ກໍາປູເຈຍເຕືອນຄວາມສ່ຽງດ້ານສຸຂະພາບ ທ່າມກາງຄື້ນຄວາມຮ້ອນຮຸນແຮງ

ວັນທີ 1 ພຶດສະພາ, ທ່ານ ອໍ ແວນດິນ ໂຄສົກກະຊວງສາທາລະນະສຸກຂອງກໍາປູເຈຍ ໄດ້ແຈ້ງເຕືອນຄວາມສ່ຽງດ້ານສຸຂະພາບຈາກອຸນຫະພູມອາກາດ ຢູ່ກໍາປູເຈຍທີ່ເພີ່ມສູງເປັນປະຫວັດສາດ. ພ້ອມຮຽກຮ້ອງໃຫ້ປະຊາຊົນປົກປ້ອງຕົນເອງຈາກອາການຂາດນໍ້າ ໂດຍການດື່ມນໍ້າເພີ່ມຂຶ້ນ.

ທ່ນ ແວນດິນ ກ່າວວ່າ: ອຸນຫະພູມໃນໄລຍະຜ່ານມາຮ້ອນທີ່ສຸດໃນປະຫວັດສາດຂອງກໍາປູເຈຍ ຈຶ່ງຮຽກຮ້ອງໃຫ້ປະຊາຊົນລະມັດລະວັງ ແລະ ບໍ່ຢູ່ກາງແຈ້ງດົນເກີນໄປ ເພື່ອປ້ອງກັນຜິວໜັງເກີດການຄັນ, ເຫງື່ອອອກຫລາຍເກີນໄປ ແລະ ອາການຂາດນໍ້າ, ອາກາດຮ້ອນຍັງອາດເຮັດໃຫ້ຫາຍໃຈລໍາບາກ ຫລື ເປັນລົມ, ຫົວໃຈວາຍ ແລະ ເສຍຊີວິດ ພ້ອມທັງແນະນໍາໃຫ້ປະຊາຊົນຢູ່ແຕ່ໃນຮົ່ມ ຖ້າຕ້ອງອອກນອກເຮືອນ ຫລື ອາຄານ ໃຫ້ໃຊ້ຜ້າປຽກ ຫລື ເອົາຜ້າພັນຄໍມາຄຸມຮ່າງກາຍຖ້າຮູ້ສຶກຮ້ອນເກີນໄປ, ດື່ມນໍ້າວັນລະ 2-3 ລິດ ລວມທັງໃສ່ເສື້ອຜ້ານໍ້າໜັກເບົາ ແລະ ແຂນຍາວ ແລະ ທາໂລຊັນກັນແດດ ຫລື ກາງຮົ່ມເພື່ອປົກປ້ອງຕົນເອງຈາກແສງແດດ ຖ້າຢູ່ໃນເຮືອນ ຫລື ອາຄານ ສາມາດໃຊ້ພັດລົມ ຫລື ເຄື່ອງປັບອາກາດເພື່ອຫລຸດຄວາມຮ້ອນ ແລະ ຄວນຫລີກເວັ້ນການຮັບປະທານອາຫານທີ່ມີລົດຊາດຫວານ, ເຄັມ ຫລື ມັນຫລາຍເກີນໄປ.

ໂຄສົກກະຊວງຊັບພະຍາກອນນໍ້າ ແລະ ອຸຕຸນິຍົມວິທະຍາຂອງກໍາປູເຈຍ ກ່າວໃນອາທິດກ່ອນວ່າ: ກໍາປູເຈຍຜະເຊີນອຸນຫະພູມສູງສຸດເປັນປະຫວັດສາດໃນຮອບ 170 ປີ, ແຕ່ອຸນຫະພູມຈະເລີ່ມຫລຸດລົງໃນເດືອນພຶດສະພານີ້ ເນື່ອງຈາກຈະມີຝົນຕົກ