ເສັ້ນທາງແມ່ນໜຶ່ງໃນຄວາມພ້ອມສຳລັບປີທ່ອງທ່ຽວ

- advert banner 728 90 728x90 - ເສັ້ນທາງແມ່ນໜຶ່ງໃນຄວາມພ້ອມສຳລັບປີທ່ອງທ່ຽວ

ໂດຍ: ທິດ​ກໍ່າ

- new3 - ເສັ້ນທາງແມ່ນໜຶ່ງໃນຄວາມພ້ອມສຳລັບປີທ່ອງທ່ຽວ

​ເວົ້າ​ເລື່ອງ​ທາງ​ເພ​ໃນ​ໄລຍະ​ລະດູຝົນຜ່ານ​ມາ ມັນ​ບໍ່​ສະ​ເພາະ​ແຕ່​ຢູ່​ນະຄອນຫລວງ​ວຽງ​ຈັນ​ເຮົາ ຢູ່​ແຕ່ລະ​ແຂວງ​ ຫລື ​ເກືອບ​ເວົ້າ​ໄດ້​ວ່າ​ໃນ​ທົ່ວ​ປະ​ເທດ​ກໍ​ປະສົບ​ບັນຫາ​ຄື​ກັນ. ​ເວົ້າ​ເລື່ອງ​ເສັ້ນທາງ​ເພ​ມັນ​ກໍ​ບໍ່​ໝາຍ​ເຖິງ​ໝົດ​ທຸກ​ເສັ້ນ ​ແລະ ໝົດ​ທຸກ​ບ່ອນ, ມີ​ພຽງ​ບາງ​ຈຸດ​ບາງ​ບ່ອນ​ເທົ່າ​ນັ້ນ, ​ແຕ່​ກໍ​ເຫັນ​ວ່າ​ເສັ້ນທີ່​ຫລໍ່​ແຫລມ​ຍຸດ​ທະ​ສາດ ຫລື ​ເສັ້ນ​ໃດ​ທີ່​ຈຳ​ເປັນ​ຄວນ​ແກ້​ເຮົາ​ກໍ​ຈະ​ຕ້ອງ​ໄດ້​ປົວ​ແປງ​ໃຫ້​ມັນ​ດີ ​ແລະ ​ໃຊ້​ການ​​ໄດ້​ຢ່າງ​ສະດວກ​ສະບາຍ. ​ເຊັ່ນ​ຕົວຢ່າງ​ຢູ່​ນະຄອນຫລວງ​ວຽງ​ຈັນ​ເຮົາ​ກໍ​ແມ່ນ​ເສັ້ນທາງ​ໃຫຍ່​ຫລັກ​ໆ​ຕາມ​ສາມ​ແຍກ​ສີ່​ແຍກ, ​ເສັ້ນທາງ​ໄປ​ຫາ​ສະຖານ​ທີ່​ທ່ອງ​ທ່ຽວ​ແຕ່ລະ​ຈຸດ, ​ແຕ່​ລະ​ບ່ອນ​ທີ່​ເຫັນ​ວ່າ​ມີ​ຄວາມ​ຈຳ​ເປັນ, ສ່ວນວ່າ​ທາງ​ຊອຍ​ກັບ​ເສັ້ນທາງ​ໄປ​ຫາ​ແຫ​ລ່ງທ່ອງ​ທ່ຽວ​ໃນ​ບາງ​ຈຸ​ດບາງ​ບ່ອນ​ອ່າວ​ສອກຫລີກ​ຫ່າງ​ໄກ​ແດ່ ທາງ​ເມືອງ ​ແລະ ບ້ານ​ກໍ​ຄວນ​ມີ​ສ່ວນ​ຮັບຜິດຊອບ. ໝາຍວ່າ​ລັດ​ກັບ​ປະຊາຊົນ​ພ້ອມ​ກັນ​ເຮັດ​ດັ່ງ​ທີ່​ພວກ​ເຮົາ​ເຄີຍ​ປະຕິບັດ​ກັນ​ມາ.

