ພຽງ 4 ເດືອນຜ່ານມາ ແຂວງອຸດົມໄຊ ມີຜູ້ເສຍຊີວິດຈາກໄຟໄໝ້ລາມປ່າ ເຖິງ 4 ຄົນ

ພະແນກກະສິກຳ ແລະ ປ່າໄມ້ ແຂວງອຸດົມໄຊ ໃຫ້ຮູ້ວ່າ: ແຕ່ວັນທີ 8 ເດືອນມັງກອນ ຫາ 9 ເມສາ 2024 ພະແນກກະສິກຳ ແລະ ປ່າໄມ້ ແຂວງ, ຫ້ອງການກະສິກຳປ່າໄມ້ເມືອງ ໄດ້ສຸມທຸກວິທີທາງເພື່ອສະກັດກັ້ນບໍໃຫ້ເກີດມີໄຟໄໝ້ລາມປ່າ ໂດຍສະເພາະແມ່ນປ່າສະຫງວນ, ປ່າປ້ອງກັນ, ປ່າຜະລິດ ແລະ ປ່າປະເພດອື່ນໆ ດ້ວຍຫລາຍວິທີເຊັ່ນ ລົງໂຄສະນາເຜີຍແຜ່ບັນດາກົດໝາຍ ນິຕິກຳ ແລະ ເຮັດບົດບັນທຶກກັບຄອບຄົວທີ່ໄດ້ຖາງປ່າເພື່ອທຳການຜະລິດ ແມ່ນບໍໃຫ້ເກີດໄຟໄໝ້ລາມປ່າ ຖ້າຫາກເກີດຂຶ້ນມາແມ່ນມອບໃຫ້ຄອບຄົບນັ້ນຮັບຜິດຊອບ.

ແຕ່ປານນັ້ນກໍຕາມ ຍັງເກີດໄຟໄໝ້ລາມປ່າໃນທຸກເມືອງ, ມີຜູ້ເສຍຊີວິດ 4 ຄົນ, ໃນນັ້ນຢູ່ບ້ານມົກໂຄກາງ ເມືອງປາກແບງ 2 ຄົນ ແລະ ອີກ 2 ຄົນແມ່ນຢູ່ບ້ານ ພູວຽງໄຊ ເມືອງຮຸນ, ນອກນີ້ໄຟຍັງໄດ້ໄໝ້ລາມເຂົ້າເຂດນອກ ເຂດໃນ ປ່າສະຫງວນ ພາຍໃນ 7ເມືອງ ທົ່ວແຂວງ ເສຍຫາຍ 60 ກ່ວາເຮັກຕາ, ນອກໃນປ່າປ້ອງກັນ 163 ກວ່າເຮັກຕາ, ນອກໃນເຂດປ່າຜະລິດ 5 ເຮັກຕາ, ລວມທັງໝົດຫລາຍກວ່າ 229 ເຮັກຕາ, ສຳລັບຂໍ້ມູນ ກາງເດືອນເມສາ ຫາຕົ້ນເດືອນ ພຶດສະພາ ແມ່ນຍັງບໍ່ສາມາດສະຫລຸບໄດ້ເທື່ອ ເນື່ອງຈາກໄຟຍັງໄໝ້ລາມປ່າຢູ່ ໃນຫລາຍບ້ານ ຫລາຍເມືອງ.