໂມງ ຢູ່ລາວ ເພື່ອໃຫ້ຜູ້ນຳແຄວ້ນກາຕາໂລນີຊີ້ແຈງທ່າທີໃຫ້ຈະແຈ້ງວ່າຈະແຍກຈາກແອັສປາຍ ຫລື ບໍ່ ແລະ ຍືດເວລາໄປຈົນຮອດວັນທີ 19 ຕຸລາ ເພື່ອທົບທວນອີກ ຖ້າຍັງຢືນຢັນຈະແຍກເປັນເອກະລາດ. ນາຍົກລັດຖະມົນຕີ ຣາຮອຍ ເນັ້ນວ່າ: ລັດຖະບານກາງຈະໃຊ້ທຸກທາງລະງັບການແຍກຕົວຂອງແຄວ້ນກາຕາໂລນີ ຖ້າຜູ້ນຳທ້ອງຖິ່ນຍັງເຄື່ອນໄຫວປະກາດເອກະລາດ. ສື່ທ້ອງຖິ່ນຢູ່ກາຕາໂລນີລາຍງານວ່າ: ໃນຈົດໝາຍຂອງທ່ານ ປຸເດມອງ ທີ່ມີຕໍ່ນາຍົກລັດຖະມົນຕີແອັສປາຍນັ້ນ ບໍ່ໄດ້ໃຫ້ຄຳຕອບຈະແຈ້ງກັບລັດຖະບານກາງ ໂດຍລະບຸພຽງວ່າທັງສອງຝ່າຍຄວນເປີດການເຈລະຈາກັນໂດຍໄວທີ່ສຸດໃນໄລຍະສອງອາທິດຕໍ່ໜ້າ. ຂໍ້ຄວາມຂອງທ່ານ ປຸເດມອງ ແຈ້ງວ່າ: ກາຕາໂລນີຕ້ອງການເຈລະຈາຫາລືຢ່າງຈິງຈັງ.