ທິດ​ກໍ່າ​ໄປ​ເຫັນ​ເສັ້ນທາງ​ເພ​ຢູ່​ແຖວ​ແຂວງ​ຄຳ​ມ່ວນ ​ໂດຍ​ສະ​ເພາະ​ແມ່ນ​ເສັ້ນທາງ​ໄປ​ຖ້ຳພະ, ໜອງ​ປາຝາ​ໃນ​ໄລຍະ​ນີ້​ຖ້າ​ແມ່ນ​ລົດ​ເກັງ​ກັບ​ລົດ​ບັດ (BUS) ຈະ​ບໍ່​ສາມາດ​ໄປ​ໄດ້ ຍ້ອນ​ວ່າ​ມີ​ບ່ອນ​ໜຶ່ງ​ມັນ​ເປັນ​ຫ້ວຍ​ຖືກ​ນ້ຳກັດ​ເຊາະ​​ເປ່​ເພ ​ເຊິ່ງທາງ​ໜ່ວຍ​ງານ​ກ່ຽວຂ້ອງ​ເພິ່ນ​ກໍ​ໄດ້​ເອົາ​ຫີນ​ໄປ​ຖົມ​ໃສ່, ​ແຕ່​ບັງ​ເອີນ​ມີ​ລົດ​ທຽວ​ໄປມາ​ຫລາຍ​ເຮັດ​ໃຫ້​ຈຸດ​ດັ່ງກ່າວ​ຫລຸບ​ລົງ​ເປັນ​ຂຸມ​ເລິກ​ພຽງ​ຫົວ​ເຂົ່າ​ ລົດ​ທີ່​ມີ​ຊ່ວງ​ລ່າງ​ຕໍ່າ ​ແລະ ຍາວ​ແມ່ນ​ບໍ່​ສາມາດ​ຜ່ານ​ໄປ​ໄດ້. ​ໃນ​ມື້ທີ່​ທິດ​ກໍ່າ​ໄປ​ນັ້ນ ​ໄດ້​ເຫັນ​ຂະ​ບວນລົດ 3-4 ຄັນ​ທີ່​ເດີນທາງ​ຈາກ​ນະຄອນຫລວງ​ວຽງ​ຈັນ​ ມີ​ພະສົງ​ສາມະ​ເນນ ທັງ​ແມ່​ຂາວ ​ແລະ ອອກ​ຕົນ​ຍາດ​ໂຍມ​ປະມານ 20 ກວ່າ​ຄົນ​ຈະ​ພາກັນ​ໄປ​ທ່ຽວ​ຊົມ ​ແລະ ກາບ​ໄຫວ້ຖ້ຳພະ, ​ແຕ່​ບັງ​ເອີນ​ເມື່ອ​ໄປ​ຮອດ​ຈຸດ​ດັ່ງກ່າວ​ລົດ​ບໍ່​ສາມາດ​ຜ່ານ​ໄປ​ໄດ້. ສ່ວນ​ຈຸດ​ອື່ນໆ​ເສັ້ນທາງ​ກໍ​ເປ່​ເພ​ເໝືອນ​ກັນ​ເຊັ່ນ: ​ເສັ້ນທາງ​ໄປ​ຖ້ຳກອງ​ລໍ ​ແລະ ບ່ອນ​ອື່ນໆ​ທີ່​ເປັນ​ແຫ​ລ່ງທ່ອງ​ທ່ຽວ. ນີ້​ຄື​ບັນຫາ​ຂອງ​ເສັ້ນທາງ​ທີ່​ຈະ​ອຳນວຍ​ຄວາມ​ສະດວກ ​ແລະ ດຶງດູດ​ໃຫ້​ຄົນ ​ແລະ ຍວດ​ຍານພາຫະນະ​ຂອງ​ຜູ້​ໄປ​ທ່ອງ​ທ່ຽວ.

ສິ່ງ​ທີ່​ທິດ​ກໍ່າ​ໄດ້​ຍົກ​ມາ​ນີ້​ ​ແມ່ນ​ພຽງ​ຢູ່​ນະຄອນຫລວງ​ກັບ​ຢູ່​ແຂວງ​ຄຳ​ມ່ວນ​ເທົ່າ​ນັ້ນ, ສ່ວນວ່າ​ຢູ່​ແຂວງ​ອື່ນໆ​ໃນ​ທົ່ວ​ປະ​ເທດ​ກໍ​ອາດ​ຈະ​ປະສົບ​ພົບ​ພໍ້​ເໝືອນ​ກັນ. ​ເທົ່າ​ທີ່​ທິດ​ກໍ່າ​ໄດ້​ຕິດຕາມ ​ແລະ ຜ່ານ​ແຫ​ລ່ງສື່​ທັງຫລາຍ​ເຫັນ​ວ່າ ​ແຕ່ລະ​ແຂວງ​ໃນ​ທົ່ວ​ປະ​ເທດ​ກໍ​ພາກັນ​ໜັກ​ໃຈ​ໃນ​ເລື່ອງ​ເສັ້ນທາງ. ​ໂຕ​ອັນ​ສຳຄັນ​ກວ່າ​ໝູ່​ແມ່ນ​ງົບ​ບໍ່​ພຽງພໍ. ຖ້າ​ພວກ​ເຮົາ​ຈະ​ຄິດ​ໄລ່​ກິໆ​ກີໆ​ເພື່ອ​ປັບປຸງ​ທາງ​ໃນ​ທຸກ​ເສັ້ນທີ່​ມັນ​ເປ່​ເພ​ຕ້ອງ​ໄດ້​ໃຊ້​ງົບ​ຢ່າງ​ມະຫາສານ. ຕາມ​ທິດ​ກໍ່າ​ຄິດ, ກ່ອນ​ຈະ​ໄປ​ຮອດ​ປີ​ທ່ອງ​ທ່ຽວ​ທີ່​ຈະ​ມາ​ເຖິງ​ນີ້ ​ເຮົາ​ກໍ​ຕ້ອງ​ໄດ້​ພ້ອມ​ກັນ​ຄິດ ​ແລະ ພ້ອມ​ກັນ​ແກ້. ຕາມ​ເຮົາ​ວ່າ ກ່ອນ​ອື່ນ​ໝົດ​ຕ້ອງ​ແກ້​ບ່ອນ​ຈຳ​ເປັນ​ກ່ອນ. ສະ​ເພາະ​ຢູ່​ນະຄອນຫລວງ​ວຽງ​ຈັນ​ເຮົາ​ກໍ​ເຫັນ​ລົງມື ​ແລະ ສຳ​ເລັດ​ໄປ​ຫລາຍ​ບ່ອນ​ແລ້ວ, ສ່ວນ​ເສັ້ນທາງ​ໄປ​ຫາ​ແຫ​ລ່ງທ່ອງ​ທ່ຽວ​ນັ້ນບ່ອນ​ສອກຫລີກ​ຫ່າງ​ໄກ​ແດ່​ກໍ​ຄວນ​ໄດ້​ສົມທົບ​ເບື້ອງທ້ອງ​ຖິ່ນ ​ໂດຍ​ສະ​ເພາະ​ຂັ້ນ​ເມືອງ ​ແລະ ຂັ້ນບ້ານ. ຄື​ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ ການ​ກໍ່ສ້າງ​ເສັ້ນທາງ​ແຕ່​ຈຸດ​ໜຶ່ງ​ໄປ​ຫາ​ຈຸດ​ໜຶ່ງ​ກວ່າ​ຈະ​ສຳ​ເລັດ​ຕ້ອງ​ໄດ້​ໃຊ້​ງົບ​ຫລາຍ​ຮ້ອຍ​ລ້ານ. ປັດຈຸບັນ ​ເຮົາ​ເຫັນ​ວ່າການ​ກໍ່ສ້າງ​ເສັ້ນທາງ​ລະຫວ່າງ​ຕົວ​ເມືອງ​ກັບ​ທ້ອງ​ຖິ່ນ​ສ່ວນ​ຫລາຍ​ກໍ​ແມ່ນ​ໄດ້​ທະລຸ​ຈອດ​ກັນ​ໝົດ​​ແລ້ວ ນັບ​ທັງ​ເສັ້ນທາງ​ໄປ​ຫາ​ແຫ​ລ່ງທ່ອງ​ທ່ຽວ​ບາງ​ຈຸດ​ບາງ​ບ່ອນ​ທີ່​ສຳຄັນ, ຕ່າງ​ແຕ່​ວ່າ​ໃນ​ລະດູຝົນ​ຜ່ານ​ມາ​ຖືກ​ນ້ຳກັດ​ເຊາະ ​ເຮັດ​ໃຫ້​ບາງ​ຈຸດ​ບາງ​ບ່ອນ​ມັນ​ເປ່​ເພ ​ແລະ ສົມຄວນ​ຕ້ອງ​ໄດ້​ບູລະນະ​ສ້ອມ​ແປງ​ໃຫ້​ຢູ່​ໃນ​ສະພາບ​ທຽວ​ໄປມາ​ໄດ້​ສະດວກ​ສະບາຍ.

- lattana 1 - ເສັ້ນທາງແມ່ນໜຶ່ງໃນຄວາມພ້ອມສຳລັບປີທ່ອງທ່ຽວ

​ເຖິງ​ຢ່າ​ງ​ໃດ​ກໍ​ດີ, ຕາມ​ທິດ​ກໍ່າ​ຄິດ ກວ່າ​ຈະ​ໄປ​ຮອດ​ປີ​ທ່ອງ​ທ່ຽວ​ລາວ 2018 ສົມຄວນ​ຕ້ອງ​ໄດ້​ເຮັດ​ໃຫ້​ເສັ້ນທາງ​ໄປ​ມາສະ​ດວກ​ສະບາຍ ​ເພາະ​ເສັ້ນທາງ​ຄື​ໜຶ່ງ​ໃນ​ປັດ​ໄຈ​ຫລັກ​ທີ່​ຈະ​ເຮັດ​ໃຫ້​ຄົນ​ໄປ​ທ່ອງ​ທ່ຽວ​ຢ່າງ​ຫລວງຫລາຍ. ກົງກັນຂ້າມ ຖ້າ​ເສັ້ນທາງ​ມີ​ອຸປະສັກ​ຂັດຂວາງ​ຫຍຸ້ງຍາກ​ກໍ​ຈະ​ເຮັດ​ໃຫ້​ບັນຍາກາດ​ການທ່ອງທ່ຽວ​ມິດ​ມ້ອຍ​ສ້ອຍ​ແຫລມ, ສຸດ​ທ້າຍ​ລາຍ​ຮັບ​ໃນ​ການ​ບໍລິການ​ຕ່າງໆ​ກໍ​ພາກັນ​ເປິະ. ນີ້​ຄື​ຈຸດ​ສຳຄັນ​ຕົ້ນຕໍ​ຂອງ​ບັນຫາ. ກົງກັນຂ້າມ ຖ້າ​ຫາກ​ການ​ໄປມາ​ຫຍຸ້ງຍາກ ຕ້ອງການ​ໄປ​ທ່ຽວ​ໃສ​ກ​ໍ​ໄປ​ບໍ່​ຮອດ​ຈອດ​ບໍ່​ເຖິງ​ກໍ​ເປັນ​ອັນວ່າ​ໝົດ​ຄວາມ​ຫວັງ​ທັງ​ໝູ່​ທັງ​ເຮົາ ຊັ້ນດອກ​ວາ !.

error: Content is protected !!